G—NEWS (DILI) — Prezidente no Laureadu Nobel ba Pás, J. Ramos-Horta, kondekora Medalla Meritu no Sertifikadu Rekoñesimentu ba Akadémiku Brazileiru na’in-hitu, nu’udar rekoñesimentu ba sira-nia knaar serbisu inkansável no kontribuisaun signifikativu iha vários setór dezenvolvimentu nasionál, durante sira-nia kareira profisionál, iha Timor-Leste no iha sira-nia rain rasik.
Diretora-Jerál Prezidénsia Repúblika, Aida Maria dos Santos, nomeia tuir Dekretu Prezidente Repúblika No.86 /2025. Hodi reprezenta Prezidente Repúblika, prezide serimónia ne’ebé hala’o iha Palásiu Prezidensiál Nicolau Lobato.
Akadémiku Brazileiru sira tuirmai ne’e mak hetan Medalla Méritu tuir Dekretu Prezidente Repúblika nian No. 87/2025:
- Prof. Dr. Kelly Silva (Universidade Brasilia – UnB)
- Prof. Dr. Daniel Schroeter Simião (Universidade Brasilia – UnB)
- Prof. Dr. Suzani Cassiani (Universidade Federál Santa Catarina – UFSC)
- Prof. Dr. Irlan von Linsingen (Universidade Federál Santa Catarina nian – UFSC)
- Prof. Dra. Patrícia Montanari Giraldi (Universidade Federál Santa Catarina – UFSC)
- Prof. Dra. Regina Helena Pires de Brito (Universidade Presbiteriana Mackenzie – UPM)
- Prof. Dr. Marco Tullio de Castro Vasconcelos (Universidade Presbiteriana Mackenzie -UPM)
Akadémiku sira ne’ebé simu prémiu reprezenta tradisaun parseria akadémika entre Timor-Leste no Brazil. Liuhusi sira-nia instituisaun sira—UPM, UFSC, no UnB—sira sai instrumentál hodi hametin setór ensinu superiór Timor-Leste nian.
Pontu importante Parseria hirak-ne’e inklui:
➤ Universidade Presbiteriana Mackenzie (UPM): Desde tinan 2001, UPM kolabora ona ho UNTL hodi hametin lian Portugues liu husi projetu alfabetizasaun, formasaun dosente sira, no dezenvolvimentu material. Parseria tinan 23 ida-ne’e, avansa signifikativamente husi Prof. Regina Pires Brito, remata ho programa doutoramentu DINTER iha Letras. Iha tinan 2024, dosente UNTL na’in 13 maka kompleta sira nia doutoramentu, ne’ebé intrega ofisialmente husi Reitór UPM Prof. Marco Tullio de Castro Vasconcelos.
➤ Universidade Federál Santa Catarina (UFSC): Parseria UFSC-UNTL fasilita ona interkâmbiu profesór no estudante sira. Projetu prinsipál sira inklui programa Kualifikasaun Profesór no Ensinu Lian Portugés (2009-2016) no projetu kooperasaun téknika ida ne’ebé la’o hela, ho koordenasaun husi profesora Suzani Cassiani no finansia husi Ajénsia Kooperasaun Brazileiru (ABC), hodi implementa Mestradu iha Edukasaun.
➤ Universidade Brasília (UnB): Desde 2010, UnB halo parseria ho UNTL hodi fó formasaun ba pesoál sira ba ensinu no peskiza iha Siénsias Sosiál. Ho lideransa husi antropólogu sira Kelly Silva no Daniel Simião, parseria ida-ne’e fó dalan ona interkâmbiu peskiza sira, produsaun bibliográfika krítiku, no proposta polítika públika iha edukasaun, igualdade jéneru, no dezenvolvimentu ekonómiku.
Prezidente Ramos-Horta afirma: “Servisu sira ne’ebé presta hosi akadémiku respeitadu sira ne’e merese hetan rekoñesimentu no valorizasaun hosi Estadu.
Timor-Leste konsege ultrapasa dezafiu oioin no atinze susesu balun iha área dezenvolvimentu balun, agradese mós ba atividade sira ne’ebé hala’o husi ita-nia maluk estranjeiru sira.”
Prezidente hato’o agradesimentu kle’an nasaun nian ba Akadémiku Brazileiru sira ba sira-nia knaar krusiál iha jornada dezenvolvimentu Timor-Leste nian ne’ebé la’o daudaun.
Sira-nia esforsu, ne’ebé hala’o iha Timor-Leste nia laran no mós hosi rai-li’ur, fó benefísiu kle’an ba povu Timór no hametin lasu amizade no kooperasaun entre nasaun rua ne’e.
loading="lazy" />