G-NEWS (DILI) – Sekretariu Estadu Komunikasaun Sosiál (SEKOMS) Expedito Loro Dias Ximenes ba jornalista sira hateten, mídia nasionál sira ho plataforma online ne’ebé fó sai informasaun atuál, maibé tenke ho kualidade.
Governante ne’e, hato’o lia-hirak ne’e, hafoin selebra akordu apoia ba mídia Plataforma dijital sira, kinta-feira (05102023) semana ne’e, iha salaun enkontru Vise Ministru Assuntu Parlamentares, iha Palásiu Governu.
Expedito esplika, apoiu Governu ba mídia Plataforma dijital sira hanesan online no Televizaun streaming sira ne’ebé duni informasaun sira, maibé tenke hatur nafatin informasaun ne’ebé ho kualidade, nune’e públiku bele konsume ho di’ak.
“Governu kontinua apoiu ba mídia dijital sira, la signifika governu atu halo intervensaun, maibé apoiu ne’e atu hadia kualidade ka produtu jurnalistika sira”, Expedito esplika.
Iha fatin hanesan, reprejentate na’in ba mídia dijital sira, Suzano Cardoso husu ba Governu atu kontinua apoia ezisténsia mídia dijital, liuhosi finanseiru, kapasitasaun rekursu umanu, nune’e bele hadia kualidade informasaun sira.
Entertantu, Sekretariu Estadu Komunikasaun Sosiál, ne’ebé lídera hosi Eis Konselleiru Konsellu Imprensa Expedito Loro Dias Ximenes, asina ona akordu apoiu ba mídia dijitál sira to’o fulan Dezembru, liuhosi pakote informativa, publisidade no assuntu relevante sira seluk.
Jornalista : Ekipa G-News
Editór Testu : Amito Qonusere Araújo
loading="lazy" />