G-NEWS (DILI) — Primeiru-Ministru Kay Rala Xanana Gusmão ko’alia ba Jornalista sira katak, Sekretáriu-Jerál ONU (Organização das Nações Unidas) António Guterres no Eis Xefe UNAMET (The United Nations Mission in East Timor) Ian Martin, konfirma sei partisipa komemorasaun loron nasionál konsulta Popular, loron 30 fulan-Agostu, ne’ebé sei realiza iha Dili.
Xanana Gusmão, ko’alia lia ne’e, hafoin hasoru malu ho Xefe Estadu José Ramos Horta, iha Palásiu Prezidénsial, Aitarak-laran Dili, kinta-feira (18072024).
Xanana dehan, Primeiru-Ministru ho Prezidente Repúblika diskute kona-ba preparasaun ba komemorasaun loron nasionál konsulta popular, loron 30-fulan Agostu. Iha komemorasaun ne’e, Sekretáriu-Jerál ONU António Guterres, Eis Xefe UNAMET Ian Martin no reprejentante sira hosi nasaun seluk, ne’ebé sei partisipa iha eventu istóriku hirak ne’e.
“Ami ko’alia liu preparasaun kona-ba 30 de Agostu, ouhhhhhh ulun-fatuk moras…..mas Setembru mak la akontese buat ida, ita sente hanesan, 30 de Agostu tiha, semana ida mai, vizita Papa Francisco, klaru, ita la hatene, iha Europeia, komu besik, Papa bele ba dala-rua dala-tolu, komu rai ki’ik oan ida, dook teb-tebes, ita onradu teb-tebes simu ona vizita dala-rua nian hosi Papa”, Xanana Gusmão.
“Mas 30 de Agostu mós importante iha ita nia istória, Sekretáriu-Jerál ONU António Guterres nian mós mai, Ian Martin mai, sira ne’ebé UNAMET nian mós mai”.
Tuir Primeiru-Ministru ne’e katak, loron nasionál 30 de agostu nu’udar komemorasaun atu hanoin fila-fali sofrimentu, sakrifisiu no determinasaun ne’ebé povu Timor Leste laran tomak deside liuhosi referendu iha tinan 1999, hodi kore an hosi Indonézia, ne’ebé povu Timor Leste defende, hodi luta durante tinan 24 nia laran, sai nasaun Independente.
“30 de Agostu ne’e atu lembra ba sofrimentu, sakrifisiu, determinasaun, inan-aman sira, no povu tomak, tanba ho sira nia sakrifisiu, sira nia determinasaun mak ita bele hetan ukun-an”.
“Ne’e duni, 30 de agostu mesak, ho papa mesak, ita kala dada-is oituan, 30 de Agostu tiha, semana ida, Vizita Papa, depois INTERFET (The International Force East Timor) nian tán. ne’ebé ami na’in rua Prezidente ko’alia ba malu kona-ba ida ne’e oinusa koordena malu didi’ak, ne’ebé ita hotu hein katak, povu tomak sei sente kontente tanba 30 de Agostu, ita sei selebra, sira nia sakrifisiu, sira nia determinasaun”, PM Xanana Gusmão.
Editór Testu : Amito Qonusere Araújo
loading="lazy" />