G—NEWS (BAUCAU) — Servisu Munisipal Edukasaun Baucau hamutuk ho Padre Paroku Santo Antonio Baucau vila Antiga inagura eskola Pre Eskolar Públiku Buibau Postu Administrativo Baucau Vila Munisipiu Baucau.
Diretór Servisu Munisipal Edukasaun Baucau Afonso Dos Santos da Costa Hateten, agradese tebes ba autoridade suku no komunidade tanba kopera no kolabora ne’ebé di’ak hodi finaliza ona edifisiu no sala de aula foun ba estudante sira liu-liu iha Pre Eskolar públiku Buibau.
Nia afirma tuir estudu viabilidade husi Ministeriu Edukasaun katak Munisipiu Baucau labarik ki’ik oan barak mak la eskola.
“Servisu Edukasaun hasoru dezafiu mak labarik ki’ik oan sira, ita Baucau tuir peskiza sira ne’ebé halo ita Baucau ne’e sinal mean tanba inan aman balun seda’uk iha konsensia hodi lori oan ba eskola, inan aman balun hateten mai ha’u dehan hanesan sei ki’ik oan ne’e orsida ba eskola tanis halo tun halo sae di’ak liu boot mak lori ba eskola”. Dehan diretór Servisu Munisipal Edukasaun Baucau Afonso Dos Santos da Costa, ba jornalista RCLM Baucau,kinta-feira (08052025).
Xefe suku Buibau Fransisco Ximenes hateten, prontu koopera ho komunidade sira hodi kontrola eskola no edifisiu ne’ebé foun ba tempu naruk.
“Nu’udar Xefe suku ha’u koopera ho mestri no inan aman sira, hodi hare no kuida eskola ne’e, hodi garante to’o tinan lima nolu mai”. haktuir Fransisco
Entertantu Koordenadora Pre Eskolar Ostelina da Silva Sarmento agradese ba governu tanba bele finaliza ona eskola ida ne’e hodi fasilita estudante sira ba prosesu aprendijazen
“Ha’u senti kontente tebes no apresia tanba edifisiu ida ne’e dezde 2021 amii uza de’it EBF sira nia eskola hodi fo sala ida ba ami uza maibe dadaun ne’e ami nia eskola prontu ona inagura ona entaun ba oin ami uza ami nia eskola ona, ida ne’e hanesan orgullu bo’ot ba ha’u”. Dehan kordenadora
Entertantu estudante nia inan Graciana da Silva Reforsa sente kontete tebes ho kondisaun eskola actual ne’ebé di’ak hodi hala’o prosesu aprendisagem ho seguru no hakmatek.
“Ha’u nu’udar inan aman sente kontente tebes tanba ha’u nia oan sira bele tuir prosesu aprendijazen ho hakmatek no seguru tanba kondisaun eskola atual di’ak no kualidade”. Tenik Graciana
Total estudante hamutuk hat nolu resin neen no professors na’in rua. Enkuantu inagurasaun ne’e hahu ho misa agradesementu iha igreija santo Antonio Buibau ne’ebé prezide husi Padre paroku Santo Antonio Baucau Manuel Ximenes SDB.
loading="lazy" />