Sobu edifísiu redasaun TVE “seidauk iha salaun alternativa” 

G-NEWS (DILI) – Segunda-Feira (05022024) semana ne’e, ekipa konjunta hosi Ministériu Obras Públika, Sekretária Estadu Terras no Proriedades, Sekretária Estadu Assuntu Toponímia no Organizasaun Urbana, no Autoridade Munisípiu Dili sobu ona salaun debate públiku Televizaun Edukasaun Timor (TVE), iha área Koléjiu Eskola São Miguel Arcanjo.

Fundador Televizaun Edukasaun Timor (TVE) Armindo Crisna Caetano, segunda-feira ne’e inform aba G-News katak, ekipa ne’ebé sobu studio debate públiku TVE nian ne’e, la iha koordenasaun di’ak, no seidauk halo kompensasaun ba instituisaun TVE.

“To’o oras ne’e seidauk iha kompensasaun hosi Governu”, haktuir Armindo Crisna Caetano, ba G-News.

Baihira husu kona-ba salaun alternativa atu hala’o servisu jurnalizmu nian, liu-liu debate públiku iha TVE, Armindo Crisna Caetano hateten, seidauk iha alternativa ba salaun foun, no posibilidade debate bele akontese bainhira redasaun TVE aluga salaun seluk hodi hala’o servisu Jurnalizmu nian.

Nia informsa tán, ho studio Televizaun ne’ebé sobu ona, sei la afeta total ba prosesu aprendijajen, tanba aula eskola iha kondisaun hanesan bain-bain.

Armindo Crisna Caetano sente triste ho situasaun ne’e, maibé nia sei esforsu atu kotinua garante nafatin servisu jurnalizmu nian, hodi fornese informasaun ba públiku liuhosi kanal TVE nian.

Sekretária Estadu Assuntu Toponímia no Organizasaun Urbana Germano Santa Brites Dias hateten,

“Ha’u hamrik iha ne’e, mákina to’o ona, ida ne’e tenke rahun ona, para servisu tenke lao. Agora buat ida sobu ne’e laos foin mak hateten ita sobu, ita ba enkontru ita hateten sobu, muda, ita hatene katak espasu ida ne’e ita sei uza iha futuru mai”, governante ne’e ko’alia hafoin diskute malu ho Fundador TVE Armindo Crisna Caetano.

“Governu mak prepara kondisaun”, hateten Armindo hodi hatan Sekretária Estadu nia intervensaun.

“Fatin ida ne’e espasu públiku ida, no agora dadaun kompaña halo hela servisu. Eskola São Miguel laos problema foun id aba nonu Governu, problema ne’e mai kedan iha oitavu Governu ke labele rejolve”, haktuir governante ne’e.

Entertantu autoridade sira ne’ebé sobu studio TVE tán okupa espasu públiku, tanba tuir planu governu sei halo alargamentu estrada protokolu hahú hosi Raikotu to’o Rotunda Nicolau Lobato.

Editór Testu : Amito Qonusere Araújo