G—NEWS (DILI) — Iha loron 22 fulan-Marsu tinan 2025, akontese insidente ida ne’ebé envolve ofendidu Paulino Da Costa, funsionáriu Ministériu Edukasaun nian. Kazu ne’e involve alegasaun aktu violénsia husi membru F-FDTL na’in ida, ne’ebé hahú ho kolizaun ho asu ida no aumenta ba akontesimentu lubuk ida ne’ebé hamosu ameasa violénsia hasoru ofendidu.
Tuir dadus ne’ebé G—NEWS asesu husi fonte kredivel relata katak, iha Sabadu dadeer, loron 22 fulan-Marsu tinan 2025, maizumenus tuku 8 liu minutu 30 OTL, Paulino Da Costa sai husi nia maun nia uma iha Taibessi hodi fila ba nia rezidensia ne’ebé lokaliza iha Aldeia Correio, Suco Lahane Oeste.
Antes ne’e, nia ajuda halo dapur ba nia Banin, no hemu tua uitoan. Maizumenus tuku 12.30 OTL, Paulino sa’e nia motor fila ba nia uma hodi deskansa.
Maibé, bainhira atravesa kruzamentu besik ponte Mayfrend no Semitériu China Rate, Paulino soke asu ida ne’ebé atravesa hela iha portaun oin ofisiál F-FDTL nia uma, ho naran Jeni. Rezultadu husi soke malu ne’e halo Paulino monu husi nia motor. Hafoin monu, nia hamriik tolok.
Ofisiál F-FDTL ne’ebé tuur hamutuk ho nia kolega iha nia uma oin haree akontesimentu ne’e. Sira hakbesik ba Paulino no husu nia identidade. Paulino hatán katak nia hela iha Lahane Correio no aprezenta-an hanesan “Maun”, ne’ebé hanesan mós nia koñesidu ida hosi bairu hanesan iha Taibessi.
Ofisiál sira tuirmai hahú husu tan pergunta sira kona-ba Paulino, ne’ebé esplika katak Ha’u koñese maun tanba ita na’in rua hola feto iha Bairo ida de’it iha Taibessi.
Ho estadu konfuzaun no sente ameasadu, Paulino tuur ba motor. La ho avizu, ofisiál F-FDTL ne’e tuku kedas nia iha matan parte karuk. Ofendidu ne’ebé ta’uk tenta halai hodi soe nia motor no halai ba diresaun ponte Mayfriend, ho esperansa bele hetan tulun, hodi ba Polísia eskuadra Nain Feto no hato’o keixah.
Maibé, Paulino nia tauk boot liu tan bainhira hatene katak deskonfia forsa na’in ida ho naran João Mutin tuir nia to’o iha Polisia eskuadra Nain Feto. Bainhira lanu, João atua ho agresivu, hakilar maka’as iha eskuadra polísia laran, no husu atu sulan Paulino iha sela laran. Paulino sente ameasadu tebes no ikus mai halai fila ba nia rezidensia.
Pasu legál ne’ebé ofendidu foti
Iha Domingu, loron 23 fulan-Marsu tinan 2025, maizumenus tuku 08:00 OTL, Paulino deside atu ba Kuartél Jerál Polísia Militár (PM) hodi hato’o keixa ofisiál kona-ba akontesimentu ne’ebé nia enfrenta.
Prosesu keixa kontinua iha Segunda-feira, loron 24 fulan-Marsu tinan 2025, iha instituisaun legál oioin. Iha tuku 08.00 OTL, ofendidu hato’o keixa ba Polísia eskuadra Nain Feto, depois kontinua keixa iha tuku 14.00 OTL ba Kuartel-Jerál F-FDTL Fatuhada, divizaun Justisa, no iha tuku 15.30 OTL, ofendidu mós halo keixa ba Ministériu Públiku.
Paulino Costa nian hahú sai hanesan ameasa boot ida. Kazu ne’e hein katak bele rezolve ho justu hodi garante justisa ba vitima no prevene insidente hanesan labele akontese tan iha futuru.
To’o informasaun ne’e fó sai, G—NEWS asesu ona informasa husi parte Kuartél-Jenerál Forsas Armadas, no konfirma katak, kazu ne’e sira rona ona, no oras ne’e halo hela identifikasaun.
loading="lazy" />