Tékniku SAS monta tanki 4 iha Oesilo hodi atende krize bee moos

banner 120x600
79 Views

G—NEWS (OESILO) — Komunidade iha Aldeia Saben, ne’ebé lokaliza iha suku Bobemeto, sub-rejiaun Oe-Silo, Rejiaun Oecusse Ambeno, hato’o sira-nia preokupasaun kona-ba disponibilidade bee-moos. Problema ida-ne’e sai aat liután tanba posu sira ne’ebé eziste bele fornese de’it bee iha dada rua ka tolu ho durasaun oras ida to’o rua.

Maria Delfiana no Nofiana Colo, abitante na’in rua husi Aldeia Saben, preokupa tebes ho komunidade nia difikuldade atu hetan bee moos. Sira sente katak governu to’o oras ne’e ladún fó atensaun ba nesesidade báziku ne’e, maski povu, liuliu iha sira-nia área, hasoru difikuldade boot kona-ba asesu ba bee.

banner 325x300

Maria Delfiana Oki hateten, “ami ba kuru bee iha bee matan Oelbibona ne’e ho distansia oras ida ba mai, distansia dook, ita lori masa tolu de’it, sei barak ita forsa la iha atu hit tanba sae rai lolon, hanesan inan ida ita senti la di’ak tanba hare labarik ki’ik oan ita soe hela uma hodi preokupa ba kuru bee mos iha dook hodi mai tein, masa tolu ne’e, ida ita hemu, ida ita tein no ida ita fase bikan no ami haris no fase ropa iha mota kuaze oras rua hanesan ne’e. Kona-ba bee mos ne’e, ami enfrente durante iha tempu Indonézia to’o agora tanba ne’e husu governu tau matan ami ba.”

Nofiana Colo mos hatutan tan, “ babain tuku 06:00 dadersan ami tenki lori masa mamuk rua ba kuru bee matan iha Oelbibona hafoin ba eskola, ami la’o durante oras ida, ba mai, atu foti masa barak maibé distansia dook ami labele lori”

Aleinde ne’e, Domingas Elu nu’udar abitante ida seluk hateten katak sira tenke la’o oras rua ba mota hodi kuru bee. Bee ne’e uza ba nesesidade oioin loroloron nian, inklui hemu, fase roupa, no hariis.

Ami baibain ba kuru bee mos iha mota maka foin uza hodi tein maibé fase ropa no haris ami ba mota de’it. Iha tempu bailoron bikan no kanuru sira ami ba fase iha mota hotu, ami ba mota ba mai han oras rua, iha ne’e ami feto ho mane ba kuru bee hotu, se mane la serbisu mas serbisu ami feto de’it mak ba kuru. Tempu udan Mota boot mos ami nafatin ba kuru, Ami lori masa 4 to’o lima, to’o fali uma senti kolen no kabas moras la halimar maibé paseinsia de’it tamba ita mak atu uza,” dehan Domingas Elu.

Hatan ba lamentasaun públiku, Xefe Aldeia Bobometo, Jose Labi Caet, admite katak fornesimentu bee moos iha aldeia Saben limitadu tebes. Tanba ne’e, nia afirma katak hadi’a fatin armazenamentu bee sai prioridade iha planu dezenvolvimentu tinan ida ne’e nian.

“Ha’u hanoin problema ba bee-moos ne’e, iha fatin-fatin maibé kona-ba Saben ne’e, bee araska tanba bee iha kraik maibé tinan ne’e ha’u tau ona ba planu nune’e rehabilita fila fali tanki sira abandona hodi nune’e sira bele asesu bee-moos “ Rekuñese Xefe suku bobometo Jose Labi Caet.

Entretantu, Diretór Água no Saneamentu, Yoseph Illu, esplika katak problema bee-moos iha Aldeia Saben relata kleur ona. Iha 2020, empreza fura ona bee no instala ona tanki bomba rua. Planu atu hadi’a fasilidade bee-moos iha Aldeia Saben kontinua la’o hela.

“Ha’u hanoin kona-ba problema bee-moos iha aldeia Saben ne’e sempre Jornalista fo sai bebeik,no hahú 2020 ita komesa halo perfurasaun iha Noelekat ho osan atus tolu liu dollares Amerikanu, no tanki bomba rua, nune’e iha 2023 kontinua halo tanki distribuisaun ida iha Saben, ida iha Oe-silo villa, tanki bomba ida iha Noelekat no tanki distribuisaun ida iha Tumin no Saben nian iha tinan kotuk ne’e haruka teknik sira semana ida loke dala ida nune’e sira asesu iha tempu bai loron”  Klarifika Director serbisu Bee no Saneamentu Yoseph Illu.

Aleinde ne’e, ekipa tékniku Água no Saneamentu mós instala ona tanki distribuisaun bee tolu no tanki bomba ida iha Aldeia Saben, Noelekat, no Tumin, ne’ebé hein katak bele ajuda ultrapasa problema menus bee-moos ne’ebé durante ne’e komunidade hasoru.

Jornalista       : Martinho Belo

Editór             : Amito Qonusere Araújo

relavante