G-NEWS (DILI) – Selebra Aniversariu ezistensia Forsa Armada Libertasaun Nasionál Timor-Leste (FALINTIL) ba dala 48 iha loron 20 Fulan Agostu 2023, F-FDTL nafatin banati tuir hakat tuir ain-fatin FALINTIL, hametin ita-nian unidade nasionál.
Portavós no Prezidente Komisaun Organizadóra ba Komemorasaun Aniversáriu FALINTIL, Capitão de Mar e Guerra João Silva, informa, komemorasaun ba ida ne’e, sei realiza seremónia ofisial iha fatin tolu la-hanesan.
Nia dehan, seremónia jerál hala’o iha Kuartel Jenerál F-FDTL ho Ministériu Defeza (MD) nian fatin iha área Fatuhada, Dili. Eventu espesífiku rua, ida mak hala’o iha Aldeia Odelgomo, Suku Aiasa, Postu Administrativu Bobonaro, Munisipiu Bobonaro, no ida tán mak, hala’o iha Suku Atelari, Postu Administrativu Laga, Munisipiu Baucau.
Nia esplika, razaun hili Odelgomo ho Atelari, hodi hala’o seremónia solene ne’e, ho objetivu atu fó hanoin fila-fali kona-bá fatin ba konsentrasaun FALINTIL sira nia iha 1999, ne’ebé konsideradu nu’udár fatin istóriku iha luta ba libertasaun nasionál.
“Hanesan ohin ha’u hatete katak, atu memoriza fila-fali konsentrasaun FALINTIL nian iha 1990, tanba istória ba nasaun ida ne’e importante, tanba istória ne’e hanesan abut ida ba rai ida, tanba ida ne’e, ita realiza iha fatin rua ne’e, Odelgomo ho Atelari,” dehan Capitão de Mar e Guerra João Silva informa ba jornalista sira iha konferénsia imprénsa iha Kuartel Jenerál Fatuhada, Dili, Segunda (07/08).
Tuir ajenda husi komisaun organizadóra, atividade ne’ebé realiza iha tersa, 08 fulan-agostu, halo abertura ba atividade la’o ain ka Marsa FALINTIL iha Suku Krarás, Postu Administrativu Viqueque Villa, Munisipiu Viqueque, no ensera iha Suku Kairui, Postu Administrativu Laleia, Munisipiu Manatutu iha loron sexta, 11 fulan-agostu tinan ne’e.
“Marsa FALINTIL ho objetivu katak, atu banati hahalok asuwa’in FALINTIL nian, hodi habo’ot ita-nia beran defende rai no povu atu sama tuir ain-fatin funu na’in sira-nian, koñese ó-nia rain no ó-nia emar sira,” informa nia.
Nune’e to’o iha loron 20 fulan-agostu sei realiza seremónia solene hasa’e Bandeira Nasionál nian, iha Kairui (Manatutu), Odelgomo (Bobonaro), tanba ne’e, Komandu F-FDTL liu husi komisaun organizadóra ba komemorasaun tinan 48 ezisténsia FALINTIL nian, husu povu Timor-Leste tomak, husi parte leste no oeste, hakat ba hodi partisipa direta eventu istóriku ne’e.
“Maluk Timor Oan sira hotu, no povu doben timor-leste hakarak partisipa iha atividade sira ne’e, ami konvida, para depois bele partisipa, tanba loron FALINTIL, loron povu nian, no loron Timoroan sira hotu nian, eventu sira ne’e, atu memorializa FALINTIL ninia lala’ok, durante tinan 24,” dehan nia.
Tanba ne’e iha selebrasaun aniversáriu FALINTIL nian ne’e, parte komandu F-FDTL sei halo mós promosaun ba membru na’in atus-ida-resin, husi Postu Cabo ba Segundu Sarjentu no ba iha Klasse Jenerais nian, sei iha faze diskusaun, tanba Kona-bá Klasse Coroneis, komandu sei iha promosaun ba ninia ofisial superior ida ba Coronel, no seluk ne’e, maioria iha Klasse Sub-Balternus.
La’os ne’e de’it, iha mós atividade jornada la’o ain husi universitáriu sira iha grupu Estudante Hadomi Natureza (ESHANA), hahú husi Maliana, to’o iha área sira ne’ebé mak definidu, sei iha mós desportiva Futsal ho karáter amigável, iha mós atividade trend motor haleu munisipiu, inklui rood rase mak realiza iha área Tasi-tolu, Dili.
Entertantu, aniversáriu FALINTIL nian ne’e iha tinan ne’e, hala’o ho tema jerál mak “Komemora esforsu eroiku hodi luta hametin identidade no nasionalizmu povu nian”. Tema espesífiku maka “sama tuir funu nain sira ain fatin maka kesi an ba ó nia rain no ó nia povu,” Hakotu nian.
Fontes Informação: Página Facebook Relação Informação Pública Falintil-Força Defesa de Timor-Leste
loading="lazy" />