G-NEWS (DILI) — Ema deskoñesidu tiru tama rezidénsia eis-Prezidente Repúblika, atual Prezidente Partidu FRETILIN Francisco Guterres Lú-Olo, iha oras kalan fahe malu nian hodi simu tinan foun 2025.
Tuir kronolójia akontesimentu, ne’ebé G-NEWS asesu iha kuarta-feira (01012025), liu husi Pájina ofisiál Francisco Guterres Lú olo, iha media sosiál Facebook katak, ema deskoñesidu aproveita fugetes nia tarutu, hodi tiru tama rezidénsia eis Prezidente Repúblika ne’e.
“Tebes duni, hori kalan iha O0:00h tinan fahe malu, ema desconhecido, aproveita foguetes nia tarutu, tiru kilat tama residência ex-PR no Presidente Fretilin Francisco Guterres Lú Olo ho intensaun at atu oho nia”, haktuir iha Pájina ofisiál Francisco Guterres Lú olo.
Kilat musan (bala real) ne’e fura husi kalen uma tun to’o kona meza nia vidru rahun hotu, besik loos tur fatin baibain Eis Prezidente Repúblika nian iha uma. Hafoin akontesimentu, seguransa pessoal Lú Olo nian, informa kedas ba ekipa konjunta kompostu husi Komandu PNTL no F-FDTL, Polísia Sientífika Investigasaun Kriminál (PCIC), Polísia Militár (PM), Intelijénsia militár no Polísia Forensik to’o kedas uma rezidênsia hodi halo observasaun direta no halo investigasaun kona-ba faktu ne’ebé akontese.
“Obrigado ba imi nia profissionalismo liu husi prátika nebe hatudo iha tempo nebe mosu perigo ba ema nia vida! Iha biban ida nee ha’u fo hatene mos ba seguransa pessoal ba Titulares Orgãos Soberania nian ga Ex-titulares nian atu hola atensaun no fo segurança diak ba ita nia nai ulun sira hotu-hotu. Obrigado ba atensaun no kontinuasaun Boas Entradas Tinan Foun 2025 ba ita hotu”, sira iha Pájina ofisiál Francisco Guterres Lú olo.
Ho informasaun ne’ebé fó sai iha Pájina ofisiál Francisco Guterres Lú olo nian iha facebook kona-ba akontesimentu ne’e, seidauk iha deklarasaun ofisial husi autoridade seguransa tanba sei iha prosesu investigasaun nia laran.
Informasaun ne’ebé fó sai iha Pájina ofisiál Francisco Guterres Lú olo, utilizador sosiál media facebook, besik atus hat mak fahe informasaun ne’e no ho komentáriu besik lima-nulu, no iha posibilidade númeru postajen informasaun ne’ebé fó sai, sei fahe tutan barak liu-tán.
Tanba ne’e, G-NEWS sei kontinua atu up_date informasaun refere.
Editor Testu : Amito Qonusere Araújo
loading="lazy" />