G-NEWS (DILI) – Primeiru-Ministru (PM), Kay Rala Xanana Gusmão hato’o parabéns ba Prabowo Subianto ne’ebé eleitu nu’udar Prezidente Eleitu Repúblika Indonézia (RI), periúdu 2024 to’o 2029.
“Lori Governu no Povu Timor-Leste nia naran, ha’u hato’o ha’u-nia parabéns ba Sua Exelénsia nia vitória nu’udar Prezidente Repúbliak Indonézia”, PM Xanana hateten liu hosi karta ofisiál ne’ebé haruka ba prezidente eleitu, iha tersa-feira liuba.
“Ita-nia vitória bo’ot iha eleisaun prezidensiál hatudu konfiansa ne’ebé povu Indonézia fó ba ita-nia lideransa no ita-nia vizaun ba ita-nia nasaun nia futuru. Ha’u fiar katak ho ita-nia matenke no esperiénsia, ita bo’ot sei sai Prezidente esesionál no sai líder signifikante iha rejionál no globál. Iha tempu agora, ho turbulénsia no mudansa iha relasaun internasionál, Indonézia dezempeña papél sentrál iha promosaun kooperasaun, toleránsia no pás. Ho ita-nia lideransa, Indonézia sei sai nasaun prinsipál poténsia ekonómika mundiál ida ne’ebé sei kontribui kresimentu ekonomia no prosperiedade iha rejiaun ne’e”, PM Xanana kontinua ko’alia liuhosi karta ofisiál.
PM Xanana kompromete, Timor-Leste no Indonézia mantein relasaun bilaterál, amizade no kooperasaun ida-ke forte.
“Hamutuk, ita nia nasaun kontinua sai modelu globál iha rekonsiliasaun no poder transformadór, diálogu no konfiansa. Indonézia nu’udar nasaun maiór parseiru komersiál Timor-Leste nian no iha lasu forte entre povu rai rua nune’e mos iha koperasaun iha area oi-oin”. PM Xanana.
“Ha’u hatene katak ita-nia lideransa, ita-nia relasaun bilaterál sei sai metin liután no ha’u sei haree ba oin atu serbisu hamutuk ho ita liu-liu ba interrese mutuál entre nasaun rua”.
“Prioridade nasionál ida ba nasaun rua mak finalizasaun ba fronteira marrítima tuir direitu internasionál no bazeia ba Konvensaun Nações Unidas kona-ba Direitu Tasi. Ida ne’e sei fó serteza mai ita kona-ba ita-nia direitu Soberanu no apoia dezenvolvimentu ekonòmia mariña no konservasaun”, Eis Prezidente Repúblka ne’e afirma.
Líder Karismátiku ne’e dejeza susesu bo’o ba Sua Exelénsia Prezidente Repúblika Eleitu durante mandatu.
“Dala ida tan, ha’u hato’o ha’u-nia parabéns ba vitória Sua Exelénsia nian iha Eleisaun Prezidensiál. Hato’o ha’u-nia dezeju bo’ot ba ita-nia susesu hanesan Prezidente ba futuru briliante iha ita-nia nasaun. Sua exelénsia Prezidente, favór aseita ida ne’e ba ha’u-nia konsiderasaun no ha’u-nia respeitu”, PM Xanana tenik.
Komisi Pemilihan Umum (KPU) fó sai rezultadu eleisaun prezidensiál Indonézia tinan 2024 iha loron tersa (20/03), ne’ebé hatudu katak kandidatu númeru 2 Prabowo Subianto no Gibran Rakabuming Raka, sai vensedór ho totál votu 96.214.691 hosi totál votu válidu 164.227.475 iha nasionál.
Editór : Amito Qonusere Araújo
loading="lazy" />