G—NEWS (DILI) — Eis Prezidente Repúblika Taur Matan Ruak halo deklarasaun maka’as ba jornalista sira iha edifísiu eskritóriu eis titular Farol Dili iha Kuarta-feira, 29 Janeiru 2025. Nia kritika maka’as polítika eviksaun ne’ebé durante ne’e hala’o hosi governu, konsidera asaun ne’e “kruél no dezumanu” hasoru nia povu.
“Eviksaun ne’e hanesan kruel desumanu. ita iha dalan rua para halo dezenvolvomenti sidade Dili. Ida, progresivu, neneik, prepara uluk kondisoens mak avansa, rua, radikal, hanesan agora ne’e”. dehan Taur Matan Ruak ho lian sériu.
Taur, ne’ebé uluk hala’o kna’ar nu’udar Primeiru-Ministru, esplika katak durante nia mandatu, nia prefere aprosimasaun ida ne’ebé progresivu. Aprosimasaun ida ne’e, nia dehan, fó prioridade ba preparasaun ne’ebé kle’an no neneik iha dezenvolvimentu sidade Dili, duke aprosimasaun ne’ebé lais, radikál ne’ebé bele fó impaktu negativu ba rezidente sira.
“Hau nia tempu, hanesan PM, hau hili ida nee, progresif. Avo nana nia tempu, hili sobu. Tanba saida mak. sobu, buat nebe ohin sai urjente, ba buat nebe uluk o haluhan halo”. Taur hatete, hodi deskreve diferensa filozófika entre aprosimasaun ida ne’ebé pasiénsia liu no ida ne’ebé lalais liu.
Liu tan, Taur Matan Ruak subliña katak, polítika sira ne’ebé governu hala’o ho lideransa Primeiru-Ministru Kay Rala Xanana Gusmão nu’udar desizaun ne’ebé radikál. Tuir Taur, Xanana foti pasu drástiku tanba governu anteriór konsidera la halo buat ida, tanba ne’e nia sente tenke atua lalais hodi halo mudansa loloos iha tempu ne’ebé limitadu.
“Tanba ne’e mak agora maka hanoin hetan mak hili radikal. Avo la iha ona tempu atu halo, agora tenke halo, ne’e lójika., tanba se ema foin sae ida, nia sei labele halo, nune’e avo hili radikal hodi sobu”, Eis PM Taur Matan Ruak, ko’alia ba G—NEWS.
Iha biban ne’ebá, Taur mós esplika ninia hanoin kona-ba papél governu nian. Nia fiar katak governu nia kna’ar prinsipál maka atu jere risku sira ne’ebé afeta ba bem-estar ninia povu no garante sidadaun sira-nia bem-estar. Ba Taur, despeju la’ós solusaun ida ne’ebé ideál, maibé nia admite katak polítika ne’e implementa tanba laiha pasu ruma ne’ebé foti iha tempu naruk nia laran.
“La iha nesesidade atu halo eviksaun, maibé ita halo tanba tinan barak ita la halo”, Taur esklarese.
Editor testu: Amito Qonusere Araújo