G-NEWS (DILI) – Uniaun Europeia (UE) halo ona transferensia osan hamutuk EUR 1,212,500 hodi suporta programa Nutrisaun iha Timor-Leste. Atribuisaun osan ida-ne’e hanesan tranferensia ba dala ikus iha projetu Parseria ba Hadia Nutrisaun iha Timor-Leste (PINTL , sigla Inglês), ne’ebé konklui ona iha 31 Dezembru 2023.
Tuir komunikadu imprensa ne’ebé G-News aseau, Sexta-feira (19012024) katak, ho pagamentu final ida ne’e, indika ona UE nia kontribuisaun hamutuk EUR 12,586,500 ba setór Nutrisaun nebe’e hala’o ona iha tinan lima nia laran.
“Apoiu UE nian ne’ebé implementa ho modalidade apoiu Orsamental, liuhosi kolaborasaun ho Diresaun Nutrisaun Ministériu Saúde nian, no komplementa ho apoiu hosi Fundu Nasoins Unidas ba Labarik ka UNICEF”, haktuir iha karta komunikadu imprensa.
Programa ne’e ho objetivu atu hamenus malnutrisaun iha Timor-Leste ho sustentável, hadi’ak nutrisaun populasaun nian, no espesífiku foka ba labarik sira ne’ebé hahú moris mai to’o labarik ho idade loron 1000.
Programa ne’e fó apoiu ba Ministériu Saúde iha implementasaun jerál Estratéjia Nasionál Nutrisaun nian, aliña ho prioridade nasionál Governu ne’ebé hatuir Planu Estratéjiku Dezenvolvimentu nian.
Aleinde ne’e, programa PINTL kontribui ba SDG 2 (hamlaha zero) no kontribui ba Planu Asaun Nasional Konsolidu ba Nutrisaun no Seguransa Ai-han ba tinan 2020-2030.
“Liuhosi PINTL ne’e, UE kontribui direitamente hodi koordena no armoniza asisténsia externa kona-ba nutrisaun iha Timor-Leste, no promove diálogu polítika kona-ba nutrisaun entre Governu Timor-Leste ho parte interesada sira iha seitor nutrisaun”, sita iha komunikadu imprensa.
UE halo pagamentu apoiu orsamentál bainhira Governu hatudu implementasaun iha área polítika no reforma públiku ne’ebé iha ligasaun ho nutrisaun, no atinjimentu tarjetu sira ne’ebé konkorda antes ona kona-ba jestaun finansas públikas no transparénsia iha aplikasaun orsamentu.
“UE prontu atu konsidera ba provizaun montante adisionál ho valór EUR 375,000,00 bainhira iha tempu badak nia laran UE simu informasaun adisional kona-ba realizasaun indikadóres balun programa nian hosi governu.
Maske projetu PINTL remata iha tinan 2023, maibé UE sei kontinua suporta setór nutrisaun iha Timor-Leste. Iha futuru, apoiu UE nian ne’ebé atu ajuda rezolve malnutrisaun sei hala’o liuhosi protesaun sosiál no ho envolvimentu setór oioin.
Editór Testu: Amito Qonusere Araújo
loading="lazy" />