“Ita reja ba Papa Francisco” Vatikanu: Amu-Papa agora toba di’ak, kontinua terapia iha Ospitál

G—NEWS (INTERNASIONÁL) — Papa Francisco tama iha ospitál iha loron-sesta ne’e hafoin nia moras bronkite ne’ebé durante semana ida sai aat liután.

Vatikanu hatete katak Papa Francisco toba di’ak durante kalan dahuluk ne’ebé hakmatek iha ospitál hafoin hetan tratamentu ba infesaun respiratóriu no hadeer hodi han no lee iha sábadu (2/15).

Papa Francisco, ho tinan 88, almosu iha loron-sábadu dadeer no lee jornál enkuantu kontinua nia terapia droga nian, hatete hosi porta-vós Matteo Bruni.

Papa Arjentinu ne’e tama iha Ospitál Gemelli, Roma, iha loron-sesta (14/2) hafoin bronkite ne’ebé nia sofre durante semana ida sai aat liután. Ne’e hanesan ba dala haat maka papa tama iha ospitál dezde nia eleisaun iha tinan 2013 no hamosu pergunta sira kona-ba nia saúde ne’ebé maka aumenta prekáriu.

Ezame inisiál hatudu katak nia sofre infesaun respiratóriu no isin-manas uitoan. Vatikanu kansela nia audiénsia sira pelumenus to’o Segunda (2/17).

Papa, ne’ebé iha tendénsia ba infesaun respiratóriu sira iha invernu, hetan diagnóstiku ho bronkite iha loron 06 Fevereiru, maibé kontinua halo audiénsia sira loron-loron iha nia kuartu hotel Vatikanu nian. Nia lidera ona misa ida iha liur iha fin de semana liubá no tuir audiénsia jerál ida iha loron-kuarta (12/2). Maibé, Amu-Papa entrega ninia diskursu ba adidu ida atu lee ho lian maka’as. Nia rekoñese katak nia iha difikuldade atu dada iis.

Papa hasai parte ida hosi nia pulmaun bainhira nia sei joven no luta hasoru problema saúde sira seluk.

Nia kólon ho sentímetru 33 hasai iha 2021 tanba estenoze kólon nian. Nia halo tan operasaun abdominál iha 2023 hodi hasai tesidu cicatriz intestinál no hadi’a hérnia ida. Nia uza kadeira-roda, walker, ka ai-tonka atu la’o hale’u nia apartamentu. Foin lalais ne’e, Amu-Papa monu dala rua, kanek iha nia liman no kidun.

Papa hetan tratamentu iha Ospitál Gemelli, iha Roma, iha ne’ebé papa sira iha kuartu privadu ida iha andár 10. Nia fó sai katak durante nia internamentu iha tinan 2023, nia hetan diagnóstiku ho “pneumonia aguda no grave, iha parte kraik pulmaun nian”.

Dalaruma bronkite bele hamosu pneumonia, infesaun ida ne’ebé klean liu, no grave liu iha saku ar pulmaun nian.