G-NEWS (DILI)— Vise-Ministra Asuntu ASEAN, Milena Rangel no Embaixadór Uniaun Europeia, Marc Fiedrich prezide hamutuk sorumutuk da-huluk Komité Diretivu nian kona-ba projetu “Suporta ba Integrasaun Rejional no Komérsiu iha Timor-Leste,” ne’ebé ho objetivu atu promove kreximentu ekonómiku sustentavel liuhosi komérsiu, apoia prosesu pos-adezaun ba OMK, no integrasaun rejionál Timor-Leste nian liuhosi ninia adezaun tomak ba ASEAN no ninia adezaun ba UE-Akordu Parseria Ekonomika Pasífiku.
Reuniaun Komité Diretivu (Steering Commite Meeting) ne’e hala’o iha Salaun MNEK, segunda-feira (24062024).
Projetu ida ne’ebé finansia husi UE ho euro millaun tolu no durasaun tinan tolu ne’ebé mak implementa husi Sentru Komérsiu Internasional (Sigla inglés, ITC).
Vise-Ministra Asuntu ASEAN nian dirize implementasaun projetu ne’e nian hodi Governu Timor-Leste nia naran.
Komité Diretivu nia objetivu prinsipál atu fó apoiu no fó konsellu ba doadór, parseiru implementador no benefisiáriu sira no kompostu husi reprezentante sira husi Parlamentu, Governu no Setor Privadu hamutuk ho Uniaun Europeia no servisu husi ITC.
Iha eventu ne’e, Vise-Ministra Milena Rangel hateten, projetu sira-ne’e tenke na’in no lidera hosi Timor-Leste no tenke implementa ho sistema sira nasaun nian.
“Hau fiar katak projetu ne’e sei responde no materializa pedidu sira.
Nia mos hatudu tan katak “projetu ne’e nia objetivu sira sai nu’udar prioridade ba Governu, no ami iha komitmentu tomak atu hetan susesu sira.”
Vise-Ministra agradese ba Uniaun Europeia tanba kontinua fó apoiu no ITC ba ninia kompromisu dezde inísiu implementasaun projetu ne’e nian.
Embaixador Marc Friedrich hateten katak, “Uniaun Europeia iha ne’e atu asegura katak projetu ne’e tuir akordu ne’ebé asina ona entre UE no Governu Timor-Leste katak projetu ne’e nafatin aliña ho prioridade sira Governu Konstitusional IX nian”.
Nia ko’alia liután kona-ba papél membru sira husi Komité Diretivu nian hodi hatutan tan katak “Komité Diretivu ne’e importante tebes atu komprende oinsá projetu ne’e fó benefísiu ba ita-boot sira-nia organizasaun no ami konta ho ita-boot sira hodi fó komentáriu kona-ba implementasaun projetu ne’e to’o ohin loron no kona-ba nesesidade sira ba fulan hirak oin mai.”
Editór Testu : Amito Qonusere Araújo
loading="lazy" />