G-NEWS (DILI) – Sidadaun na’in tolu sona vítima Tome da Silva Babo iha área aldeia Mantubian Suku Lisadila postu Maubara munisípiu Likisa, iha Domingu (29102023), iha tuku sanolu kalan oras Timor Leste.
Ba G-News, Segunda-feira (30102023), Vítima Tome da Silva Babo konta kronolójia katak, antes kazu ne’e akontese, nia parte ba soe bee iha liur, hafoin ema na’in tolu tuir nia hodi halo asaun, ikus mai sona nia, hodi rezulta nia tenke mai halo tratamentu iha Ospital Likisa, no halo kedan transferênsia mai Ospital Nasional Guido Valadares, Dili (HNGV), iha segunda-feira (30102203) dáder ne’e.
“Mumentu ne’e festa kazamentu ida iha ne’ebá, akontese iha jam-11, ha’u sai ba soe bee mak sira mós tuir ba. Ha’u soe bee hotu fila mai, sira simu kedas ha’u, ne’ebé ami baku malu tiha, ida kaer, ida sona, sona primeiru iha kabas, liman, pois ha’u halai mak sona tuir ha’u nia kotuk laran parte liman loos”, vítima konta tuir ba G-News.
Vítima ne’e konta tuir tán katak, mumentu ne’e sira na’in tolu (Autor) ho kondisaun lanu, no vítima rasik ho kondisaun normal,
“Mumentu ne’e sira na’in tolu ho kondisaun lanu, ha’u matan moos, sona ha’u nia kabas mak ha’u baku sai, se lae kona ha’u nia hirus matan”, nia esplika tán hodi relembra hikas akontesimentu refere.
Bainhira kazu ne’e akontese, sidadaun sira husu apoiu hodi transfere vítima mai ospital Likisa hodi hetan tratamentu, hafoin ne’e mak vítima fó deklarasaun ba Polísia iha ospital Likisa.
Entertantu, vítima ho nia família husu ba autoridade seguransa atu kaptura suspeitu na’in-tolu ne’ebé halo asaun ne’e, no husu atu prosesa kazu ne’e tuir dalan legal.
“Tuir vítima ne’e katak, nia la iha problema ho autor sira. Vítima ho nia família hakarak atu kazu ne’e tenke prosesa ba oin tuir dalan legál”.
Médiku sira iha Ospital Nasionál halo ona tratamentu intensivu, no suku vítima nia kanek iha kotuk laran parte liman loos ho pontu lima, kabas parte liman loos suku ba pontu hat, no kabas liman karuk parte oin suku ba pontu 9.
Vítima tama ospital Emerjênsia Ospital Nasional iha tuku 10 dáder, segunda-feira ne’e. Kazu ne’e akontese iha tuku 10 domingu fim-de-semana iha serimónia kazamentu ida iha Lisadila postu Maubara, munisípiu Likisa.
To’o informasaun ne’e fó sai, G-News seidauk hetan konfirmasaun hosi Komandu Polísia Munisíspiu Likisa.
Jornalista : Ekipa G-News
Editór Testu : Amito Qonusere Araújo
loading="lazy" />