G-NEWS (DILI) — Aplikante teste vaga Australia krítika makaas Sekretáriu Estadu Formasaun Professional no Empregu (SEFOPE) ninia promesa ne’ebé dehan atu públika lista naran ba rejultadu teste vaga online Australia, iha fulan-Juñu, maibé to’o oras ne’e seidauk realiza promesa ne’e.
Aplikante ida ko’alia ba G-NEWS, segunda-feira (01072024) iha dalan SEFOPE Caicoli katak, nia sente triste ho polítika Sekretáriu Estadu SEFOPE nian kona-ba publikasaun lista naran teste vaga online Australia, maibé to’o oras ne’e seidauk halo publikasaun, maske governante ne’e promete ona atu fó sai iha fuolan-Juñu tinan ne’e.
SEFOPE taka sai ona lista kandidatura traballador PALM Australia
“Agora ita tama ona fulan-Jullu, maibé ita hein de’it naran ne’e mós seidauk fó sai hela de’it. Señor Sekretáriu Estadu ne’e halo promesa de’it, foin lalais promete, ami sira aplika ne’e kontente atu hein ninia rejultadu, maibé to’o agora hein ba hein mós seidauk hela de’it ne’e”, aplikante inisial MF ko’alia ba G-NEWS.
Bainhira G-NEWS husu kona-ba ninia identidade loloos, MF ne’e lakohi atu ko’alia sai tanba tauk ho ekipa juri SEFOPE identifika ho krítika iha mídia ne’e bele afeta ba ninia aplikasaun.
“Maun, ha’u lakohi atu ko’alia ha’u nia naran, tau de’it inisial ka lalika tau naran mós di’ak, tanba ekipa selesaun SEFOPE bele identifika, ha’u nia naran bele hasai, ne’e ita lakon boot, tanba agora buat hotu polítika hotu, ne’ebé naran lalika tau mós di’ak”, MF fó rajaun kona-ba ne’e.
Rezultadu teste vaga online Australia sei públika iha fulan-Juñu
Aplikante feto ida, Martinha ko’alia ba G-NEWS katak, durante informasaun ne’ebé fó sai iha mídia kona-ba publikasaun lista teste vaga online Australia, maibé to’o oras ne’e seidauk fó sai.
“Durante ne’e ami hein hela maibé seidauk fó sai, dehan iha fulan-Juñu. Kuandu seidauk fó sai, entaun governu tenke ko’alia fali katak, seidauk bele publika tanba iha fallansu oituan, ko’alia hanesan ne’e bele hela, maibé informasaun ami hein ba hein la iha rejultadu”, Martinha esplika kona-ba ne’e.
Joaninha Gomes, hosi munísipiu Baucau, akompaña nia bin ne’ebé tuir teste vaga Australia, ko’alia ba G-NEWS iha SEFOPE Caicoli Segunda-feira (01072024) katak, nia ho nia bin mai haree informasaun kona-ba rejultadu teste vaga Australia, maibé seidauk iha informasaun.
“Ha’u ho bin mai haree rejultadu teste vaga Australia nian maibé seidauk iha rejultadu”, Joaninha Gomes ko’alia ba G-NEWS.
“Ita nu’udar sidadaun, ita hein de’it rejultadu, karik ema barak ne’e mak seidauk fó sai, ita espera katak, loron ruma fó sai, maibé importante mak governu tenke fó sai”, Joaninha.
Mariazinha, hela iha Fatuhada, ko’alia ba G-NEWS katak, nia mós durante ne’e hein de’it naran hosi teste vaga Australia nian, maibé to’o oras ne’e seidauk fó sai.
Eis Jornalista sai traballador iha Korea “osan balun halo lia”
“Ita hein de’it maun, naran katak loron rum abele fó sai. Ha’u check hela de’it tanba governu dehan iha fulan-Juñu ne’e fó sai tiha ona, maibé agora iha ona fulan-Jullu mós seidauk taka sai”, nia haktuir iha Colmera, depois fila hosi edifisiu SEFOPE Caicoli, segunda-feira (01072024).
Antes ne’e, iha loron 14 fulan-Maiu tinan 2024, iha ótel Timor, Sekretáriu Estadu Formasaun Professional no Empregu (SEFOPE), Rogerio Araújo Mendonça promete ba jornalista sira, hafoin lansa serimónia formasaun traballador nian katak, governu sei anúnsia ba públiku kona-ba rezultadu teste vaga online Australia nian, iha fulan juñu tinan ne’e.
Sekretáriu Estadu ne’e esplika, SEFOPE sei servisu hamutuk ho governu Australia, liuhosi departamentu Departamentu Relasaun Exterior no Komérsiu (DFAT – Department of Foreign Affairs and Trade_singla Inglesh) hodi halo anúnsia ofisial tuir kalendáriu ne’ebé iha.
“Kona-ba vaga online, ami hatete ona katak, ami nia ekipa sei servisu hamutuk ho DEFAT liuhosi PLF nune’e sei públika sai rezultadu ne’e iha fulan Juñu tinan ne’e”.
Governante ne’e haktuir, SEFOPE servisu ho transparansia hodi garante kualidade, hodi nune’e ema hotu sente katak oportunidade ba timoroan hanesan, no sei la haree ba kór partidu, maibe konsidera nu’udar timoroan de’it.
“Hau hatete ba públiku katak, hotu-hotu hosi munisípiu Dili to’o RAEOA ne’ebé partisipa ba vaga ne’e, labele tauk no laran taridu katak, sei hamosu uza partidu, ne’e la akontese tanba ita mesak timoroan hotu ne’ebé iha direitu hodi hetan oportunidade ida ne’e”, haktuir Sekretáriu Estadu ne’e.
Rogerio Araújo Mendonça afirma tán, governu sei la haree traballador nia kór partidu polítiku.
Traballador iha Australia labele halai hosi Sistema
“Partidu polítika ne’e buat ketak ida ne’ebé tinan-5 mak foin hasoru malu, maibé hanesan timoroan bele asesu servisu hotu-hotu tuir nia kapasidade no abilidade”, Haktuir Rogeiro
Entertantu, kandidatura ba vaga online Australia ne’ebé sei públika iha tempu besik, hamutuk na’in-50.578, kompostu hosi feto hamutuk na’in-19.314 no mane hamutuk na’in-31.264.
To’o informasaun ne’e fó sai, G-NEWS seidauk hetan entrevista hosi SEFOPE kona-ba esplikasaun publikasaun lista refere.
Editór Testu : Amito Qonusere Araújo
loading="lazy" />