G-NEWS (DILI) – Liuhosi plenária Parlamentu Nasionál iha tersa-feira (31102023), Deputadu sira hosi Bankada CNRT ko’alia makaas atu halo subsitutisaun ona ba Prezidente Rádiu Televizaun Timor Leste (RTTL.EP) José António Belo “Taraleu”.
Rajaun deputadu sira hosi Bankada CNRT ko’alia ne’e tanba konsidera RTTL.EP sai fali opozisaun ba Governasaun atual, ne’ebé lídera hosi Primeiru Ministru Kay Rala Xanana Gusmão.
Deputadu Bankada CNRT Patrocínio Fernandes dos Reis, liuhosi nia intervensaun hateten, Mídia RTTL.EP iha responsabilidade atu halo balansu ba informasaun ba públiku.
“Mídia RTTL laos mídia opozisaun, labele assume papel hanesan opozisaun ba Governu, tanba ha’u observa dalabarak, mídia RTTL halo ninia kobertura ida, tenta para atu akomoda, krítika buat hotu-hotu ba Governu, maibé depois la tenta atu buka oinsa mak resposta, buka espasu oinsa mak Governu, ou sira seluk, ne’ebé bele iha balansu informasaun, ne’e par povu hotu-hotu bele sente katak iha balansa de informasaun. Ne’e responsabilidade mídia RTTL nian, ne’ebé ha’u hanoin RTTL tenke haree ida ne’e, bolu atensaun mós ba Sekretária Estadu Komunikasaun Sosiál atu haree assuntu ida ne’e”, Patrocínio ko’alia asuntu ne’e.
“Mídia RTTL iha nia responsabilidade atu halo edukasaun, fó balansu informasaun ba povu tomak hanesan papel mídia RTTL nian”, nia kontinua
Deputada Cedelizia Faria dos Santos mós kestiona kona-ba ne’e. Nia hateten, durante ne’e RTTL ninia notísia la iha ekilibriu.
“Ikus-ikus ne’e, ita haree notísia ne’ebé sai hosi RTTL kuaze la iha ekilibriu. Ha’u fó ezemplu ida de’it mak foin dadauk ita nia maluk na’in tolu mai iha Parlamentu, mai ko’alia dehan katak sira reprejenta Povu Oecusse tomak. Iha entrevista ida iha RTTL, señor ne’e hatete at loos deputada Bankada hosi bankada CNRT iha ninia entrevista, maibé la iha Jornalista atu entrevista fila fali Deputada ne’e atu crosscheck iha informasaun ne’e, ita husik loos ema ida mai trata deputada ida iha mídia konforme nia hakarak, ida ne’e oinsa mak ida ne’e”, Cedelizia ko’alia nia intervensaun polítika ne’e iha nia plenária Parlamentar.
Cedelizia Faria dos Santos husu ba governu, liu-liu Sekretária Estadu Komunikasaun Sosiál (SEKOMS) atu tau atensaun asuntu ne’e, no husu atu halo ona substituisaun ho lideransa foun.
“Tanba ne’e mak ha’u mós konkorda, ha’u husu ba señro Vise Ministru, atu koordena ho señor Sekretária Estadu Komunikasaun Sosiál atu haree lideransa sira iha ne’ebá, kuandu buat ne’e la loos ona, di’ak liu ita halo avansa ho lideransa foun, labele mantein buat sira ne’ebé atu halo baralla instituisaun Governu nian”, deputada ne’e haktuir.
Hatan ba ne’e, Vise Ministru Assuntus Parlamentar Aderito Hugo katak, governu la halo imediata ezonerasaun ou saida ba kargu xefia sira tanba Nonu Governu la kaer prinsípiu ida ne’e, desde nia hahú nia mandatu, haree lai ho konkreta iha terrenu, oinsa dezempeñu Timoroan feto-mane ne’ebé-ke ezerse sira nia kna’ar hetan konfiansa lídera entidade sira ne’e.
“Em-prinsípiu, RTTL ho mós Tatoli mak ajensia notisioza ne’ebé-ke Estadu nian, tuir loloos kaer loos prinsípiu sira imparsialidade, neutralidade par fó balansu ba notísia ne’ebé ke iha, kompara ho orgaun mídia privadu sira”, Aderito Hugo fó resposta kona-ba ne’e.
Alende ne’e, Vise Ministru ba assuntu Parlamentar Aderito Hugo mós aseita ho intervensaun polítika deputadu sira nian, no governu sei tau atensaun kona-ba papel mídia estatal nian.
“Ami mós rejista faktus balu katak, ajenda debate balun halo orjenti de’it, nein halo audiensi ho membru governu sira ne’e par depois iha tempu ka lae, loron ida ne’e ha’u fiksa bele mai ka lae, la interesse, haruka de’it karta, ne’in telephone, nein iha kontaktu ida par tau de’it membru governu aban oras hanesan ne’e tenke ba ona, ne’e la professional, servisu tenke professional, tanba membru governu sira iha sira nia ajenda rasik servisu. RTTL tenke mai husu uluk dehan katak Governu, aban ami halo ajenda, bele ka lae, membru govenru bele mai ka lae, sira la husu ida ne’e, konvoka i haruka de’it karta mai, nein ema ida kontaktu katak Ministru iha tempu ka lae”, Aderito Hugo esplika.
“Situasaun sira ne’e mós ami observa, oinsa profesionalismu sira iha mídia sira Estatal nian hanesan RTTL ho Tatoli. Ita hakarak sira nia imparsialidade, la iha liu intensaun atu tau iha RTTL ho Tatoli ne’e ho Bandeira partidu ida nian, iha RTTL ho Tatoli ninia kakuluk, pelu-kontrariu hakarak iha sira nia profesionalismu, imparsialidade, tanba ne’e mak nono governu tama la hanoin atu ezonera imediata, hanesan akontese iha tempu sira pasadu, tanba fiar mós ba sira Timor nia oan”, governante ne’e hakotu.
To’o informasaun ne’e fó sai, G-News tenta atu halo konfirmasaun ho Prezidente RTTL.EP José António Belo “Taraleu” maibé seidauk iha komunikasaun.
Jornalista : Ekipa G-News
Editór Testu : Amito Qonusere Araújo
loading="lazy" />