Bazeia bá rezolusaun, PNTL Dili bandu sidadaun hala’o Atividade Desportu

G-RTV.Com (Dili) : Guvernu da-VIII ne’ebé lidera husi Primeiru Ministru Taur Matan Ruak iha loron 26 fulan Agustu 2021 deside hodi inpoen Konfinamentu Domisiliáriu Jerál (KDJ) ba populasaun iha territóriu munisípiu Dili hahu iha loron 27 fulan ida ne’e to’o loron 2 fulan Setembru tambá númeru kazu Covid-19 iha Dili kontinua ás no iha ameansa bo’ot ba Covid-19 ho nia variante delta.

KDJ ne’e obriga sidadaun sira ne’ebé iha munisípiu Dili tenke hela iha uma de’it, taka atividade negósiu ne’ebé la iha relasaun ho nessesidade báziku no taka atividade desportu iha grupu inklui indivídu no atividade sira seluk ne’ebé halibur ema barak.

Ho desijaun ne’e, Polísia Nasionál Timor Leste liu husi Komandu Munisípiu Dili (KMD) ne’ebé responsabilija seguransa iha territóriu munisípiu Dili iha loron dahuluk nian, kontinua hala’o patrollamentu ba atividade iha kapitál Dili atu sidadaun sira bele kumpri hodi prevene-án husi Covid-19.

‘’ Bazeia ba rezolusaun númeru 15/2021 iha loron 26 fulan Agustu, inpoen KDJ bá munisípiu dili, ekipa konjuntu ne’ebé kompostu husi tránzitu, forsa rezerva, polísia komunitária, patrolla eskuadra sira implementa rezolusaun ne’e hodi informa bá komunidade sira inklui bá loja na’in no vendedór sira atu kumpri regra KDJ nian, bá sidadaun sira ne’ebé la kumpri ita sei bolu mai iha komandu atu prossesa tuir Lei’’. Tenik Super. Xefe polísia, Henrique da Costa bainhira remata atividade patrullamentu, Sexta ne’e.

Komandante ne’e, infoma moos, atividade desportu durante ezisténsia KDJ iha Dili, sei taka totálmente hodi evita ema halibur malu barak tuir rezolusaun haruka.

‘’Atividade desportu bandu totál (Gurpu no indivídu), ne’e tuir rezolusaun ne’ebé mak iha, la’ós PNTL mak deside’’. Esplika Henrique.

Tuir observasaun jornalista G-RTV.com ne’ebé akompaña ekipa konjuntu iha terrenu nota katak sidadaun barak seiduak kumpri regra KDJ inklui vendedór ‘’obralan’’ no loja sira ne’ebé la fa’an nessesidade báziku, PNTL Dili bolu atensaun no haruka taka provizóriu durante KDJ sei implementa.

Iha terrenu, nota moos katak loja xeneza sira konsidera ‘’bosok’’ ekipa PNTL nia matan tambá antes ne’e loja xineza hirak ne’e la fa’an nessesidade báziku, maibé tambá KDJ iha horseik, ohin sira aproveita fa’an nessesidade báziku maske ho de’it %5 no sasan iha loja laran %95 la’ós sasan nessesidade báziku maibé fa’an ropa, brinkeidus no seluk tan atu nune’e loja hirak ne’e bele loke nafatin.

Jornalista : Arménio.

Editór : Ekipa G-RTV.