G-NEWS (DILI) – Susesu iha edukasaun nu’udar pasu ida atinji mehi iha moris loron-loron nian. Estevão Carvalheira, graduadu iha Universidade Nasionál Timor Lorosa’e (UNTL) iha Fakuldade Engenharia Siência no Teknolojia, ho Departamentu Engenharia Sívil, ho títulu Lisensiatura.
Ninia esforsu tomak iha nível akadémika importante tebes. Ho teória ne’ebé nia estuda iha edukasaun formál, iha duni rejultadu diak, tanba Estevão dadauk ne’e sai ona ekipa tékniku ida hodi observa, fiskaliza konstrusaun sívil sira ba dezenvolvimentu nasionál.
Bainhira gradua hosi UNTL, Estevão haksolok tebes, tanba nia mehi atinji duni, maibé prosesu skra ne’e hotu enfrenta difikuldade oi-oin, maibé difikuldade ne’e la hamate ninia vontade.
“Ha’u sente kontente tanba durante ha’u hahú vida akedémiku hasoru dezafius oin-oin durante tinan 5 nia laran, maibé la hami’is ha’u nia vontade to’o ha’u remata iha UNTL”, Estevão konta nia esperiênsia.
Estevão nia matenek ne’ebé hetan iha nível akadémika, Nia sei implementa iha prátika. Nia sei habelar matenek ne’ebé, liuhosi ninia kontribuisaun ba servisu ne’ebé durante ne’e nia halo.
“Ha’u espera katak, ha’u sei habelar ha’u nia konhesimentu ou abilidade ne’ebé ha’u hetan iha UNTL no Fakuldade Engenharia Siência Tecnolójia, Departamentu Engenharia sívil, sei halo kontribuisaun liuhosi Dezenvolvimentu infra-estrutura hanesan building, Estrada no seluk tán ne’ebé iha Rai doben Timor Leste”, Nia afirma tán.
“Tuir ha’u nia hatene katak, númeru dezempregu sae iha ita nia rai doben Timor Leste tanba Estadu seidauk tau atensaun másimu hodi kria kampu Traballu iha ita nia rai rasik, tanba ne’e joven barak hosik hela nia rai rasik hodi ba buka servisu iha rai liur hodi sustenta nesesidade família nian”.
Relasiona ho númeru dezempregu ne’e kontinua aumenta, maske Institutu superior sira produs lisensiatura barak, maibé barak sai ba rai-liur, tanba Governu la kria kondisaun diak, la aumenta saláriu. Situasaun sira ne’e sai difikuldade ida ba timoroan tomak.
“Tuir ha’u observasaun jerál katak, Estadu presiza kria kampu traballu ba joven sira liu-liu iha área oin-oin ne’ebé mak iha. Depois bele hasae saláriu mínimu hodi nune’e bele garante hodi sustenta nesesidade família nian”.
Estevão Carvalheira, husu ba Governu atúal ka Governu foun mai tán atu kria kampu Traballu nune’e hamenus dezempregu iha rai laran.
Ho esforsu no luta ba edukasaun ne’ebé Estevão hakat liu, hanesan esperiensia ida ne’ebé nia sente ona katak, afinál edukasaun ne’e importante. Tanba ne’e, nia husu ba foinsa’e sira atu fó prioridade ba edukasaun nu’udar xave ba susesu moris.
“Ha’u nia rekomendasaun ba joven no estudante sira katak, nafatin esforsu no iha vontade hodi eskola tanba ita joven mak futuru ba Nasaun, ba joven sira katak Hakribi violénsia hodi kria paz no estabilidade iha ita nia rai”.
Jornalista : Ekipa G-News
Editór Testu : Amito Qonusere Araújo
loading="lazy" />