G-NEWS (Dili)- Liuhosi Konferénsia Imprensa hosi Lao hamutuk, iha Edifísiu Bebora Dili, Kuarta-Feira (19/10/2022) ne’e, Lao Hamutuk halo ánaliza kona-ba Proposta Orsamentu Estadu tinan 2023 ne’ebé Ignora Realidade moris povu nian.
Realidade situasun finansiamentu estadu iha perigu nian laran, no La’o Hamutuk fó ona avizu iha tinan barak nia laran. Iha proposta OJE 2023, Governu aprezenta senáriu ida hodi prolonga vida útil husi fundu petróleu to’oo 2045. Signifika sei iha oportunidade boot ba Governu atu diversifika ekonómia hodi hadia krize ne’ebé bele mosu, bainhira hasoru rai naruk Fiskal (Fiscal Cliff) kuandu fundu petrolíferu mamuk ona, bele akontese iha tinan 2034 tuir predisaun Ministériu finansas nian.
Tuir modelu sustentavel liu ida ne’ebé Governu aprezenta iha livru relatóriu proposta OJE 2023, atu prolonga fundu Petroliferu to’o 2045, presiza redus despeza kada tinan 3% to’o 2034. Maibé iha tabela balun iha livru OJE hatudu despeza OJE inklui levantamentu fundu Petróleo sei sa’e kada tinan to’o 2027. Nune’e Lao Hamutuk hanoin katak, governu rekoñese nasaun ne’e iha perigu ba monu iha rai naruk Fiskal, maibé kontinua la fó importánsia.
La’o Hamutuk mós observa, katak projesaun jerál ne’ebé Governu konsege fornese la iha konsisténsia, no sujere atu fornese ba Parlamentu Nasionál no públiku projesaun lolos kona-ba despeza Globál, no kustu ba kada programa tinan haat ba oin, atu ajuda kada membru Parlamentu Nasionál atu foti desizaun matenek.
Iha Submisaun ba PN, La’o Hamutuk nota katak, agora dadauk Timor-Leste depende de’it ona ba investimentu Fundu Petroliferu iha merkadu finanseiru Internasional, ne’ebé kuaze sofre ka lakon ona Biliaun $ 2 resin iha tinan ne’e.
Livru OJE falta atu deskreve ho lolos risku sira, no senáriu sira kona-ba fundu Petrolíferu kontinua asume retornu 4.1% ba futuru, no falta atu konsidera posiblidade ba retornu investimentu negativu ka ki’ik ba futuru.
Orsamentu ne’e rasik tenke ho transparénsia no Akontablidade hodi kontinua sai prioridade iha Governasaun no estadu ida ne’e. La’o hamutuk observa, frakeza balun iha implementasaun transparensia iha prosesu orsamental ne’e.
Tuir Koordenador La’o Hamutuk Celestinho Gusmão Pereira hateten Sub-Misaun ne’ebé fó ba parlamentu Nasional di’ak liu kansela, no lalika avansa iha parlamentu Nasionál.
“projetu sira ne’ebé seidauk iha serteja ka fó benefísiu ba povu Timor no ajuda atu redus problema estrutural ne’ebé ita nia povu no ita nia rai infrenta di’ak liu lalika avansa, tanba realidade sira ne’ebé halo exekusaun iha pasadu la iha serteja tanba tinan oin iha eleisaun ne’ebé projetu bo’ot sira ne’ebé seidauk iha estudu ka analiza klean ami sujere lalika avansa kedas, deputadu sira iha parlamentu nasionál iha autoridade soberana atu diskuti no avalia klean liu ho governu iha posiblidade tanba parlamentu nasional iha kbiit polítiku atu rejeita ka kansela proposta balun husi governu”
Sosiedade Sivil senti Triste tebes tamba la hetan oportunidade atu fó testemuña iha audensia ne’ebé komisaun C PN realiza. Lao Hamutuk hanoin katak, prosesu orsamentál sai forte liu ho partisipasaun husi sosiedade sivil, no enkoraja atu Parlamentu Nasionnál bele hadiak liu tan espasu ba públiku hodi fornese ánaliza no hariku liu tan ideia antes debate ho Governu.
La’o Hamutuk mós sujere ba Ministériu Finansas atu klarifika orsamentu FCLN, no tenke konsidera FCLN re-apropria husi 2022 ba OJE 2023 atu la halo konfuzaun ba públiku. Sira mós kestiona kona-ba kapasidade Governu atu realiza programa 275 ho kualidade, konsidera nivel ezekusaun iha passadu nomos realidade katak tinan oin membru Governu barak nomós sira nia Staf sei ba halo kampaña polítika. Di’ak liu fó prioridade ba programa ne’ebé realistíku tuir kbi’it no rekursu umanu ne’ebé iha atu garante duni ezekusaun no kualidade.
La’o Hamutuk nota katak alokasaun ba setór sira ne’ebé liga direitamente ba dezenvolvimentu rekursu umanu (Edukasaun, Saúde, Bee moos no Agrikultura) hetan de’it 16% husi OJE tomak. Nune’e sira ekoraja membru Parlamentu Nasionál sira atu diskute ho klean ho Governu durante debate Orsamentu.
Atu realiza orsamentu ne’ebé efikás, Lao Hamutuk sujere ba PN atu hametin fali prosesu valiasaun programa atu asegura duni benefísiu ba povu, no revee fali alokasaun orsamentu balun ne’ebé seiaduk iha evidensia kona-ba benefísiu.
Iha submisaun ne’e, La’o Hamutuk sujere rekomendasaun hitu ba Parlamentu no Governu atu hadi’ak liu tan OJE 2023 no prosesu orsamental.
Jornalista : Alves Pinto
Editór : Amito Qonusere Araújo
loading="lazy" />