Domingo Ramos fó hanoin mai ita oinsa Jesus tama iha cidade Jerusalem

Media Arquidiocese Dili

G-NEWS (DILI) – Domingo Ramos domingo ikus tempo Jezum nian nebé lori ita tama ona iha Semana Santa. Domingo Ramos fó hanoin mai ita oinsa Jesus tama iha cidade Jerusalem. Ohin iha Evangelho ita rona Jesus tama iha Jerusalem ema barak teb-tebes nebé simu nia hananu, haklalak kaer ramos hodi simu Nia hanesan liurai. Tanba Nia mai hanesan Liurai ema hotu-hotu haklalak haksolok tanba iha sira nia le’et liurai ida lao daudaun tama ba cidade Jerusalem.

Maibe Jesus nia apresentação iha Jerusalem, Nia lahatudu nia An nudar Liurai ida nebé hela iha Palácio bobo’ot, maibe liurai ida nebé Jesus apresenta An pa povo Judeu ne’e liurai ida nebé símples, liurai ida nebé hatene hadomi ema hotu-hotu no liurai ida nebé haraikan.

Hanesan mos ohin ita rona iha segunda Leitura Jesus Cristo Nia nudar Maromak Oan, Nudar Liurai maibe Nia la hatudu nia An nudar Maromak lolos, Nia la hatudu nia An hanesan liurai nebé lolos, maibe Nia nudar atan, atan ida nebé mai atu servi ba Maromak nia povo, atan ida nebé haraikan tebés, atan ida nebé halo tuir Nia Aman ninia hakarak.

Ita dehan Nia liurai, maibe Ninia hahalok sira lahatudu hanesan liurai, ita servi Nia hanesan liurai, maibe Ninia aparência, Ninia hahalok nia hatudu la hanesan liurai, maibe hanesan atan ita nebé simples no atan ida nebé laran luak tebés.

Maun-alin sarani doben sira, São Paulo mos afirma liu tan katak Jesus ida nebé povo Judeu sira simu iha Jerusalem hanesan liurai ne’e Nia Maromak Oan duni, Nia hatudu Ninia ilas niudar Maromak lolos, maibe buat ida nebé diferente mak Nia hatudu nia An nudar atan ida nebé mai hodi halo tuir de’it Ninia Aman ninia hakarak to’o mate. Buat ida nebé Jesus hatudu halo diferência ho liurai sira seluk mak Nia mai hanesan liurai ida nebé halibur ema hotu-hotu, haraikan hanesan atan no halo tuir Nia Aman nia hakarak to’o mate.

Maun alin doben sira Jesus fila fali ba cidade Jerusalem Nia hatene ona katak Ha’u sei mate iha cidade ne’e maibe liu tiha loron tolu Ha’u sei moris hias. Jesus mos hatene katak ema hirak nebé haklalak hodi simu Nia hodi dehan, ida nebé mai ona iha ami nia le’et Nia mak ami nia liurai liu deit loron balun sira hirak ne’e mos mak hakilar hodi dehan hedi Nia ba cruz.

Maun-alin sarani doben sira, ohin domingo de Ramos ne’e fó hanoin mai ita hotu atu hanoin ituan kona ba Jesus nia terus, mate no moris hias. Oras ne’e Nia lori hela cruz todan, Nia mai atu selu no kasu ita ema nia sala sira. Tanba ne’e, maun alin sarani doben sira, hateke ba Jesus nia terus no mate ida ne’e, ita mos husu ba ita nia an keta halo ba durante ita nia moris tomak ne’e ita nia hahalok sira halo todan cruz nebé Jesus dadaun lori hela. No ita mos atu hanoin ituan halo mos viagem ba ita ninia fuan. Ema matenek sira nebé que dehan ‘viagem ida nebé naruk teb-tebes iha mundo ne’e mak viagem ida nebé tama ba ema ida-idak nia fuan’. Husu ba ema ida-idak nia an, hateke ba ema ida-idak nia an nia la’o ona to’o iha nebé? Saida mak nia halao ona iha mundo ida ne’e-buat diak mak barak ou buat a’at mak barak.

Iha semana santa ida ne’e, ita koko atu hanoin ba iha ita nia salan sira hodi hateke ba Jesus nia terus no mate. Nia terus to’o mate tanba ita ema nia sala no atu kasu ita ema nia sala. Tanba ne’e ita haraik-an ba, ita hakasan-an ba atu halo decisão ruma nudar ema criatura ka ilas Maromak ninian. Se ita dala barak la’o sala dalan karik iha momento ida ne’e dehan ba ita nia-an para ho hahalok sira nebé a’at. Se ita nebé moris hela iha nakukun nia laran karik, ba domingo ida ne’e ba oin, ita sei hakasan hamriik husi nakukun ida ne’e nia laran. Sorti Jesus mate ba ita nia sala, selae karik ita nia salan ida ne’e aumenta ba bebeik no to’o ona iha Maromak nia futar Oin ita laiha razão atu hatan no halo defeza ba ita nia atitude a’at sira.

Maun-alin doben sira, Santo Agustinho ninia liafuan nebé que nia dehan; ita hotu nebé simu ona batismo, ita la’o iha mundo ida ne’e hanesan peregrino ida no to’o iha tempo ida ita sei para. Tanba ne’e molok atu to’o iha tempo final ida nebé ita sei para iha viagem ida ne’e nia laran ita buka atu halos ita nia dalan, hadia ita nia hahalok sira molok to’o iha ponto final.

Maun-alin sarani doben sira, tempo ne’e liu lais de’it, ita nia otas iha mundo ida ne’e mos lalais de’it, dader ita bele diak, maibe meiodia ita lahatene ita sei bele moris ka ou ita mate. Kalan ita descança maibe ita lahatene aban dader ita sei bele hader kalae. Tanba ne’e maun alin sarani doben sira ita hakasa-an ba atu hamriik husi ita nia sala sira, converte nudar ema sarani ema fiar nain. Ita mate karik, ita mate didiak, atu ita mate karik ita nia klamar hetan salvação no hetan fatin diak iha Maromak ninia Futar oin. Ita husu Maromak nia tulun no graça ba ita hotu-hotu atu tama ona iha semana Santa ida ne’e hare malu hanesan maun-alin, hadomi no respeito malu hanesan ema timoroan ida nebé iha lisan no hun ida, iha abut ida iha rai ida ne’e.

Ita tama dadauk ona iha Semana Santa, los duni dalaruma ita laran susar, ita tanis, ita sente terus, tanis no todan tanba problema oi-oin nebé ita hasoru no simu no koko iha ita nia moris lor-loron. Todan sira, terus sira ita sente lori it atu descobre liu tan Maromak iha ita nia moris. Hanesan Santo no santa sira dehan terus no todan sira ne’e atu purifica an hodi sai santo iha ita nia moris.

Amen..!