G-NEWS (RAEOA) – Protokolu Prezidente Autoridade RAEOA Aquito Roxaca Guterres rasta monu Jornalista destakadu Ajênsia Notisiozu TATOLI.IP Abilio Elo Nini, bainhira hala’o kobertura ba serimónia RAEOA ho TIMOR AID ne’ebé selebra akordu ba estabelesimentu muzeum Pais-Timor iha Oecusse.
Aleinde ne’e, protokolu ne’e mós tenta atu tuku tán Jornalista destakadu TATOLI.IP iha RAEOA bainhira Jornalista Abilio Elo Nini husu protokolu ne’e kona-ba rajaun rasta monu iha públiku nia oin.
Jornalista ne’e hakerek de’it, laos…..!!!
Tersa-feira (04062024), liuhosi via telefóne, Abilio Elo Nini ko’alia ba G-NEWS hodi esplika kona-ba kronolójia ne’ebé akontese entre protokolu PA-RAEOA Protokolu Aquito Roxaca Guterres ho Jornalista destakadu TATOLI.IP nian.
Kazu ne’e akontese iha tuku-5 lorokraik óras Timor Leste, iha área ótel Ambeno Oecusse nian.
“Ohin kan RAEOA ho Timor AID selebra akordu atu estabelese muzeum Pais-Timor iha Oecusse. Momentu PA RAEOA ho Timor AID ne’e, akompaña hosi PR no Vise Ministru MCIA iha kotuk. Agora ami atu hasai foto. Ha’u tur loos iha oin, ha’u nia kolega videographer hamrik, ha’u tur hein. Agora protokolu ne’e bisu-bisu iha kotuk dehan favor ida Jornalista sira dook….dook….dook hosi ne’e. Ha’u tur besik dehan labele. Nia mai kaer ha’u nia faru iha kotuk rasta ha’u to’o monu”.
“Momentu nia rasta ha’u monu ne’e, PR Horta haree hela ami”. Abilio Elo Nini haktuir ba G-NEWS.
“Ha’u hamriik atu see kamera ba nia ulun atu baku, mais eskoltu feto hosi PR Horta nian no RAEOA nian mak hakalma ami. Ne’e mak ha’u kontinua hasai foto, halo video”, Jornalista Abilio Elo Nini ko’alia ba G-NEWS.
Abilio Elo Nini esplika liu-tán katak, serimónia sei lao, protokolu refere ba hamriik iha ótel Ambeno nia oin, no bolu nia, nune’e sira na’in rua halo esplikasaun ba malu, ikus mai, protokolu Aquito Roxaca Guterres tenta atu tuku duni Jornalista ne’e.
“To’o hotu tiha, protokolu nia halai ona ba hamriik ótel Ambeno nia oin. Nia bolu ha’u, dehan “ó mai lai”, ha’u ba, nia esplika ha’u, ha’u ba hakilar nia, dehan; ó dook tiha, ó la hatene ha’u nia servisu, dook tiha, tanba ha’u hakilar makaas, PR mós rona, bainaka sira iha ótel laran ne’e fihir hotu mai ami tanba ami barullu iha kotuk, entaun eskoltu sira halai ba dehan, alin jornalista kalma lai tanba serimónia sei lao hela”, nia konta tuir ba G-NEWS.
Serimónia ne’e hotu tiha, sira sai ba liur, nune’e Jornalista Abilio atu husu ba protokolu ne’e hodi halo konfirmasaun loloos rajaun kona-ba rasta nia monu iha públiku
Otelio Ote: notifíka Jornalista bebeik ameasa Liberdade imprensa
“Ha’u buka nia, atu husu nia, dehan, maun ohin rasta ha’u ne’e kona-ba saída, agora eskoltu PA-RAEOA nian mai husu deskulpa maun tanba ohin ha’u haree maun monu be, ami nia kolega ne’e sala duni, ha’u dehan la buat ida, orsida ha’u sei buka nia; ha’u buka nia atu esplika, agora nia esplika ba ha’u kna’ar protokolu ne’e saída, nia defende an dehan loos. Ha’u dehan ita boot nia rasta ha’u ne’e mak sala, ita boot fuk mutin ona, ha’u mós fuk mutin ona, se ha’u rasta ita boot iha ema barak nia oin, ita boot moe ka lae”, Abilio esplika.
“Nia atu tuku ha’u mak kolega sira tahan ami”.
“Agora ida ne’e ha’u nia servisu, ó rasta ha’u kona-ba saida. Ha’u mós iha étika Jornalista nian. nia esplika tun-sae, lakleur nia atu tuku ha’u, ne’e mak ha’u dehan ó ba tuir tiha formasaun protokolu par ó hatene ó nia kna’ar, lae ó la hatene ami nia servisu. Nia dehan, pois mak ita buka malu. Ha’u dehan buka malu ba, ha’u nia servisu Jornalista loron-loron mak iha ne’e, pasti ha’u ba ita boot nia gabinete, ha’u sei ba kobertura atividade PA nian”, Jornalista destakadu TATOLI.IP ba G-NEWS.
Prezidente Tatoli.IP rekonhese sira nia notísia la iha kualidade
Relasiona ho kazu ne’e, Jornalista destakadu TATOLI.IP iha RAEOA Abilio Elo Nini sei hato’o keixa ba Asosiasaun Jornalista sira, nune’e bele prosesa kazu ne’e tuir dalan legal, tanba jornalista refere hala’o atividade jornalizmu, no uza hela atributu Ajênsia TATOLi.IP, tara hela ID Card, no uza kâmera.
To’o informasaun ne’e fó sai, G-NEWS seidauk halo konfirmasaun ho Prezidente Autoridade RAEOA Rogerio Tiago Lobato, no Asosiasaun Jornalista sira nian.
Editór Testu : Amito Qonusere Araújo
loading="lazy" />