G-NEWS (DILI) – Timoroan barak sente triste ho atuasaun membru Polísia nian ne’ebé kaptura edukador sira ne’ebé halo demontrasaun hasoru Ministra Edukasaun foin lalais ne’e.
Estudante akadémiku hosi IOB Ermundo Ximenes sente triste ho edukador sira ne’ebé hetan kastigu ona no hatais kamiza detidu hosi autoridade seguransa, tán de’it ejiji sira nia direitu.
“Nu’udar estudante akadémiku, sente triste ho asaun ne’ebé autoridade seguransa sira halo hasoru mestre sira. Ita sira ne’e eduka hahú hosi mestre sira. Sira laos ema kriminizu, no sira mós laos ema koruptor, ne’ebé tenke kastigu sira tán de’it sira ejiji sira nia direitu”, Ermundo ko’alia ba G-News ho triste, iha Pantai-Kelapa, tersa-feira (13022024).
Iha parte seluk, faan-na’in ida hosi merkadu Manleu Filomeno Soares ba G-News dehan, ho asaun ne’ebé edukador sira tanba Liberdade espresaun. Tuir nia, asaun ne’e hatudu katak durante ne’e edukador sira nia problema nunka rejolve.
“Mestre sira foin halo asaun de’it kaptura ona. Mestre sira ne’e kolen, sira hanorin estudante barak loos. Durante ne’e ita haree iha mídia, mestre sira nia kontratu ne’e problema, dehan balun kontratu la iha, maibé kontinua hanorin, pois sira nia saláriu mós ki’ik, no sira ejiji sira nia direitu, kaptura tán, eihhh pahhh, ita haree sira ita mak hanoin fali, pois sira mesak ferik-katuas, oan-na’in tán”, Filomeno haktuir ba G-News.
“Ita nia lei ne’e komik fali. Mestre sira ne’e ita haree hanesan fali pembantu. Nasaun seluk, liu-liu Japaun, sira nia Governu ne’e fó prioridade liu ba mestre sira, tanba produs ema matenek, Timor nian fali la iha, hamosu polémika, hapara sira nia kontratu, pois sira nia saláriu mós ki’ik tán, no sira eiji direitu, hetan atuasaun hosi polísia, ha’u hanoin Governu tenke haree ida ne’e”, hateten estudante UNITAL Carlos Pinheiro, ba G-News, iha Becora, tersa-feira (1302204).
Iha parte seluk, sidadaun ida ne’ebé tuir formasaun lian Inglesh iha Becora Jeronimo de Sousa husu ba sidadaun hotu, liu-liu estudante ensinu báziku to’o universitáriu sira, atu hamrik hotu hodi defende edukador sira ne’ebé hetan ona kastigu tán de’it ejiji direitu, no hakarak kontribui matenek ba timoroan sira liuhosi edukasaun.
“Di’ak liu estudante sira hosi territóriu nasionál hahú hosi eskola bázika to’o universitáriu sira, atu hamrik hotu hodi defende mestre sira ne’ebé hetan kartigu tán ejiji direitu. Ha’u pronto atu organiza, maibé kolega sira iha universidade mós tenke hamrik atu ita koopera. Se ita nonook, aban bainrua povu nia oan sira sofre ba edukasaun, no ema boot sira nia oan mak di’ak nafatin tanba sira eskola iha eskola internasional”, Jeronimo ko’alia lian makas, ba G-News kona-ba ne’e.
Estudante UNTL Mario Gomes apoiu atu estudante sira hosi ensinu bázika to’o universidade hamrik hodi fó solidariedade ba edukador sira ne’ebé hetan ona kastigu tán de’it ejiji direitu.
“Ha’u apoiu atu estudante sira iha territóriu Timor laran tomak, atu hamrik hodi defende professor sira ne’ebé foin lalais halo demonstrasaun hasoru Ministra Edukasaun, hodi ejiji sira nia direitu. Se povu nia oan la hamrik, entaun ne’e ameasa boot id aba setór edukasaun iha futuru, liu-liu eskola públiku sira, tanba ita hotu hatene katak, ema boot sira nia oan ne’e eskola iha rai-liur, no eskola internasionál sira, sira iha osan selu, bee ita nia alin sira, iha hotu eskola gratuita, maibé governu la kria kondisaun di’ak, entaun ne’e ameasa boot ba povu nia oan. Ita haree mestre sira hetan kaptura hosi polísia, ita sira ne’e lee hatene, ko’alia hatene, tanba sira nia esforsu, hahú uluk sei SD to’o SMA, ita labele nega sira, ha’u pronto atu apoiu, hamrik defende mestre sira”, Mario haktuir.
To’o informasaun ne’e fó sai, G-News seidauk hetan komentáriu ruma hosi Ministra Edukasaun.
Editór Testu : Amito Qonusere Araújo
loading="lazy" />