G-News (Quelicai) – Elisio Belo, ho tinan 18, tara-an iha aidak leten, iha tuku lima madrugada, Domingu (29102023), iha área Lalabou, Suku Macalaco postu Quelicai munisípiu Baucau.
Ba G-News, iha Quelicai, Aman ki’ik hosi matebian Arlindo Freitas konta kronolójia katak, nia hetan matebian Elisio tara-an iha aidak leten ho fiu ho kór matak iha nia kakorok, iha matebian nia uma kotuk.
“Orseik ha’u atu ba vota mak ha’u husik hela bibi maibé rua mak lakon tiha ne’e mak ohin tuku 5 madrugada atu ba haree maibé ha’u lao tun ba hare fali nia (Elisio). Ha’u koñese duni, ne’e ha’u nia oan maibé ha’u hanoin nia soe foer boot maibé derepente ha’u hare fiu kesi hela iha nia kakorok no tabele hela iha aidak leten, hafoin mak ha’u halai liu ba uma hodi fó hatene sira foin ami ba haree ne’e mak ami kontaktu kedas ba Polisia no Autoridade sira hodi mai hatun”, haktuir Arlindo Freitas.
Matebian Nia Maun Rasik Francisco Belo Afirma, nia ho ferik oan no oan hosi Seiçal liuhosi sentru votasaun hodi tuir vota, foin ba uma maibé matebian toba hela uma laran ho kondisaun di’ak no hase hela sira.
“Orseik hau ho ferik oan no oan mai hosi Seiçal ba liu sentru votasaun, tuir vota mak ami foin mai uma. Ami to’o iha uma, nia (Matebian) mak toba uma laran hase ami di’ak loos, no ami la nota nia atu sai hanesan ne’e (Tara–an) tanba la halo asaun ida depois kalan atu han mak ami foin buka entaun katuas ferik dehan nia baibain mai ne’e ba toba iha nia rian rudin no feton sira uma leten ne’e (viziñu) ne’ebé ami mos husik de’it la ba husu nia iha ne’ebá”, afirma Francisco Belo.
Tuir Nia, matebian nunka halo problema ho família uma laran ka ho viziñu sira maibé orseik nia kontaktu fali ho nia namorada mak ikus mai sai Hanesan ne’e.
Matebian nia aman Antonio Belo mó haktuir, ba G-News katak, durante ne’e matebian hahú nia estudu sempre halo tuir nia hakarak maibé atu mai tuir votasaun no finadu mak akontese fali nune’e.
“Ha’u nia oan ne’e durante nia ba eskola ne’e ha’u sempre halo tuir nia hakarak no nunka haluha nia presiza sira maibé tán de’it eleisaun suku no finadu mak nia mai estraga an (Tara an) fali hanesan ne’e pois orseik ami ba vota fila mai ne’e ami ko’alia halimar ho viziñu di’ak malu loos”, Aman Matebian António haktuir.
Komandante Polísia eskuadra Quelicai Inspetór Felix dos Santos konfirma, kazu tara-an iha Aldeia Defada’e la iha indikasaun ema mak oho, nune’e autoridade seguransa entrega ba família atu hala’o serimónia funeral.
” Ohin domingu (2910), ami simu informasaun hosi Ofisial Polísia Suku (OPS) Macalaco iha tuku 06:00 katak, sidadaun mane ida ho naran Elisio Belo, idade 18, tara–an iha aldeia Defada’e besik eskola Daitula nian. No informasaun hosi família katak nia la halo problema ho ema ruma no mós ema mós la halo problema ho nia. Orseik (28/10) nia ba partisipa eleisaun Xefe suco no Aldeia depois to’o kalan boot halai sai hosi uma to’o ohin dadersan, nia tara–an fatin refere no família sira simu mate isin katak la halo prosesu ida tanba la deskonfia ema ruma problema hasoru nia. Ne’ebé kazu ne’e ami hato’o relatóriu ba Ministériu Públiku (MP) sei rejista tuir lei ne’ebé vigora tanba MP mak na’in ba kazu Sira”, Inspetór Felix Dos Santos konfirma.
Matebian Elisio Belo, hanesan estudante iha Universidade de Dili (UNDIL) Semestre 2, iha Fakuldade Edukasaun. Matebian moris iha Macalaco, iha loron 23 fulan novembru tinan 2005, oan hosi António Belo no Carlota Teresinha Freitas.
Tuir dadus ne’ebé G-News asesu, iha fulan Outobru tinan ne’e, kazu tara an ne’ebé Polísia Eskuadra Postu Quelicai rejista hamutuk tolu kompostu hosi Suku Abo, suku Baguia no Suku Macalaco.
Jornalista : Asensio Belo
Editór Testu : Amito Qonusere Araújo
loading="lazy" />