G-NEWS (DILI) — Loron matebian ka loron finadu nu’udar kustume ba Katóliku sira iha Timor laran tomak, atu halibur hamutukatu vizita família matebian sira nia rate iha knua ida-idak ka Santa Krúz.
Carlos Ximenes, ne’ebé hala’o viajen ba munisípiu Baucau, ko’alia ba G-NEWS, Iha terminal Becora tersa-feira (29102024) katak, nia sei partisipa loron finadu hamutuk ho família.
“Ha’u ohin atu halo viajen ba foho, atu partisipa loron finadu ka loron matebian. Agora ha’u sei hein hela bis, maibé ha’u sei haree bis ida ne’ebé labele nakonu demais, tanba ita tauk bis tula passajsiru sira nakonu. Ita nia tauk ne’e mak lorom boot hanesan ne’e, kondotor la kontrola an, bele hetan asidente iha dalan”, tenik Carlos.
“Ita nia família hein hela ita iha uma. Tanba ne’e husu, kuandu ho transporte privadu no públiku, tenke la’o ho kuidadu no atensaun, nune’e asidente iha dalan. Kuandu la atensaun, família sira bele rona novidades ho triste”, Nia kontinua tán.
Iha terminal Tasitolu, komunidade ida Luis de Jesus, ko’alia ba G-NEWS tersa-feira (29102024), bainhira atu hala’o viajen ba munisípiu Ermera postu Hatulia, hateten, objetivu atu ba foho hodi selebra loron matebian ho família. Nia konsidera seguransa importante bainhira hala’o viajen ba munisípal.
“Agora ha’u hein hela kareta atu ba Ermera. Maibé sei nakonu hela. Atu ba foho hamutuk ho família hodi selebra loron matebian, iha loron 2 fulan-Novembru”.
“Ha’u husu ba públiku, liu-liu maluk sira ne’ebé hala’o viajen, atu halai neneik, labele ansi, tanba família hein hela iha uma. La’o mak kolen, deskansa, depois mak la’o fali. Loron hira ne’e, ita haree asidente barak, rejulta maluk balun heran todan, no balun lakon vida”, tenik Luis, ne’ebé ho ansi atu sae kareta hodi hala’o nia viajen ba Ermera.
Filomeno Smith, bainhira hala’o jinástiku iha área tasi ibun Fárol, ko’alia ba G-NEWS katak, nia sente triste ho transporte públiku ne’ebé hala’o operasaun hosi Dili ba munisípiu, halai ho velosidade makaas.
“Ha’u iha Dili ba loron loron matebian nian, maibé ita haree ita nia maluk sira ho transporte públiku sai vítima bebeik tanba motorista sira halai kareta la hanoin ba risku, maibé halai tuir sira nia gostu. Ita atu fó sala ba Polísia, ne’e ita hanoin sala tanba polísia fó xamada de’it, fó atensaun de’it, agora oha dalan ba foho, Polísia la fó eskolta, importante mak ita nia konsiensia”, Filomeno Smith, ko’alia ba G-News, segunda-feira (28102024) lorokraik.
Ermelinda Soares, hosi Maubara munisípiu Likisa, ko’alia ba G-NEWS iha tasitolu, bainhira ho transporte roda-tolu TUM-TUM ko’alia katak, nia sei ba mai viajen Dili no Likisa, tanba nia hala’o negósiu ki’ik. Maibé nia nafatin ko’alia ho motorista ne’ebé nia hameno ninia sasan atu kontinua la’o neneik, nune’e evita asidente iha dalan.
“Dili-Likisa besik malu hela, ne’ebé ba Ami Likisa ne’e di’ak hela. Maibé ita husu nafatin ba transporte públiku ka privadu atu la’ó neneik hodi nune’e ba ho kondisaun di’ak to’o hasoru família, no tempu fila-fali mai kontinua nia servisu hanesan bain-bain”, haktuir Ermelinda ba G-NEWS.
Estudante IOB Etelvina dos Santos, ko’alia ba G-NEWS iha Pantai-Kelapa, tersa-feira (29102024) katak, nia seidauk deside atu ba selebra loron matebian iha foho hamutuk ho família sira tanba nia sei halo preparasaun ba ninia matéria. Nia dehan maski loron matebian nia la ba, maibé orasaun ba matebian sira sei kontinua fó.
Estudante akadémiku ne’e husu ba públiku ne’ebé hala’o viajen ba foho atu kuidadu no atensaun nafatin, tanba kada tinan liu-liu loron matebian, sempre akontese asidente iha dalan.
“Ha’u mós husu ba Polísia Trânzitu atu kontinua kontrola transpoete públiku sira, liu-liu bus ne’ebé tula pasajeiru liu kapasidade, no husu mós atu fó atensaun ba motorista sira atu la’ó neneik, nune’e evita asidente iha dalan”.
“Tuir ha’u nia observasaun, ita haree iha mídia, bus barak mak halai sadik malu, duni malu, maibé sira la hatene katak, sira tula ema, la’ós tula animal iha laran. Ita haree sira halai tuir sira nia gostu, ne’e loron ruma bele fakar ema mate hotu, família lakon, nasaun lakon, tanba ne’e mak ita tenke kuidadu nafatin buat sira hanesan ne’e”, Etelvina hakotu nia dadalia ho G-NEWS.
Oras ne’e, estudante, servisu na’in sira, balun hala’o ona viajen husi Dili ba munisípiu ida-idak hodi selebra loron nasionál matebian nian ne’ebé sei monu iha loron 2 fulan-Novembru.
Editór Testu: Amito Qonusere Araújo
loading="lazy" />