G-NEWS (ATAÚRO) – Komandante Jeral PNTL halao vizita ofisial ba Komandu PNTL munisipiu Ataúro hodi haree no rona kondisaun no situasaun membru sira ne’ebé hala’o kna’ar iha munisípiu Ataúro hodi mantein Lei no Orden.
Komisáriu Jerál Polísia Henrique da Costa hato’o apresiasaun ba membru hirak ne’ebe maka halao seguransa ho masimu hodi mantein populasaun munisipiu Atauru moris iha paz no estabilidade nia laran, Nia hato’o asuntu ne’e iha Komandu PNTL munisipiu Atauro, sexta (01/03).
“Hakarak uza biban ida ne’e, hodi hato’o apresiasaun ba servisu tomak ne’ebe maka membru sira oferese durante tinan 2023 to’o ohin loron. Ita nia servisu hetan apresiasaun husi Prezidente Repúblika no Primeiru Ministru, nune’e hakarak uza biban ida ne’e hato’o diretamente ba imi kona–ba susesu ne’ebé maka ita hala’o durante tinan 2023 hodi hasoru eventu lubuk ida hanesan Eleisaun Parlamentar no Eleisaun Suku no buat hotu-hotu la’o di’ak, tanba ne’e Xefe Estadu no Xefe Governu hakarak apresia ba PNTL tomak”, dehan Komandante Jeral.
Buat ne’ebe maka husu mak asegura no tane as apresiasaun Na’i ulun sira hato’o, presiza atu halo di’ak liután, no presiza atu hadia buat ne’ebé avalia iha tinan 2023 ba kotuk halo seidauk di’ak.
Tuir dadus, iha tinan 2023, rejista de’it krime 10 no kazu asidente tráfiku 1, no rejista iha Sistema Manajementu Insidente annual (IMS-sigla ingles) rejista de’it kazu 7 ba Ataúro ninian no dalaruma kazu balu la rejista iha Sistema tanba problema eletrisidade no internet. Nune’e husu atu insidente no asidente hotu ne’ebé iha, presiza rejista dadus nasional, tanba ne’e tenke halo komunikasaun nafatin ho Xefe Departamentu Investigasaun Kriminal Nasional no Xefe Seksaun IMS nian atu nune’e bele cross check.
Komandante-Jerál mós orienta Komandante munisipiu ho nia membru sira atu nafatin halo sosializasaun no sensibilizasaun kona-ba regras Trânzitu oinsa prevene krime iha komunidade no eskola sira nune’e bele hatene no kompriende lalaok inplementasaun lei liuhosi atividade Polisiamentu Komunitária, reforsa patrullamentu lao ain hodi hakbesik an ba povu liuhosi atividade Polisiamentu Komunitaria no Edukasaun Trânzitu.
“Mantein komunidade sira informadu atu nune’e evita envolve iha krime no hala’o prátika atividade GAM/GAR ne’ebé governu suspende”, Komisáriu-Jerál Henrique da Costa esplika kona-ba ne’e.
Iha sorumutuk ho Estrutura Komandu PNTL Autoridade Administrativa Ataúro, Komandante-Jerál PNTL hato’o programa prioridade lima hanesan hadia jestaun institusional, haforsa Lejislasaun, kooperasaun Institusional, Hadia Atendementu Públiku no hametin Paz no Estabilidade Seguransa Interna.
Iha sorumutuk ho estrutura Komandu munisipiu no membru sira, Komandante munisípiu Ataúro Interinu hato’o difikuldade lubuk ida ne’ebé sira enfrenta hanesan fatin servisu laiha, Komandu munisipiu hamutuk de’it ho eskuadra hodi responde ba polítika governu nian maibé la haree ba kondisaun no difikuldade asesu ba estrada no transporte.
Politika Komandu nian hafoin koloka tia komandante Superior sira Komandu mos hanoin atu ajusta tan fila-fali iha nivel Ofisiais Sub Alternu nian husi postu Inspetur Assistente to’o Inspetur Xefe sira atu priense kargu balu iha Eskuadra ka Seksaun depende ba nesesidade instituisaun no kapasidade pessoal ninian.
Editór Testu : Amito Qonusere Araújo
loading="lazy" />