G—NEWS (BAUCAU) — Tinan-tinan iha loron 31 fulan-Janeiru, sarani Katólika iha mundu tomak, liu-liu iha Timor Leste selebra Loron Festa São João Bosco nian, santu ida ne’ebé koñesidu nu’udar padroeiru ba edukasaun no joven sira. Maibé, iha tinan ne’e, selebrasaun ne’e iha signifikadu kle’an liu ba Família Saleziana iha Timor-Leste, tanba marka tinan atus ida Kongregasaun Saleziana nia prezensa iha rai-laran.
Padre Manuel da Silva Ximenes, SDB, Pároku Santo António Vila Antiga Baucau, hateten, selebrasaun tinan ida ne’e diferente tebes ho tinan hirak liu ba. Maske normalmente selebrasaun Festa iha Fatumaca, nu’udar sentru formasaun saleziana, sai nu’udar uma ba padre SDB salezianu sira, alumni ADMA, no indivíduu barak ne’ebé envolve iha serbisu edukativu salezianu iha Timor-Leste.
“Tinan-tinan loron 31 kada komunidade ida-ida selebra iha nia fatin maibe tinan ida ne’e hotu-hotu konsentra hamutuk iha Fatumaca, ita halo misa abertura ba primeira espedisaun prezensa Salezianu iha Timor no enseramentu planu sei realiza iha Tasi-Tolu Dili iha tinan 2027, maibe ida ne’e sei halo negosiasaun Autóridade kreda nian no Estadu ,”hateten Padre Manuel ba Rádiu Komunidade Matebian iha nia kna’ar fatin Parokia Santo António Vila Antiga.
Prezidente Komisaun Selebrasaun, iha okaziaun hanesan, konvida kongregasaun sira, liu-liu antigu alunus Koléjiu Fatumaca, atu partisipa ativu iha misa abertura ida ne’e. Ne’e hanesan eventu boot ida ne’ebé akontese dala ida de’it iha tinan atus ida nia laran, no ami hein katak ema hotu, hahú hosi labarik to’o ferik-katuas sira, bele mai tuir misa ne’e.
Selebrasaun ne’e la’ós de’it inklui adorasaun, maibé mós atividade oioin relasiona ho espíritu edukasaun no formasaun ne’ebé Don Bosco hanorin. Nu’udar ezemplu, ajenda importante ida ne’ebé planeia ona mak lansamentu manuál traballu no materiál formasaun nian ne’ebé sei uza hodi apoia misaun saleziana iha edukasaun iha tinan 2025 no ba oin.
Kalkula katak ema na’in 5.000 resin sei tuir misa abertura ne’e, ne’ebé kompostu husi estudante Kongregasaun Saleziana, sarani sira, no mós ofisiál sivíl no militár sira. Missa ne’e sei lidera husi reprezentante Vatikanu iha Timor-Leste, Don Marco Prizze, no partisipa pesoalmente husi Prezidente Repúblika Timor-Leste, José Ramos-Horta.
Mensajen prinsipál husi Padre Manuel katak, uma Don Bosco nakloke ba ema hotu, no selebrasaun ida-ne’e nu’udar oportunidade ida atu reafirma kompromisu ba edukasaun no formasaun karakter hahú kedas husi ki’ik. “Dom Bosco nia uma nakloke ba ema hotu atu partisipa misa aban husi ki’ik to’o ferik katuas, Dom Bosco mai fó nia edukasaun ka formasaun forma ema nia karakter no prepara an sai futuru ukun nasaun no kreda,” Padre Manuel fó mensajem.
Selebrasaun sentenáriu prezensa Kongregasaun Saleziana iha Timor-Leste nu’udar lembransa ida kona-ba importánsia misaun edukativa ne’ebé Salezianu sira hala’o hodi tulun jerasaun foin-sa’e Timor-Leste nian atu sai indivíduu ho kualidade, karakter, no prontidaun atu hasoru dezafiu sira iha futuru.
Kobertura Ekipa : RCLM
Editor Testu : Amito Qonusere Araújo