G-NEWS (DILI) – Iha esforsu atu kontrola taxa malnutrisaun ne’ebé aas iha Timor-Leste, Governu Timor-Leste, ohin loron lansa programa intervensaun nutrisaun iha komunidade hodi apoia prestasaun servisu prevensaun, deteksaun no tratamentu sedu ba malnutrisaun iha nível komunidade, ho alvu liu ema na’in 23,000 husi labarik sira ne’ebé menus hosi tinan lima iha Munisipiu Baucau no Viqueque.
Programa ne’e, finansia hosi Governu Reinu Unidu no ne’ebé sei implementa liuhosi UNICEF, sei kontribui ba fortalesimentu kompetênsia no kapasidade hosi Grupu Suporta Inan, atu identifika kazu malnutrisaun no mós atu apoia kuidador-sira ho koñesimentu kona-ba prátika prinsipál kuidadu nutrisaun ba labarik-sira.
“Ita hein katak liu husi programa ne’ebé mak lansa hamutuk ona husi Governu Timor-Leste, Governu Reinu Unidu no UNICEF, sei ajuda atu reduz no ajuda atu prevene kazu malnutrisaun sira iha nasaun ne’e,” hateten S.E. Dra. Elia A. A. dos Reis Amaral, Ministra Saúde, Timor-Leste.
Maske iha progresu di’ak kona-ba kombate malnutrisaun iha Timor-Leste, dezafiu sira kontinua iha nafatin, no malnutrisaun nafatin sai hanesan ameasa boot liu-liu ba labarik sira-nia sobrevivénsia no dezenvolvimentu. Tuir fonte dadus nasionál, porsentu 47 husi labarik sira hotu ne’ebé menus hosi tinan lima mak ra’es badak iha sira-nia dezenvolvimentu fíziku no kognotivu, enkuantu porsentu 8.6 hosi labarik mak ho malnutrisaun aguda.
Kazu malnutrisaun iha Munisipiu Baucau no Viqueque aas liu média nasionál, ho pursentu 49 no pursentu 48 hosi labarik sira ne’ebé menus hosi tinan lima mak ra’es badak, enkuantu pursentu 72 no pursentu 59 mak hetan anemia respektivamente.
Prátika fó han ne’ebé ki’ik no sub-optimal hanesan inisiasaun fó-susubeen inan tarde, prátika fó-susubeen inan eskluzivu ne’ebé menus ba labarik ho idade menus husi fulan 6, koñesimentu ne’ebé sei menus atu eskolla ka hili ai-han no tratamentu ijiéniku hodi prepara hahan, kontribui ba taxa malnutrisaun ne’ebé aas.
Liuhosi programa ne’e, Membru Grupu Suporta Inan nain 1000 sei simu abilidade no koñesimentu hodi hala’o akonsellamentu no promosaun regulár, ezaminasaun, referál no akompañamentu ba kazu malnutrisaun iha munisípiu rua. Aleinde ne’e, membru sira husi Grupu Suporta Inan sei simu treinamentu kona-ba kolesaun dadus, relatóriu no rejistu uja plataforma online iha tempu reál hanesan KoboCollect.
“Voluntariu sira husi Grupu Suporta Inan sai ona instrumentu hodi fornese servisu saúde ba ema sira iha área hirak ne’ebé susar atu hetan asesu, no asegura katak la’iha ema ida tan mak husik hela iha kotuk ka la simu intervensaun salva-vida ne’ebé mak sei implementa. Tanba ne’e UNICEF valoriza kolaborasaun ida-ne’e ho Ministériu Saúde no Gabinete Estranjeiru, Commonwealth & Dezenvolvimentu Reinu Unidu ninian, hodi hametin mekanizmu sira ne’ebé salva-vida no sustentável iha komunitária hodi prevene no responde ba malnutrisaun,” dehan Bilal Aurang Zeb Durrani, Reprezentante País UNICEF iha Timor-Leste.
Programa ne’e lansa durante vizita husi S.E. Rt. Hon. Anne-Marie Trevelyan, Ministra Estadu Reinu Unidu ba Indo-Pasífiku ba Timor-Leste. Durante vizita Rt. Hon. Anne-Marie Trevelyan hasoru malu ho membru komunidade sira iha Suku Manleuana iha Dili, ne’ebé nia hetan oportunidade atu kumpriende servisu balun husi Grupu Suporta Inan, no oinsa Reinu Unidu bele apoia Governu Timor-Leste kona-ba hadi’ak saúde no nutrisaun liu husi servisu hamutuk ho ninia parseiru internasional sira.
Fontes/Source : Relasaun Públika UNICEF iha Timor Leste
Editór Testu : Amito Qonusere Araújo
loading="lazy" />