Artigu ne’e, Responsabilidade tomak husi hakerek na’in, José Felix Camilo (Estudante ISFIT: Finalista Filosofia, e actual 2 Ano Teologia)
NB: Artigo ida ne’e, continuação husi primeira parte . Tamba ne’e, acompanha husi primeira parte atu bele hare nia continuidade, tamba assunto balun esplica ona iha primeira parte. Ne’e duni, ita sei tama direitamente ba assunto tuir mai, hodi haklean liu tan título nebé colocado iha leten. Contudo, iha parte ida ne’e, sei koalia liu konba Verdadeiro Político ho Politiqueros. Liliu, ita sei hare hamutuk critério saida mak bele usa hodi hatene, sé mak Verdadeiro Político no Politiqueiros ho sira ida-idak nia prática iha ita nia rain. Atu lalika lakon tempo, hau convida direita ita bot sira tama ba assunto.
VERDADEIRO POLÍTICO
Wainhira ita koalia konabá verdadeiro Político, ita hotu hela iha confusão nia laran. Tamba, ohin loron ne’e, iha ita nia rain ema hotu-hotu hatudu sira nia-an hanesan Verdadeiro Político, iha fatin público. Liu-liu, ita haré iha tempo campanha: Balun hatudu liu husi matan-bén, balun hatudu liu husi conta história 75, balun hatudu liu husi fahe osan, no balun hatudu liu husi juramento, balun hatudu liu husi estatus iha FB hodi ataca ema seluk, balun tun ba hakoak povo, halimar ho povo, balun sura nia história luta nian, balun sobu mesa iha Parlamento, balun rakut malu, hakilar malu ho lian makas iha Parlamento, balun ameaça sira balun, etc. Será que, sira ne’e hotu mak sai hanesan critério atu hatudu ba Povo, katak sira defende interesse povo nian, no sira ne’e maka verdadeiro Político? Olha, Vamos ver!
Platão hatudu mos-mos mai ita, critério ida nebé justo tuir perspetiva filosófica nian: “O único critério para classificar, quem quer que seja como Verdadeiro Político é a posse da FILOSOFIA e da POLÍTICA, e não o ocupar um cargo do Governo […] do filósofo que governa segundo a LEI” (A República de Platão: P. 67).Platão hatur lolos ona distinção entre verdadeiro Político ho sira nebé ocupa cargo iha Governo, hodi halo teatro iha fatin público. Husi Platão nia argumento iha leten ne’e, ita hare mos-mos ona critério atu ta’es sé mak verdadeiro Político; La seluk la le’et, sira nebé nata didiak ona Filosofia ho Política no hatene halo lei no moris tuir lei. Ne’e duni, Platão recomenda atu FILÓSOFO mak bele ukun hodi organiza Cidade tuir Lei.
Tan sá mak Platão recomenda atu FILÓSOFO mak bele ukun Cidade? Ita hare, oinsa iha regime ideal Platão nian hatur Filósofo nia capacidade “O regime ideal, segundo Platão, é o do Filósofo. Ele governa não segundo leis preestabelecidas, mas segundo as soluções que a sua sabedoria lhe sugere em cada caso” (Curso de Filosofia: P. 82). Iha ne’e, ita hare oinsa Filósofo nia capacidade de actuação ba problema sira nebé acontece. Katak nia la tuir los de’it lei nebé ita observa la lori vantagem mai Povo ka dificulta processo desenvolvimento, maibé oinsa usa nia kakutak nebé iha, hodi resolve problema hotu nebé lei la bele resolve. Tamba, dala barak ema nebé halo lei ne’e hatama mos ho sira nia interesse hodi limita ema seluk no loke dalan ba sira atu aproveita nafatin. Tamba ne’e, lei nebé la iha nia efeito diak ba Povo precisa usa kakutak hodi halo revisãio, ita labele sai atan beibeik ba lei sira nebé la lori Povo ba moris diak, no lei sira nebé loke dalan ba ema atu sobu ita nia cultura, sobu ita nia unidade etc. Tamba ne’e, ita nia Constituição RDTL artigo 154 loke hela dalan ba revisão. Ami Povo precisa Nai-Ulun ida nebé hatur didiak nia kakutak, atu halo revisão ba lei sira nebé loke dalan hodi harahun ami nia cultura no unidade. Timor-Leste, precisa duni Filósofo ho Político nebé iha arte atu ukun Cidade, hodi hatur lei nebé saudável “Espírito das Leis”.
Tuir mai, oinsa Platão hatudu verdadeira arte Política ne’e hanesan arte filósofo nian “A verdadeira arte Política é a arte que cura da alma, e a torna o mais possivel virtuoso, sendo, por isso, a arte do FILÓSOFO” (História da Filosofia: P. 158). Tamba ne’e, Filósofo usa nia arte hodi halo Filosofia hodi hamosu Política. Tamba, liafuan Política ne’e mai husi lian grego pólis katak Cidade no Cidade ne’e rasik Filósofo sira mak hamosu, tamba sira hare ba katak ema la bele moris mesak, maibe ema precisa moris hamutuk “Cada um de nós não é autárquico, ou seja, não se basta a si mesmo e tem necessidade dos serviços de muitos outros homens” (História da Filosofia; P. 159). Husi ne’e mak, Filósofo sira hahu hamosu conceito Cidade, atu hodi organiza cidadão sira nia moris hodi alcança bem comum. Tamba ne’e, maka Maquivel hasai nia teoria O Príncipe, Jhon Locke hasai Tratado do Governo, Montesquieu hasai teoria Separação dos Poderes, Hobbes hasai nia teoria Leviatã, Rousseau hasai teoria Contrato Social, etc. Sira ne’e hotu, atu buka de’it dalan nebé diak liu, atu organiza Cidade ho cidadão sira nia moris. Tamba ne’e, hakarak ka lakoi iha Cidade ne’e Filósofo hola posição importante atu hatur nafatin Filosofia hodi refresh no halo manutenção ba Cidade ho cidadão sira nia moris. Atu nune’e, garante nafatin Cidade organizada.
Tamba ne’e mak, Filósofo bo’ot sira hanesan Platão, Aristóteles sira recomenda nafatin atu Filósofo sira mak kaer ukun, tamba sira mak hamosu Cidade no conhece didiak Cidade. Pelo contrário, iha Timor Nai-Ulun sira desinteresse ho Filosofia. Afinal, atu sai verdadeiro político ne’e tem que conhece didiak Filosofia ne’e. Basá, Filosofia mak sai hanesan Inan ba ciência sira seluk “Filosofia é a mãe de toda a ciência” (Grandes Livros da Filosofia p.9). Se Filosofia hanesan INAN, então Política ne’e hanesan oan. Naturalmente, INAN sempre hadomi nia oan no oan sira mos sempre respeita, cuidado no hadomi sira nia INAN. Tamba, INAN ne’e sempre INAN. Ohin loron, iha Timor político sira hare Filosofia la hanesan INAN, maibe hanesan fali ema estrangeiro ida. No fim, quando oan nega nia INAN, maldição sei konba duni oan, tamba INAN mak hahoris oan. Ita hare mos-mos, iha Timor ne’e oan sira nebé heuwai INAN ne’e, la’o hanesan oan kiak sem direção. Atenção, Político sem Filosofia é NADA!
Tamba ne’e, ba Nai-Ulun sira ohin loron nian, hakarak ka lakoi tem que iha vontade di’ak atu haklean Filosofia no Política, atu sai verdadeiro Filósofo no verdadeiro Político “A EDUCAÇÃO prevista por Platão para os governantes coincidia com o tirocínio exigido para o APRENDIZADO DA FILOSOFIA, suposta a coincidência entre VERDADEIRO FILÓSOFO e VERDADEIRO POLÍTICO” (História da Filosofia: P. 162). Atu nune’e, Nai-Ulun sira bele usa didiak poder nebé imi iha, hodi halo lei atu regula cidadão nia moris hodi alcança Cidade organizada. Tamba, filósofo sira haré nanis ona katak atu organiza Cidade ho di’ak só ema FILÓSOFO. Sé mak FILÓSOFO? No saida mak FILOSOFIA?
Tuir mai, hau hakarak lori ita bot sira ba haré hamutuk sentido husi Filosofia, no tan sá mak filósofo sira fo ênfase ba Filosofia hanesan INAN ida nebé hahoris ciência sira seluk. Etimologicamente, termo Filosofia ne’e composto husi lian rua grego nian: PHÍLOS, significa; amigo de, amante de, que gosta de, que tem gosto em (Dicionário da Filosofia). Hau halo badak de’it dehan: Ema nebé iha gosto ka iha domin ba buat ruma nebé nia atu halo. SOPHÍA significa; sabedoria, saber, ciência, conhecimento (Dicionário da Filosofia). Significa, Filosofia ne’e amor à sabedoria, gosto pelo saber, ka ema nebé hadomi matenek, ema nebé iha gosto atu buka hatene. Termo Filosofia ne’e, Pitágoras mak cria. Maibé, nia rasik lakoi ema bolu nia sábio, maibé nia prefere liu ema bolu nia, simplesmente FILÓSOFO, katak ema nebé iha amizade íntima ho matenek ka ema nebé kakutak, no vontade kmo’ok no kamnek atu buka hatene “O termo foi inventado por Pitágoras, que certa vez, ouvindo alguem chamá-lo sábio e conciderado este nome muito elevado para si mesmo, pediu que o chamassem simplesmente FILÓSOFO, isto é, AMIGO DA SABEDORIA” (Curso de Filosofia: p. 19).
Tales de Mileto, mak ema primeiro nebé coloca questão ida ne’e, hanesan núcleo ba Filosofia “Qual é a causa última, o princípio supremo de todas as coisas” (Curso de Filosofia: p. 19). Platão halo fali resumo dehan “Filosofia é o conhecimento de tudo” (História da Filosofia: P. 158). Husi ne’e, Aristóteles hahu halo pesquisa rigoroso no sistemática hodi hatur Filosofia hanesan INAN ba ciência sira seluk, tamba Filosofia estuda “As causas últimas de todas as causas” (Aristóteles, metafísica Livro I). Contudo, atu hatene buat ida ka hamosu buat ruma, uluk liu sempre hahu ho pergunta atu bele hatene klean liu buat nebé ita hakarak hatene. Tamba ne’e, ciência hotu-hotu sempre hahu ho pergunta, maibe keta haluha Filosofia nia an ne’e mak pergunta. Ne’e duni, wainhira ita halo pergunta atu hatene buat ruma, iha neba ita halo Filosofia. Filosofia nia orientação maka buka hatene buat hotu nia hun no abuat. Se hanesan ne’e, Filosofia ne’e importante iha Timor ka lae? Nai-Ulun sira precisa Filosofia ka lae?
Filósofo sira hatudu mos-mos hela katak, Filosofia mak hamosu pergunta oi-oin hodi hahoris ciência sira seluk, atu buka hatene buat hotu nia hun no buat hotu nebé haleu ita. Mai fali iha tempo moderno nian, mak René Descartes deduz Filosofia hodi dehan “Ensinar a raciocinar bem” (Curso de Filosofia: p. 7). Nia focu liu ba ema nia kakutak, katak oinsá hanorin ema atu hatur didiak nia kakutak hodi hanoin, hodi koalia, no hodi halo. Husi ne’e, mak ita foin hetan ritmo foun, atu liga Filosofia ho Política hodi hatene verdadeiro Político.
Tuir mai, ita usa fali Filosofia ho política ne’e hanesan relação mane no feto, atu bele hetan naran casamento nian nebé ita, babain temi Filosofia Política,hodi bele hatene konabá verdadeiro Político. Política, ita hotu hatene katak; refere ba Cidade ka organização da Cidade. Tambá ne’e, ita compara karik; Filosofia ne’e hanesan mane oan ida, nebé laran monu ba feto oan ida naran Política ne’e, atu sai nudar nia fen nebé nia hadomi liu. Portanto, Filosofia hanesan mane, nia lori nia domin tomak hodi bali no cuidado nia fen Política ho responsabilidade tomak to’o mate. Tamba ne’e, Nai-Ulun sira tau didiak iha kakutak ho fuan katak, “Os governantes deverão ser aqueles que souberam AMAR A CIDADE” (História da Filosofia: P. 159). Governante sira tem que hatene hadomi Cidade hanesan fén hadomi la’en. Ita nia governante sira hadomi ita nia Cidade ka lae? Keta sira hadomi liu partido karik? Se hanesan ne’e susar bot!
Filosofia Política nia testemunha da vida hanesan casal mak; oinsa hanorin nia oan Nai-Ulun sira, atu hatur didiak kakutak liu husi poder no hodi halo lei atu organiza cidadão sira nebé moris iha Cidade nia laran. Tamba ne’e, Platão hatur República ne’e atu hodi hatudu coincidência entre Verdadeira Filosofia ho Verdadeira Política atu hodi atinge Cidade Autêntica “República é precisamente a da coincidência da verdadeira Filosofia com a verdadeira Política. Apenas se o Político se tornar filósofo, e se o filósofo se tornar o Político será possivel construir a CIDADE AUTÊNTICA, ou seja, o Estado fundado sobre o valor supremo da JUSTIÇA e do BEM” (Arepública de Platão Livro IV). Ne’e duni, ema nebé estuda didiak Filosofia ho Política ne’e, nia hatene hatur didiak nia kakutak, hodi usa nia poder atu organiza Cidade tuir lei hodi defende JUSTIÇA no BEM ba cidadão.
Tamba ne’e, FIOLÓSOFO, ema nebé usa nia arte atu hatur didiak nia kakutak atu hanoin, atu kolia no organiza. No POLÍTICO, ema nebé usa nia arte hodi hatur didiak nia fuan atu hadomi Cidade, hadomi cidadão. Tamba ne’e, Filósofo ho político ne’e la bele haketak, tamba filósofo nia arte sempre liga ho política no político nia sempre liga ho filosofia. Atu nune’e, ita bele ba to’o Cidade organizada. Contudo, Filósofo ho Político sira nia arte ne’e hatur iha vertude. Husi ne’e mak, ita bele hetan verdadeiro Político, tamba verdadeiro Político ne’e hatur iha lialos no bem comum. Wainhira, iha ona verdadeiro Político mak, ita bele hare hetan ona Cidade Perfeita nebé Platão imagina, maibé ita la ba to’o liu Cidade perfeita ne’e tamba pura ideia; Mais ou menus, ita to’o netik Cidade organizada: Buat hotu iha Cidade nia laran organizada, ema nia moris organizada, uma organizada, estrada organizada, bé nia dalan organizada, etc. Timor ne’e, Nação ida nebé ki’ik no facil atu organiza, sa tan Cidade Dili. Maibe tan sá, la bele organiza ho diak? Osan mak la iha ka sistema mak la diak? Ka verdadeiro Político mak la iha? Check didiak!
Tamba ne’e, mak Filósofo bo’ot sira hanesan Platão, Aristóteles ho sira seluk ne’e, argumenta katak; só FILÓSOFO mak so’i atu organiza ka administra Cidade. Tamba nia kakutak ne’e nakonu ho Filosofia no Política, no oinsa nia explora nia conhecimento ne’e liu husi nia poder hodi bali no organiza Cidade ho cidadão nia moris. Portanto, atu organiza cidadão nia moris, precisa iha uluk lai Verdadeiro Político atu cria lei, tamba iha CRDTL hatur claro kedas ona knar importante ida ba Verdadeiro Político sira iha artigo 97, número 1, alínea a, b e c “A iniciativa da lei pertence: Aos Deputados, Às Bancadas Parlamentares e Ao Governo”. Grupo tolu ne’e la hatur didiak sira nia-an ho verdadeira Política no arte do filósofo, hodi cria lei atu organiza cidadão nia moris no oraganiza Cidade, ita sei la hetan Cidade organizada, maibé sei hetan de’it Cidade Desordem no ita sei sofre bebeik ba inundação.
Tamba ne’e, ba Platão molok atu organiza Cidade, ita tem que hatene descobre uluk lai força ka kbi’it nebé cidadão sira iha, hodi coloca ema tuir ida-idak nia area (especialidade no proficionalidade) “Construir a Cidade significa conhecer o homem e seu lugar no universo” (História da Filosofia: p, 159). Conhece uluk lai, ema ida-idak nia area, hodi hatur ema ida-idak tuir nia fatin “[…] cada um se torna ESPECIALISTA no seu campo” (Curso de Filosofia: P. 80): Governante grupo ketak, Conselheiro grupo ketak, trabalhadores grupo ketak, guerreiros grupo ketak, técnico grupo ketak etc. Grupo sira ne’e, orienta tuir ida-dak nia nia virtude hodi tane as interesse comum. Tamba ne’e, ema nebé atu hili hodi ocupa posição importante sira, tem que, hili tuir ididak nia especialidade no proficionalidade, se lae hili tiha malu ba ocupa posição, maibé la hatene halo buat ida, to’o ikus mosu liafuan “salah pilih”. Ya memang, salah pilih duni, tamba la hili ho kakutak, maibé hili ho fali ambição.
Atenção, Lei dos Partido Políticos fo dalan atu hili sira nia ema ba kaer knar, maibe labele haluha filósofo sira nia recomendação “Nos governantes, portanto, predomina a alma racional, e sua virtude específica é a SABEDORIA” (História da Filosofia: P. 159). Portanto, sabedoria tem que hetan fatin primeiro, depois tuir mai bele cor, bele ran, bele família etc. Tamba, sabedoria mak sei lori ema atu haketak buat nebé povo nian, buat nebé partido nian no buat nebé família nian. Sé lae, buat hotu-hotu partido nian no família nian, enquanto Povo nian zero cortado.
Tamba ne’e, ba Platão ho Aristóteles verdadeiro Político ne’e; ema nebé usa nia arte hodi hadomi Cidade no ema nebé kakutak diak atu organiza. Ne’e duni, ema nebé atu ukun iha Cidade ne’e, tem que kadi nia kakutak ho Filosofia no Política, hadi hatur didiak nia poder atu organiza Cidade. Basá, verdadeiro Política ne’e, la’os mosu de’it maibe precisa esforço no vontade diak atu aprende. Portanto, verdadeiro Político ne’e, diferença ho sira nebé fahe osan hodi sosa votus, sira nebé usa história hodi buka votus, sira nebé tama sai uma halo juramento hodi buka votus, sira nebé usa retórica sofista nian hodi buka votus, at liu sira nebé rakut malu no baku fila Mesa-Lulik iha uma fukun Parlamento.
Contudo, Montesquieu, argumenta tan nune’e “O homen de bem Político, que possui virtude Política”, virtude Política ne’e, mak ema nebé hadomi nia pátria liu husi hadomi lei no moris tuir lei, “é o homen que ama as leis de seus país e age por amor às leis de seus país”(MONTESQUIEU, Espírito das Leis: p. 3). Husi ne’e, ita la iha ona dúvida konbá se mak verdadeiro Político. Agora, ita ba haré sira nebé Platão dehan la’os verdadeiro Político ka “POLITIQUEIROS” ho nia prática sira.
POLÍTIQUEIROS
Saida mak Politiqueiros ne’e lerek? Oinsá Platão fo nia definição kona bá Politiqueiros? Konabá Politiqueiros nia dehan:“Os que não tem posse da FILOSOFIA e da POLÍTICA, mas ocupa o cargo Política do governo […] POLITIQUEIROS aqueles que onde faltam os Políticos […] aquele que se envolve muito em Política partidária, mas utiliza meios pouco sério” (A Repúbila de Platão: p. 67). Husi perspectiva platónica ne’e, ita hetan kedas ona conotação negativa ba polítiqueiros ne’e rasik, hodi observa Politiqueiros nia resultado hanesan; mal organização, mal governação no mal administração hodi hamonu Estado ba crise Política, hodi hamosu mos crise oi-oin no lori dadauk ona destino Nação nian ba rai naruk. Ida ne’e, acontece tamba ema nebé ukun la nata didiak Filosofia ho Política, ou, ema nebé la iha conhecimeto di’ak atu ukun no la sério atu administra Cidade, tamba fuan ho kakutak avariado. Ne’e duni, precisa instala ho Filosofia no Política.
Ita nia Nai-Ulun balun hatudu mos-mos hela lala’ok Politiqueiros nian hodi organiza ita nia Cidade. Maibé, balun sempre fó razão katak; ita foin ukun-an. Tamba ne’e, ita lao ho buat nebé ita iha. Maibé, questão mak ne’e: Ita nia independência 18 anos ona no ita nia governação lao to’o ona oitavo governo ne’e, ita foin ukun-an nafatin ka? Tan sá, mak ita foin ukun-an 18 anos, maibé ita nia governção haksoit to’o ona oitavo governo. Lógica matemática nian krik, 18 anos ne’e ita foin to’o quarto governo. Tamba, periodo ida tinan 5, maibé tan sá balun foin tinan ida, tinan rua monu sedu de’it. Ita nia problema iha nebé? Iha Políticos ka Politiqueiros?
Agora, ita ba haré prática lolós polítiqueiros nian iha ita nia rain ne’e; partido Política ita loke hanesan obralan no recruta ema ba estrutura partido nian, hanesan ema atu ba sosa obralan. No fim, nia resultado mak hotu-hotu hadau malu atu ba ukun, balun hadau malu ba Parlamento, ba Governo, ba Secretário Estado etc. Mesmo que, la iha conhecimento konba oinsá atu ukun, maibé obriga-an ho fiar-an, hodi aproveita periodo 5 anos ne’e atu aprende de’it; balun la aprende buat ida, nem aplica buat ida, tamba seidauk to’o 5 anos governo monu. Tamba ne’e, nia mos monu no la consegue hetan pensão vitalícia; Balun fali bokur ho pensão vitalícia. Quo vadis RDTL?
No fim, tamba sira la iha conhecimento klean no la sério atu usa Política, ne’e duni hamosu bongkar pasang iha programa do desenvolvimento no la iha continuidade. Ukun ho modelo ida hanesan ne’e, ita atu lori destino Nação nian ba nebé los? Maibé, tem que matan moris no neon na’in. Tamba, molok ita atu ukun-an, ita nia profeta Política, Nicolau Lobato haré momós ona katak depois de, ukun-an oportunista sira sei hadau malu atu ukun “Reaccionários são os oportunistas que procuram entrar no jogo sem se comprometerem, são os que tentam mover outros para barulho, para a luta Político e se põem detrás dos bastidores a observar a cena, a ver para que lado verga a balança e, depois do trabalho feito, se reclamam roidosamente o direito de tambem dividir o bolo” (Sambemos, e podemos, e devemos vencer: P. 81). Sira mos hahu reclama sira nia direito atu fahe bolu: sira mos hakarak hetan cadeira, atu ba tur hodi han bolo; hakarak hetan pasta atu tau subar bolu. Uluk hanesan diabo, ohin loron hanesan anjo. Bele sai anjo ba, maibé anjo ho qualidade Política netik ba Nai-Ulun.
Balun, haluha tiha katak sira representa povo ne’e, katak; sira melhores dos melhores; afinal na realidade, sira la’os melhores dos melhores, maibé piores dos melhores. Tamba, sei iha povo balun nebé di’ak liu sira, maibé tamba la hetan oportunidade hanesan sira. Ne’e duni, sira tur sala fatin, hodi halo comédia lubuk ida atu dada ema nia atensão; hodi hamnasa lisuk sira no tula lisuk ibun ba sira. Até que, Nai-Ulun balun hadau tiha fatin iha Ministério atu ocupa, maibé tamba la merece atu ser vivida iha Ministério, então nia sai hanesan símbolo cómico (autores da comédia) de’it; nia bok-an ema hamnasa, nia kolia ema hamnasa no lao mós ema hamnasa. Atenção! Platão dehan: “Nos governantes, portanto, predomina a alma racional, e sua virtude específica é a sabedoria” (História da Filosofia: P. 159). Ministério fatin atu aplica imi nia virtude sabedoria atu gere instituição, la’os fatin atu ba tur hodi halo comédia.
Balun tamba, la iha conhecimento di’ak ba assunto nebé nia atu koalia, então mosu liafuan cómico oioin: Mosu iha debate Programa no Orçamento, la iha ona argumento, ameaça ema hodi dehan; Lafaek quando toba keta bo’ok; cómico iha ne’e kedas! Koalia usa ema nia kakutak Nai-Ulun, keta usa lafaek nia siak. Basá, lafaek nia fatin atu toba ne’e, iha tasi laran no kolan laran. Ne’e duni, ema mos lakoi ba bok, maibé quando nia mai toba fali iha ema nia sala de visita, então ema mos iha tendência atu bok, hodi duni nia ba toba iha nia fatin, tamba toba sala fatin.
Balun dehan: Hau quando koalia sé sé deit nonok. Usa kakutak democrático oitoan, la’os usa fali kakutak ditadura. Ami alunos sira ne’e, quando la nonok iha escola ne’e, tamba prfessor/a la iha power atu koalia no hanorin. Razão katak, nia la domina matéria, tamba ne’e buat nebé nia koalia sempre fora da área de cobertura. Ne’e duni, hakarak ka lakoi nia sai hanesan centro ba barulho, tambá alunus barak mak iha conhecimento di’ak liu nia, até que, hateke nia mos la hetan.
Balun dirige mesa Plenária ne’e hanesan fali ema lori batar ba kari ba manu, tamba ne’e manu sira kokotek hadau malu atu mai han batar. To’o ikus, manu-na’in la tahan ho manu kokotek, manu-na’in mos kokotek hasoru.Hakarak rona manu kokotek, di’ak liu hela iha uma, hodi fohan manu. Tamba Parlamento ne’e, fatin atu usa kakutak ema nian, la’os manu nia kokotek.
Balun, ita haré iha média, ema debate orçamento ho programa, nia dukur di’ak hodi haluha rai; afinal, nia fiar-an los katak nia ba tur iha nebá representa povo. Representa povo nia saida? Representa povo atu toba? Ao contrário, povo iha uma acompanha TV matan lakan hela, nia mak dukur di’ak fali. Dukur ne’e, di’ak liu hela iha uma hodi toba a-vontade, atu câmera lalika hetan hodi pamer fali iha média hodi halo tik-tok. Dukur-dukur, hader mai vota contra, tamba de’it orientação Política, ne’e duni iha sira nia ulun laran mosu nanis ona conceito vota contra, hodi la haré no usa kakutak atu tetu didi’ak tuir sasukat académico nian. Quo vadis RDTL?
Balun, governante sira lori programa ba apresenta iha Parlamento ho língua portuguesa, nia la comprende, nia exige atu traduz ba tetun. Nai-Ulun! Tan sá, mak alunus SD oan sira ne’e sei cumpri Constituição hodi aprende língua portuguesa hanesan lian oficial, no sira kolia namdoras los hanesan tuna, enquanto Nai-Ulun balun la namdoras hanesan tuna, maibé tarak hela hanesan lafaek nia kulit. Oy, la hatene português ne’e, kala iha tan fali ona acessor ketak ida! Osan mos começa menus ba beibeik ona, tamba acessor aumenta ba bebeik.
Balun, hakarak sira mak ukun to’o mate, ema seluk mak ukun sira la simu no sira buka dalan oi-oin atu hamonu ema seluk, hodi dehan sira mak heroi lolós nian, tamba salva Estado. Salva Estado ka salva hela imi nia partido no imi nia an? Hakarak salva Estado ne’e, ema se mak ukun ita colabora ho força de vontade tomak. Ida ne’e, mak caridade Política lolós nian.
Balun, wainhira sira rakut malu to’o Mesa-Lulik iha Parlamento baku fila, sira koko defende an hodi dehan: iha Nação seluk at liu ita nian, tamba ema tuku malu no lori mesa tuda malu. Coitado Nai-Ulun! Tan sá foti los exemplo at ida hanesan ne’e, nusa la foti tok Singapura nia modelo organização da Cidade hodi halo tuir, atu nune’e tempo udan ita lalika sofre bebeik ba inundação. Estuda ema nia exemplo diak karik capaz los.
Balun, iha cituação dificil hanesan OGE la iha, gosta hatudu an iha TV ho sira nia declaração sem fundamento, hodi dehan osan funan di’ak los nebé seidauk bele halo levantamento. Osan funan sa’e ba hira ona? Foti dadauk ona funan balu mai hodi resolve inundação, nebé estraga povo nia uma no sasan uma laran nian. No sei nafatin ho fiar an, dehan tan estudante sira nia propinas Estado mak sei selu. Tebes ka lae? Sesta básica de’it parado ona, sá tan estudante sira nia propinas. Osan iha ka lae? Sé lae karik, koalia ne’e sukat ibun Nai-Ulun.
Balun, to’o agora sei estuda hela, la hatene exame ona ka seidauk no liu exame ka keta la liu karik. Povo hein maka hein resultado exame ita la rona, parece matéria barak liu nebé estuda to’o bingung. Ami estudante ne’e, quando estuda matéria oitoan então facil atu domina, maibe matéria quando mai barak ne’e exame amo kosar lotuk sai. Balun, nonok los de’it ona, tamba ba kotuk la diak, mai oin la diak para iha fatin ho dalan nonok; Nonok maibe halo barak karik diak, maibé la halo buat ida, nonok de’it mos at mak ne’e. Representa Povo nia kakutak atu koalia no halo ka atu nonok?
Balun, fali kaer la metin los, lori ba quarentena la koi, hakarak autoisolamento, maibe autoisolamento la hun la dikin, ba halo fali caridade. Halo caridade ne’e buat diak, maibe keta lori fali corona ba halo caridade. Koalia lolos de’it, sé ita nia Nação livre ona husi corona karik, dehan para Povo sira mos bele livre atu hala’o sira nia moris. La’os, autoisolamento ne’e vale ba Povo de’it, maibe Nai-Ulun sira la vale. Balun, tauk lakon confiança, então koko defende autoisolamento ho argumento nebé la forte, maibé nafatin defende. Defende lialos karik diak!
Sira ne’e hotu, atu hatudu deit observação pessoal ba prática POLITIQUIEROS nian iha ita nia rain, tuir critério Platão nian. Keta haluha, Norberto Bobbio hautudu hela Politiqueiros sira nia serviço loro-loron nian mak ne’e: “[…] como poder é adquirido, como é conservado e perdido, como é exercido, e como é possivel defender” (Teoria do Poder).Katak sira lorloron tur la hakmatek, sira nia serviço mak oinsa defende sira nia poder atu ukun ba beibeik, hodi aproveita povo nia osan. Tamba ne’e, sira sempre tauk atu lakon poder, luta atu hetan nafatin no buka dalan oi-oin atu defende nafatin sira nia poder no usa meios oi-oin atu hetan confiança hodi aproveita nafatin, biar ba, sira nia prestação la preenche critéria.
Ikus liu, Nação Timor precisa tebes VERDADEIRO POLÍTICO, la’os POLÍTIQUIEROS!
NB: Keta haluha, acompanha nafatin artigo ne’e nia continuação, tamba sei iha assunto importante rua nebé seidauk kolia atu completa tema iha leten: Primeiro, liberdade Política, iha ne’e sei koalia konba oinsa bele usa didiak ita nia liberdade iha Estado de Direito Democrático. Segundo, Á melhor Política, iha ne’e sei liga oitoan Amu Papa nia Encíclica Fratteli Tutti ho filósofo sira nia hanoin, hodi hare ita nia Política. Boa leitura! Maromak fó Benção.
loading="lazy" />