G-NEWS (WINI-INDONÉZIA) — Iha komemorasaun Loron Proklamasaun 28 Novembru iha Ambeno-Oecusse, ba dala-49, G-NEWS hetan oportunidade halo intervista ho sidadaun Timor Leste balun iha fronteira Wini-Indonézia, ne’ebé hala’o hela viajen husi Dili ba Ambeno-Oecusse. Sira fó hanoin kona-ba dezenvolvimentu nasionál ne’ebé governu Timor Leste tenke foka liu-liu kona-ba setór saúde, edukasaun no infraestrutura, liu-liu ba ezekusaun orsamentu Jerál Estadu 2025 ne’ebé ne’ebé Prezidente Repúblika José Ramos Horta promulga ona proposta Lei Orsamentu Jeral Estadu tinan 2025, ho montante biliaun $ 2,6.
Sidadaun hirak ne’e hato’o sira nia esperansa ba dezenvolvimentu nasionál, liu-liu iha setór saúde, edukasaun no infraestrutura. Iha entrevista ho G-NEWS iha Kinta (28/11/2024), rezidente balun subliña importánsia atensaun governu nian ba nesesidade báziku komunidade nian, iha territóriu nasionál, liuliu iha área remotas hanesan Oecusse no Ambeno.
Ermelinda Suni, sidadaun feto ida, husi Oecusse, hato’o ninia preokupasaun kona-ba kondisaun servisu saúde iha sira nia fatin. “Ita presiza duni instalasaun saúde nian ne’ebé di’ak liu, liuliu disponibilidade hosi ai-moruk sira. Rezidente barak maka tenki ba dook iha Díli hodi hetan tratamentu médiku loloos”, nia hatete. Ermelinda hein katak orsamentu estadu 2025 barak liu bele aloka hodi hadi’a no hametin fasilidade saúde iha área fronteira, inklui distribuisaun ai-moruk ne’ebé hanesan liután no pesoál médiku ne’ebé adekuadu.
Ernesto Silva nu’udar joven ida husi Dili, mós hato’o nia preokupasaun kona-ba kualidade edukasaun iha fatin refere. “Ita nia eskola laiha sala de aula no mobiliariu hanesan meza no kadeira ba estudante sira. Labarik barak maka obriga atu estuda ho kondisaun ne’ebe ladun ideal,” dehan Ernesto. Nia subliña, hadi’a fasilidade edukasionál no infraestrutura importante tebes atu kria ambiente aprendizajen ne’ebé di’ak liu. Nia espera katak orsamentu edukasaun iha Planu Orsamentu Estadu 2025 foka liu ba harii no hadi’a fali eskola sira iha área sira ne’ebé menus dezenvolvidu.
Mario Freitas, sidadaun ida hosi Dili, destaka importánsia hosi dezenvolvimentu infraestrutura iha área remota. “Ita iha duni difikuldade ho kondisaun estrada ne’ebé estraga. Estrada ne’ebé aat difikulta komérsiu no difikulta asesu ba atendimentu públiku. Ita hein katak governu bele halo no hadi’a estrada sira ne’ebé liga husi kapitál munisipal to’o aldeia,” dehan Mario. Tuir nia, dezenvolvimentu infra-estrutura ne’ebé adekuadu sei hasa’e kualidade moris komunidade nian no fasilita fluxu sasán no mobilidade sósiu-ekonómiku iha rejiaun ne’e.
Entretantu, Ernesto Soares, konvida governu atu tau atensaun liu ba dezenvolvimentu ekuitativu iha Timor Leste laran tomak. “Aleinde saúde, edukasaun no infraestrutura, ami presiza mós apoiu ba setór agríkola no empoderamentu ekonómiku komunitáriu. Ami hein katak orsamentu Estadu 2025 bele kobre aspetu sira ne’e hotu ho efisiénsia no transparénsia”, nia hatete. Ernesto subliña importánsia atu envolve komunidade iha planeamentu no implementasaun projetu dezenvolvimentu atu nune’e rezultadu ne’e, povu sente duni.
Timoroan tomak hein katak orsamentu estadu 2025 sei la foka de’it projetu ne’ebé konsetra dei’it iha sidade, maibé sei fó mós atensaun ba nesesidade urjente iha área sira ne’ebé dook husi sentru governu nian. Sira hakarak governu foka liu ba dezenvolvimentu ne’ebe bele hadia direitamente sira nia kualidade moris, hanesan iha setor saude, edukasaun no infraestrutura, atu nune’e bele realiza prosperidade ne’ebe ekuitativu liu ba povu Timor Leste tomak, liu-liu sira ne’ebe iha area fronteira.
Antes ne’e, iha loron 25 fulan-Novembru ne’e, Prezidente Repúblika José Ramos Horta dehan, iha fulan hirak nia laran, simu ona kopia ida no estuda kleur tiha ona, ne’ebé nia rasik nota katak la iha problema Konstitusional.
“Ohin dadersan ha’u simu Prezidente Parlamentu Nasionál, entrega ba ha’u Orsamentu Jerál Estadu 2025, ha’u promulga tiha ona, tanba iha fulan hirak nia laran, simu ona kopia ida no estuda kleur tiha ona, ne’ebé nia rasik nota katak la iha problema Konstitusional”, sita iha ajensia Notisiozu Tatoli.IP, 25 fulan-Novembru 2024.
Testu Editor: Amito Qonusere Araújo
loading="lazy" />