João Goncalves defende makaas direitu liberdade imprensa

G-NEWS (DILI) – Relasiona ho kazu Protokolu PA-RAEOA Aquito Roxaca Guterres ne’ebé rasta monu Jornalista destakadu Ajênsia Notisiozu TATOLI.IP Abilio Elo Nini, bainhira hala’o kobertura ba serimónia RAEOA ho TIMOR AID ne’ebé selebra akordu ba estabelesimentu muzeum Pais-Timor iha Oecusse, sai tiha isu viral iha sosiedade nia leet, inklui komunidade mídia sira.

Koordenador Ezekutivu Zona Espesiál Ekonomia Dezenvolvimentu Oecusse-Ambeno (ZEEDOA) João Mendes Goncalves, ko’alia ba G-NEWS iha Eskola Sekundária Katólika Padiae, suku Lalisuk Sub-Rejiaun Pante Makasar, RAEOA, kuarta-feira (05062024) ne’e katak, nia parte la iha koñesimentu kona-ba kazu ne’e.

Protokolu PA-RAEOA rasta monu jornalista TATOLI no tenta atu tuku tán

Maibe eis Ministru Ekonomia no Dezenvolvientu ne’e esplika, nia defende makaas direitu Liberdade imprensa ba jornalista sira.

“Ha’u la kestiona direitu Liberdade imprensa ba jornalista sira, ha’u defende makaas loos direitu Liberdade imprensa”, João Mendes Goncalves ko’alia ba G-NEWS.

“Ita labele iha isejere ba atuasaun, ita iha regras, ita iha direitu, mais ema seluk mós iha direitu. Ita lori ita nia direitu viola  fali ema seluk nia direitu ne’e labele”, eis Ministru Ekonomia no Dezenvolvimentu ne’e hakotu nia entrevista ho Jornalista sira.

Entertantu, Prezidente Repúblika José Ramos Horta sei husu ba Prezidente Autoridade Rejiaun Administrativa Espesiál Oecusse-AMbeno (RAEOA) Rogerio Tiago Lobato, kona-ba kazu entre protokolu PA-RAEOA ho Jornalista destakadu Ajênsia TATOLI.IP iha Oecusse.

PR Horta sei husu PA-RAEOA kona-ba kazu protokolu ho jornalista

Aleinde ne’e, Organizasaun Jornalista Timor Leste Press Union (TLPU) sei hato’o karta kontestasaun ba Prezidente Autoridade Rejiaun Administrativa Espesiál Oecusse-Ambeno  (RAEOA) Rogerio Tiago Lobato, iha kinta-feira (06062024) aban, kona-ba kazu protokolu PA-RAEOA Aquito Roxaca Guterres ne’ebé rasta monu Jornalista destakadu Ajênsia Notisiozu TATOLI.IP Abilio Elo Nini, bainhira hala’o kobertura ba serimónia RAEOA ho TIMOR AID ne’ebé selebra akordu ba estabelesimentu muzeum Pais-Timor iha Oecusse.

Karta kontestasaun hasoru Prezidente PA-RAEOA tanba konsidera, protokolu PA-RAEOA Aquito Roxaca Guterres kontra makaas artigu 41 Lei Komunikasaun Sosiál kona-ba atentadu ba liberdade informasaun.

Editór Testu        : Amito Qonusere Araújo