G-NEWS (DILI) — Sidadaun sira iha kapitál Dili krítika makaas ba sistema dada osan iha mákina ATM, tanba sempre koa osan bainhira utiliza servisu ATM P24. Banku hirak ne’ebé uza ATM P24 mak hanesan BNCTL, BRI, BNU, no Mandiri.
Ermundo de Jesus, kliente ida hosi Banku Nasionál Komersiu Timor Leste (BNCTL), domingu (16062024) iha mákina ATM Timor Plaza, lamenta kona-ba Sistema utilizasaun servisu ATM P24, tanba banku sempre koa osan bainhira uza servisu ATM P24 tuir nesesidade loron-loron.
“Ha’u lamenta kuandu ita dada osan ka atu check ita nia osan, banku sempre koa. Ha’u nia ATM BNCTL nian”, Ermundo de Jesus, ko’alia ba G-News.
Kliente BNCTL preokupa kualidade ATM
Kliente seluk, Mario, ko’alia ba G-NEWS iha ATM Hudilaran ko’alia katak, Banku BNCTL no banku seluk ne’ebé ejisti iha Timor Leste prátika kroupsaun legal, maibé professional no sistemátika.
Nia fó rajaun katak, korupsaun legal ne’ebé banku halo mak aplika kustu sira ba utilizasaun ATM P24.
“Ita haree momoos hela katak, banku sira, hanesan BNCTL BRI, ka MANDIRI no BNU, sira halo korupsaun legal. Ita sira nia ne’ebé rai osan iha banku, atu asegura seguransa, mais dalaruma kleur-kleur ita tauk fali, tanba it aba check, sira sempre koa. Sira aplika sentavu de’it, maibé ema na’in atus ida mak check loron ida, osan hira mak sira foti ona, no kada semana, mak ema ba check, sira koa hotu osan”, Mario lamenta kona-ba ne’e.
“Ida ne’e korupsaun legal, maibé sira halo ne’e professional no sistematika. Koa neneik, ka ne’e nauk neneik, maibé bebeik, sai barak tiha, pois ita povu bain-bain mak sai vítima”, nia lamenta.
Estudante ida hosi UNTL mós lamenta kona-ba situasaun ne’ebé BNCTL aplika ba kliente sira, liu-liu utilizasaun ba servisu ATM P24. Nia dehan, Sistema ne’ebé BNCTL aplika hanesan aktu korupsaun ida.
Postu ATM kuaze Dili laran la funsiona
“ita la iha baze fundamentu ida atu dehan katak banku halo korupsaun, maibé liuhosi maneira sira ne’ebé uza, ne’e konsidera korupsaun legal. Ha’u fó rajaun katak, se loron 1 ema na’in-10 mak mai check saldo ka atu foti osan, pois aplika koa osan, ne’e sira manan hira ona, ne’e mak aktus sira ne’ebé ita konsidera korupsaun mak ne’e”, estudante UNTL Fernando ko’alia ba G-NEWS, iha jardim 5 de Maio Colmera, Dili, Domingu (16062024).
“Ita nia osan mak ita rai iha banku, pois ita ba check, mak koa fali, ne’e bulak ka lanu, se nune’e ha’u labele ba rai iha ne’ebá. Tuir loloos governu tenke haree ba ida ne’e, se lae, povu ne’e vítima ba bebeik”, Fernando haktuir.
Tuir informasaun ne’ebé Banku Nasionál Komersiu Timor Leste (BNCTL) ne’ebé fó sai list aba kustu uza servisu ATM P24 katak, bainhira kliente atu halo ATM foun ho kustu dollar 4, atu troka ATM ho kustu dollar 2, aplika sentavu 25 bainhira atu foti osan.
Enkuantu Sistema ne’e mós sei aplika sentavu 15 ba kliente sira ne’ebé atu halo transferénsia osan hosi banku BNCTL ba banku seluk. Aliende ne’e, banku mós aplika sentavu 15 ba kliente sira ne’ebé atu konsulta saldo, no bainhira atu troka pin ka kódigu, sei aplika sentavu 15.
To’o informasaun ne’e fó sai, G-NEWS seidauk halo konfirmasaun ho autoridade banku BNCTL kona-ba assuntu ne’e tanba sei iha loron férias.
Editór Testu : Amito Qonusere Araújo
loading="lazy" />