G—NEWS (DILI)— Komandante-Jerál Polísia Nasionál Timor-Leste (PNTL), Komisáriu Jerál Polísia Henrique da Costa, espesifikamente tula diviza ba ranku tranzitóriu no promosaun antiguidade ba membru PNTL na’in hitu ne’ebé hetan komplikasaun saúde. Prosesaun ne’e hala’o iha membru ida-idak nia rezidénsia tanba la konsege tuir serimónia ofisiál ne’e tanba kondisaun médiku ne’ebé limita sira nia mobilidade.
Atividade ne’e hanesan parte ida husi prosesu promosaun nasionál ne’ebé hahú iha loron 27 fulan-Marsu tinan 2025 iha Palásiu Governu. Tuir Komisáriu-Jerál Henrique da Costa, maski maioria tula diviza liuhosi serimónia ofisiál iha nível munisípiu—hanesan ida ne’ebé hala’o iha loron 26 fulan-Maiu iha Centro de Convenções de Dili (CCD)—serimónia ne’e reflete kompromisu PNTL nian atu garante direitu no respeitu ba membru ida-idak lahó diskriminasaun, inklui sira ne’ebé iha kondisaun saúde la permite.
Ho implementasaun ida ne’e, PNTL afirma nia instituisaun nia papél duplu nu’udar protetór ba seguransa nasionál no guarda ba valór umanu. Promosaun ne’e forma rekoñesimentu estruturál, no símbolu solidariedade institusionál ba lealdade no devosaun membru sira-nian, maski hasoru limitasaun fízika maka’as.
“Entaun komandante Munisípiu Dili informa ba ha’u katak iha ita nia membru nain- 7 ne’ebé mak moras iha tempu ne’eba sira la partisipa husu atu nune’e ha’u bele bai ha sira nia hela fatin atu tula hela diviza ba sira,ita rekuñese sira nia kontribuisaun ba iha instituisaun no kontribuisaun ba asegura estabelidade Timor-Leste nian, entaun ita valoriza sira tenke ba to’o sira nia fatin atu nune’E tula diviza ba iha ita nia membru sira ,” Infroma Komisariu Jerál Polisia Henrique da Costa ba Jornalista sira iha Bekora.
Komisariu Jerál Polisia Informa husi departamentu saúde indentifika sira ne’ebé mak moras permanente no mos sira ne’ebé mak moras sei tama servisu por volta 80 ital, balun halo ona tratamentu iha ospital ne’ebé mak besik.
“Departamentu saude PNTL halo tratamentu ba sira liga mos ho Ospital Nasionál no Ospital ne’ebé mak besik atu sira ba halo tratamentu, maibé ita mos la garantia ohin halo tratamentu oin di’ak kedan, mais ita nafatin esforsu liu husi departamentu saúde no mos espoza komandu PNTL nian mos kordena hamutuk ho saude sira no parseiru sira atu tau matan ba membru PNTL sira ne’ebé moras,” dehan komisariu Jerál Polisia.
Tanba ne’e atividade sira hanesan ohin ne’e ita realiza ona iha fulan kotuk hanesan iha manatutu ita to’o iha Laklubar ita ba tula diviza ba membru Polisia iha ne’eba no membru Unidade Espesial Polisia nain tolu iha dili laran ne’e hotu.
Entretantu Membru PNTL nain-7 ne’ebé moras hetan promosaun diviza husi Komandante Jerál komisariu Jerál Polisia Henrique da Costa kompostu husi Sarjentu Xefe Paulo da Costa promove ba postu Inspetór, Ajente Xefe Silbino de Jesus Promove ba postu Sarjentu Xefe, Ajente Xefe Ananias Pires da Piedade promove ba postu Assistente Inspektór, Primeiru Sarjentu Regina dos Santos promove ba postu Sarjentu Xefe, Ajente Xefe Marcos da Silva Yes Timor promove ba postu Primeiru Sarjentu, Ajente Xefe Raul Filipe dos Reis Soares promove ba postu Primeiru Sarjentu no Sarjentu Constancio Carlos promove ba Postu Sarjentu Xefe.
loading="lazy" />