G-NEWS (DILI) – Hafoin iha nota imprensa ne’ebé fó sai katak, Santu Padre Franciso sei halo vizita pastoral mai Timor Leste iha fulan agusto tinan ne’e. Iha edisaun ida ne’e, G-News halo entrevista ho sarani sira, hodi rona sira nia hanoin kona-ba vizita pastoral Santu Padre Francisco nian.
Tuir mai ita sani hamutuk
Esmeralda Lourdes
“Ha’u sente kontente Santu Padre Francisco vizita Timor Leste. Nu’udar sarani Katóliku kontente. Husu ba governu atu halo prepara másimu, nune’e simu santu Padre ho di’ak no dignu”.
Raimundo Lopes
“Agradese ba Maromak, tanba santu Padre Francisco bele mai Timor Leste. Ne’e grasa boot ida. Nu’udar ema fiar na’in, ema katóliku, sente kontente. Ha’u husu ba governu, atu halo preparasaun másimu, hanesan bee moos, eletrisidade labele mate-lakan, liña internet tenke di’ak, estrada tenke di’ak, lixu labele soer foer arbiru”.
Carolino José Lourdes Pinto
“Nu’udar Timoroan, sente kontente ho vizita Santu Padre Francisco, dehan atu mai iha fulan agusto tinan ne’e. Timoroan tomak tenke hadomi malu, respeita malu, kria pás no estabilidade, tanba Amu Papa mai ne’e, vizitante sira sei barak. Husu mós ba governu atu kria kondisaun di’ak, liu-liu listrik, labele mate-lakan, bee moos, estrada di’ak no seluk-tán”.
Filomeno de Sá
“Governu tenke rejolve hotu problema rai-laran, liu-liu problema saúde no edukasaun. Ne’e par Amu Papa mai ne’e, timoroan hotu tenke kontente. Importante mak timoroan labele odiu malu, labele oho malu. Importante ida; listrik ne’e labele mate-lakan, bee moos tenke di’ak, foer sira iha Dili laran ne’e labele soe arbiru, bee dalan sira ne’e hadia ona, nune’e evita banjir, estrada protokolu sira halo ona mudansa, komesa hadia ona, labele besik tiha mak muda tun muda sae”.
Maria de Jesus
“Ha’u sente kontente, no haksolok tebes, nu’udar Timoroan, Ho Amu Papa nia vizita ne’e hatudu sinal di’ak. Timoroan tenke hadomi malu, labele oho malu, labele odiu malu. Governu tenke halo preparasaun másimu”.
Eurico Meneses
“Ha’u husu ba governu, tenke halo preparasaun másimu. Listrik labele mate-lakan hanesan agora dadaun, labele soe foer arbiru, haree baleta sira ne’e halo didi’ak, tauk mak derepende Amu Papa mai, mak uda, pois banjir, ne’e ita moe loos, tenke buka ona alternativu seluk hodi bele hetan solusaun, labele mai mak ita hakfodak halo pengusuran orjenti, povu mak sai fali vítima. Nu’udar timoroan, ema Katóliku, sente kontente no haksolok ho Amu Papa nia vizita, ne’e ita Timoroan tenke kontente. Husu ba joven sira, labele oho malu, labele baku malu, tenke unidade no pás nu’udar maun-alin”.
Ernesto Pacheco
“Nu’udar ema katóliku, ita tenke orgullu, sente kontente tanba Amu Papa sei vizita Timor Leste. Ha’u husu ba joven sira atu labele oho malu, hadomi malu, kria pás no estabilidade iha sosiedade nia leet. Husu ba Governu, atu rejolve tiha problema sira ne’ebé akontese, nune’e Amu Papa mai ne’e, labele iha demo ka saida de’it mak akontese”.
Editór Testu : Amito Qonusere Araújo
loading="lazy" />