banner 728x90

Lian sidadania: risku ba komunidade sira hela besik mota ibun

Imajen: Supply (Facebook)
banner 120x600
67 Views

G-NEWS (DILI) – Relasiona ho udan iha semana ida ikus ne’e, ne’ebé hamosu inundasaun iha fatin sira, populasaun sira ne’ebé hela iha mota ninin tenke atensaun nafatin, no kuidadu bainhira udan iha tenpu kalan.

Nune’e, G-News, kinta-feira (14032024) dadalia ho sidadaun sira hodi husu sira nia hanoin kona-ba populasaun sira ne’ebé hela besik mota ninin no tasi ibun atu atensaun nafatin, tanba perigu ba vída bainhira udan boot iha tenpu kalan ka loron.

banner 325x300

Tuir mai ba akompaña hamutuk Timoroan sira nia hanoin kona-ba ne’e.

Teresa Ximenes, tinan 39, hela iha Bidau

“Tuir ha’u nia hanoin, iha tenpu udan hanesan ne’e, ita tenke kuidadu no antisipa nafatin, liu-liu ba família sira ka komunidade sira ne’ebé hela besik iha mota ibun no tasi ibun, inklui mós hela iha foho lolon sira, tanba ita la espera kuandu udan boot, bele estraga ema nia vída, liu-liu mak iha tenpu kalan. Derepende de’it mak udan boot iha kalan, ita atu halai hanusa, oinsa atu haree labarik sira, sasan. Tanba ne’e mak husu ba família sira ne’ebé hela iha fatin risku sira, tenke atensaun no kuidadu nafatin, tanba agora udan hela de’it. Husu ba Governu atu fó informasaun nafatin ba sidadaun sira atu nune’e bele atensaun nafatin ba kualker insidente ka asidente ne’ebé ita hotu la espera para atu akontese”.

Carlos Matias Salsinha, tinan 45, hela iha Tasitolu

“Obrigadu ba G-News, tuir ha’u nia hanoin, di’ak maluk sira ne’ebé hela iha tasi ibun no mota ibun, di’ak liu muda sementara, ba hela iha família seluk nia uma ne’ebé hela iha dook hosi fatin risku sira, tanba ikus-ikus ne’e udan iha tenpu kalan, entaun kuandu akontese udan boot, mota bele lori uma sira iha, ka tasi ibun, tasi sae, estraga hotu uma, estraga mós ita ema, tanba ita toba dukur, liu-liu labarik sira ne’ebé halai la hatene. Maluk sira ne’ebé hela iha foho loron mós tenke kuidadu tanba rai monu ka, ida ne’e mós perigu. Ha’u husu ba família sira atu kuidadu an nafatin, atu nune’e buat ne’ebé akontese, labele estraga ita nia vída. Ita hela iha sidade kondisaun mak hanesan ne’e, maibé tenke atensaun, tanba ita nia distiñu ne’e, mate hotu ona, tanba ne’e mak tenke kuidadu no atensaun nafatin”.

Efrem de Jesus, tinan 24, negosiante ambulante

“Tuir ha’u nia hanoin, udan hanesan ne’e, família sira ne’ebé hela besik mota ibun, tasi ibun no rai-lolon sira ne’e, di’ak liu muda ona ba fatin seluk, tanba agora ne’e udan hela de’it, ita tauk mak kalan udan boot mai, mota boot, ne’e bele estraga ita hotu. Ita tauk mak labarik sira, tanba ne’e muda ona, orsida haree loron manas ona, mak ba hela fali iha uma”.

Aurita Maria de Jesus, tinan 21, hela iha Bairopite

“Ha’u nia hanoin, udan boot agora dadauk ne’e ameasa ba inan-aman sira ne’ebé hela iha tasi ibun, mota ibun no rai-lolon sira, tanba ne’e risku. Ha’u husu atu halo prevensaun antes duke akontese mak prevene. obrigadu

Filomeno Carvalho Pinto, tinan 28, hela iha Becora

“Obrigadu barak ba G-News ne’ebé meúdia ne’e mai entrevista ha’u kona-ba sidadaun sira ne’ebé kontinua hela iha tasi ibun, mota ibun, ka rai-loloon. Perguntas di’ak tebes. Tuir ha’u nia hanoin, sidadaun sira ne’ebé hela iha fatin risku sira, tenke halo ona antisipasaun katak, provizoriamente mud aba fatin seluk ne’ebé seguru, tanba ikus-ikus ne’e udan hela de’it, mota tun, rai monu iha fatin-fatin, ida ne’e halo ita tauk. Tanba ne’e maki ha oportunidade ida ne’e, liuhosi mídia G-News, husu ba populasaun tomak liu-liu sira ne’ebé hela iha fatin risku sira, hanesan iha parte Bidau, Becora, Raihun, Tasitolu, Comoro, no fatin seluk tán iha área Cristo Rei, di’ak liu muda provizóriu, tanba iha tenpu kalan, situasaun sira ne’e halo ita tauk. Antisipa di’ak liu duke akontese maki ta prevene, ne’e susar oituan. Ha’u husu ba governu, atu nafatin alerta kondisaun klima, nune’e populasaun sira bele atensaun nafatin. Obrigadu ba G-News”.

Joana Lemos, tinan 50, hela iha Fatuhada

“Tuir ha’u nia hanoin, agora udan hanesan ne’e, di’ak liu família sira muda sementara ba fatin seluk, tanba ita tauk mak kalan udan boot, mota tun, ne’e estraga ona sira ne’ebé hela besik mota nininn, tasi ibun, ka rai-lolon sira”.

 Mariazinha sarmento Lay, tinan 24, hela iha Bairo-pite

“Nu’udar sidadaun, ha’u atu dehan de’it katak, agora dadauk iha tenpu udan, halo mota tun, rai monu, tanba ne’e mak ba sidadaun sira ne’ebé hela besik mota ibun, tasi ibun no hela iha rai-lolon, tenke atensaun no kuidadu nafatin, hodi halo prevensaun. Tanba ita akompaña iha facebook, iha mídia, mota tun ita haree tauk fali, bele estraga buat hotu-hotu. Tanba ne’e mak ha’u husu ba sira ne’ebé hela besik mota ibun, tenke atensaun no kuidadu nafatin. Dalan di’ak mak muda tiha ba fatin seluk, hela ho família sira, kuandu udan para mak muda fali, tanba agora ne’e iha Dili, udan la iha maibé mota tun derepende, liu-liu mota Comoro, Becora ka Bidau, ne’ebé tenke kuidadu no antisipa nafatin. obrigadu”.

Antes ne’e, autoridade lokál iha Kapitál Dili, no Governu husu nafatin ba komunidade sira ne’ebé rezidente iha mota ibun, tasi ibun no rai-lolon atu hosik ona fatin sira ne’ebé konsidera ba risku dezastre naturais, maibé to’o oras ne’e komunidade sira la preokupa. Tuir observasaun G-News, komunidade sira ne’ebé hela besik mota ibun, kontinua alarga sira nia uma ka haluan liután, inklui mós populasaun sira ne’ebé rezidente iha tasi-ibun, no rai-lolon.

Editór Testu: Amito Qonusere Araújo

relavante