Matadalan simples ida ba Eleisaun Prezidensiál EUA 2024 – Bainhira maka sei hala’o, sé maka kandidatu prezidensiál sira no saida maka mekanizmu sira?

G-NEWS (EUA) — Amerikanu millaun resin sei ba vota iha loron 5 fulan-novembru tinan 2024 hodi hili prezidente EUA tuirmai. Sé de’it maka eleitu nu’udar okupante ba Gabinete Oval iha White House iha influénsia boot ba ema nia moris, tantu iha rai-laran no mós iha rai-li’ur.

Sistema polítiku EUA nian agora daudaun domina hosi partidu rua. Entaun prezidente EUA hotu-hotu iha tempu modernu mai hosi partidu sira-ne’e ida.

Partidu Demokrátiku maka partidu polítiku ida ne’ebé liberál. Ninia ajenda polítika determina liuliu hosi luta ba direitu sivíl sira, rede seguransa sosiál ne’ebé luan, no medida sira hodi rezolve mudansa klimátika.

Partidu ida-ne’e maka partidu hosi prezidente atuál, Joe Biden, no vise-prezidente atuál, Kamala Harris.

Partidu ne’e luta ba impostu sira ne’ebé ki’ik liu, hamenus governu nia medida, luta ba direitu sira ba kilat, no mós hametin imigrasaun no abortu.

Eis-Prezidente Donald Trump maka kandidatu republikanu ne’ebé hetan ona apoiu sufisiente hodi sai hanesan Prezidente fali.

Bainhira maka sei hala’o Eleisaun Prezidensiál EUA 2024?

Eleisaun Prezidensiál Estadus Unidus nian iha tinan 2024 sei hala’o iha loron-tersa, 5 fulan-novembru tinan 2024.

Manan-na’in sei okupa White House durante tinan haat, hahú iha Janeiru 2025.

Sé maka kandidatu sira?

Iha inisiu, iha kandidatu prezidensiál na’in 15—na’in neen hosi Partidu Republikanu, na’in haat hosi Partidu Demokrátiku, no na’in rua seluk hosi kampu independente.

Husi ema na’in 15 ne’e, na’in rua maka sei iha: Kamala Harris no Donald Trump.

Kamala Harris nia naran mosu hafoin Prezidente Joe Biden fó sai katak nia sei retira hosi eleisaun prezidensiál Estadus Unidus nian.

Biden hafoin ne’e fó apoiu ba Harris hodi troka nia nu’udar kandidatu Demokrátiku.

Iha Partidu Republikanu, eis-Prezidente Donald Trump supera nia konkorente ikus liu, eis-Embaixadora Estadus Unidus nian iha ONU, Nikki Haley.

Oinsá maka Eleisaun Prezidensiál EUA nian la’o?

Bainhira sidadaun sira EUA nian ba votasaun, sira hili duni ema sira ne’ebé sei tuur iha koléjiu eleitorál.

Membru koléjiu eleitorál nia knaar prinsipál maka atu hili prezidente no vise-prezidente.

Membru sira koléjiu eleitorál nian hetan nomeasaun hosi partidu polítiku sira iha nivel estadu nian. Baibain sira maka ofisiál partidu nian ho pozisaun aas ka figura sira ne’ebé iha ligasaun ho sira nia partidu nia kandidatu prezidensiál sira.

Iha urna sira, votante sira la’ós de’it vota ba kandidatu prezidensiál sira, maibé mós ba kandidatu sira ba membru sira koléjiu eleitorál nian.

Iha boletin votu, baibain sira-nia naran mosu iha kandidatu prezidensiál sira-nia naran nia okos. Maibé, iha mós estadu sira ne’ebé la imprime naran sira hosi kandidatu sira ba membru sira koléjiu eleitorál nian.

Númeru reprezentante sira ba estadu ida-idak iha grupu ida-ne’e ajusta ba populasaun totál iha área ne’ebá.

California maka estadu ho reprezentante barak liu, maka ema na’in 55. Entretantu, estadu sira ho populasaun ki’ik, hanesan Wyoming, Alaska no Dakota Norte, inklui Washington DC, reprezenta hosi mínimu ema na’in tolu. Ema ida-idak iha instituisaun ne’e iha votu ida.

Totál membru koléjiu eleitorál hamutuk ema na’in 538. Kandidatu prezidensiál ida tenke hetan votu barak liu, 270 ka liu, atu manán eleisaun.

Normalmente, membru ida-idak hosi koléjiu eleitorál sei vota ba kandidatu prezidensiál ne’ebé hetan votu barak liu iha eleisaun jerál iha estadu.

Porezemplu, se kandidatu republikanu ida manán 50.1% hosi votu sira iha Texas, nia sei hetan votu hotu hosi estadu nia votu 38 hosi koléjiu eleitorál.

Ida-ne’e posivel tebes ba kandidatu ida atu sai popular liu iha nasionál entre votante sira, maibé la konsege hetan votu 270 hosi membru sira hosi koléjiu eleitorál.

Iha eleisaun prezidensiál 2016, Donald Trump hetan votu millaun tolu menus duké nia konkorente, Hillary Clinton.

Maibé, Trump hetan votu barak liu iha koléjiu eleitorál nune’e nia eleitu nu’udar prezidente.

Sé maka sei eleitu iha Eleisaun EUA nian?

Atensaun tomak sei ba sé maka eleitu nu’udar prezidente. Maibé iha eleisaun sira EUA nian, votante sira mós sei hili membru foun sira Kongresu nian bainhira sira prenxe sira nia boletin votu.

Kongresu EUA nian kompostu hosi Kámara Reprezentante sira no Senadu. Instituisaun rua ne’e aprova lei sira atu nune’e sira bele sai hanesan vijilánsia ba White House.

Iha loron eleisaun nian, sidadaun norte-amerikanu sira sei determina sé maka sei okupa kadeira 435 iha DPR no kadeira 33 iha Senadu.

Agora daudaun, Partidu Republikanu kontrola Kámara Reprezentante sira no Partidu Demokrátiku maka kaer Senadu.

Sé mak bele hili?

Sidadaun Estadus Unidus nian ne’ebé maka iha pelumenus tinan 18.

Bainhira mak publiku sei hatene se mak manan iha eleisaun prezidensial?

Normalmente manan-na’in ba Eleisaun Prezidensiál EUA nian fó sai iha kalan eleisaun nian. Maibé, iha tinan 2020 presiza loron balun atu sura votu hotu-hotu.

Períodu hafoin eleisaun ida koñesidu hanesan períodu tranzisaun—se iha mudansa iha prezidente.

Tempu to’o ona ba prezidente foun atu forma gabinete governu nian no halo planu ba tinan haat oin mai.

Prezidente norte-amerikanu hetan pose ofisiál iha fulan-Janeiru ne’ebé hala’o iha eskada oin hosi Edifísiu Kapitóliu nian iha Washington DC.

Fontes: BBC Indonézia