G-NEWS (DILI) — Komandante Jerál PNTL Komisariu Jerál Polísia Henrique da Costa no Segundu Komandante Jerál Komisariu Polísia Pedro Belo despede membru Polísia na’in hitu (7) ne’ebe sei hala’o estudu iha Indonesia no Japaun.
Serimónia despedida ne’e hala’o, iha Kuartél UPM Lesidere Dili, kuarta-feira (07082024).
Membru hirak ne’e, kompostu husi Unidade Polísia Marítima (UPM) na’in 6 no ida husi Komandu Pesoal no Formasaun. Husi na’in hitu (7) ne’e, na’in ne’en (6) maka sei halao estudu iha Politeknik Perkapalan Nasional Surabaya (PPNS)-Indonézia no ida seluk sei hala’o estudu iha Japaun iha area Relasaun Internasional.
Komandante UPM Superintendente Polísia Eugenio Pereira ko’alia kona-ba prosesu inisiu husi kandidatu ba bolseiru sira.
“Iha prosesu ida ne’e mai la se’es mós husi Planu Estratéjiku ka Programa ne’ebe maka Komandante Jerál no Segundu Komandante Jerál lansa ona iha ita bo’ot sira nia mandatu, relasiona oinsa maka atu hare’e ba iha kapasitasaun Rekursu Umanu nian iha instituisaun PNTL, iha prosesu ida ne’e Segundu Komandante UPM tuir orientasaun Komandu nian halo duni kontaktu ho PPNS hamutuk mós ho ekipa ne’ebe maka hetan fiar husi Komandu kona-ba sira nia aktividade ka projetu ba iha Ró ninian ne’ebe sira konsege hetan fiar, sira hanesan fontes ba iha UPM hodi halo kontaktu ho PPNS”, esplika Komandante UPM ne’e.
PPNS iha sira nia abilidade ne’ebe orienta liu ba iha asuntu Navio/Ró ninian, ne’ebe hala’i ba iha Makinista, Elektrisista, Kanalizasaun no mós ba iha Saúde Públika ne’ebe maka ligadu ba asuntu Marítima ninian.
“Ita hein katak ho aktividade ne’ebe maka sira sei hala’o durante iha estudu, sei lori ninia resultadu ne’ebe maka fó duni satisfasaun ba iha Instituisaun, atu nune’e bele rikeza liu Instituisaun ninia rekursu hodi hare’e ba iha prosesu dezenvolvimentu Instituisaun ninian tantu mós ba iha UPM”, hakotu Superintendente Polísia ne’e.
Komandante Jerál PNTL Komisariu Jerál Polísia Henrique da Costa esplika kona-ba prosesu selesaun ba bolseiru sira.
“Na’in ne’en (6) ne’e ba eskola kona-ba iha Marítima ninian ne’ebe maka ba iha area tolu (3) hanesan ida kona-ba Téknika Elektriksista ninian, ida ba iha Makinista ninian no ida seluk kona-ba Manajementu ba iha Ró ninian ka Manajement Sekurity ninian, tanba ne’e sira na’in ne’en (6) maka ba PPNS ho sira nia durasaun eskola ne’e to’o tinan ha’at (4) no tinan (5) ninian”, haktuir Komandante Jerál PNTL ne’e.
Komisariu Jerál Polísia ne’e afirma tan katak, sira tuir ona selesaun ne’ebe maka hala’o internal ita nian, tantu edukasaun, tantu saúde ninian sira halo selesaun hotu hafoin aprezenta ba iha Universidade, sira hare’e katak priense duni rekezitu entaun hodi simu ita nia membru sira ba eskola. Sira nia dokumentu hotu ita prepara ona no billete mós ohin entrega ona, iha loron 11 agora sira sei aranka ba Indonesia atu nune’e hodi kontinua eskola no ida seluk fila fali sei aranka iha loron 3 fulan Setembru ba Japaun.
“Ita hahu’u investe agora, mezmu ita haruka ita nia ema sira ba, ita sei limita nafatin ita nia membru hala’o servisu maibé ita fiar katak hafoin remata eskola, fila mai bele dezenvolve Instituisaun diak liu tan, prosesu ne’e ita loke ba membru PNTL hotu maibé hafoin aplika iha UPM na’in lima (5) maka liu no na’in ida fila fali husi sira Regular ninian, maibé ba oin ita nafatin loke tanba ita sei kontinua iha tinan oin hodi loke ba membru sira seluk atu nune’e bele aplika”, haktuir Komisariu Jerál Polísia ne’e.
Autoridade másimu Instituisaun Seguransa ne’e subliña tan katak, hafoin remata estudu, membru sira ne’e sei kontinua koloka iha UPM tanba sira ba estudu iha area Marítima nian. Programa ida ne’e ita foin maka realiza tanba iha fulan Dezembru tinan kotuk, ita asina ona akordu ho Universidade Surabaya ninian, entaun liu husi asina akordu ida ne’e maka ita foin implementa ba ida ne’e.
“Ida ne’e mós alinea ho ita nia Planu Prioridade tinan lima (5) Komandu ninian, espesialmente ba iha dezenvolve kapasidade rekursu umanu Polísia ninian, mezmu ita hare’e katak ekipamentu sira ne’ebe maka UPM utiliza sei mínimu maibé Komandu apoiu husi governu ninian ita nafatin buka oinsa atu nune’e bele kompleta ekipamentu sira ne’ebe iha UPM presiza espesialmente hanesan Ró”, hatutan Autoridade másimu Instituisaun Seguransa ne’e.
Editór Testu : Amito Qonusere Araújo
loading="lazy" />