G-NEWS (DILI) – Foin lalais ne’e, Polísia Siéntifiku Investigasaun Kriminál (PCIC_sigla Portugés) ho númeru ofísiu 0161/23.PDDIL, notifíka Jornalista João da Costa hosi mídia RTTL-EP, hodi presta deklarasaun ho kualidade hanesan testamuña ba krime violação de domicíliario, tuir kódigu Penál Timor-Leste artigu 185 tanba deskonfia komete krime, no Xefe Redasaun Jornal INDEPENDENTE Jorgino dos Santos atu presta depoimentu hanesan sasin ba Crime Violasaun Segredu Justisa, ne’ebé previstu iha artigu 291, husi Kódigu Penal Timor-Leste.
Prezidente Konsellu Imprensa Otelio Ote, ba G-News segunda-feira (04122023) katak, Konsellu Imprensa observa notifikasaun ba jornalistia sira atu presta deklarasaun kona-ba kazu ruma relasiona ho konsekuênsia hosi produtu jornalistiku, hatur jornalista iha perigu nu’udar matan, tilun no ibun ba sosiedade hodi hato’o informasaun ne’ebé livre no Independente.
“Iha kódigu étika jornalista, hatur ona katak, jornalista tenke kaer segredu identidade no deklarasaun balun hosi fontes hodi la tau perigu ba fontes, tanba bele hatodan tán konsekuênsia legál ba fontes. Notifika Jornalista ba presta deklarasaun, infelismente tau ona jornalista nia asaun nu’udar asaun krime, espera autoridade la eleve estatutu hosi sasin ba suspeitu ka autor”, haktuir Otelio Ote.
Bainhira autoridade sira la tau konsiderasaun ba servisu jornalista no míia sira, no la konsidera prosesu rezolve kazu ne’ebé relasiona ho produtu jornalistiku, no la la’o tuir mekanizmu no prosesu jornalistiku, mídia iha Timor-leste sei muda ba situasaun no kondisaun perigu no ameasa nia laran.
Tanba tuir Otelio Ote katak, kondisaun ne’e influênsia prestasaun mundial kona-ba liberdade imprensa ne’ebé Timor Leste agora goza hela númeru 10 mundial no númeru 1 iha Sudeste Aziatiku.
“Konsellu Imprensa la dehan seidauk hateten katak iha Lei meius Komunikasaun Sosial. Konsellu Imprensa hakarak dehan hatene ou la konsidera Lei Meius Komunikasaun Sosial nu’udar baze legál ba tratamentu jornalista sira no instituisaun mídia relasiona ho produtu jornalistiku”, Prezidente Konsellu Imprensa esplika.
Produtu jornalistiku tenke rezolve liuhosi maneira prosesu no mekanizmu jornalistiku, mak :
Hato’o direitu de resposta ba publikasaun, hato’o direitu Retifikativu ba publikasaun, no hato’o keixa ba Konsellu Imprensa.
Bainhira maneira tolu prienxe ona mak entre parte rua la konkorda nafatin mak bele lori ba Tribunal. Iha tribunal mak Juiz presiza rona jornalista, organizasaun jornalista nia deklarasaun mak bele halo notifikasaun ba jornalista atu mai presta deklarasaun iha Tribunal.
“Atu ba futuru la repete bebeik notifikasaun ba jornalista, Konsellu Imprensa husu ba autoridade sira, atu buka hatene Lei Komunikasaun Sosial, konsulta ba Konsellu Imprensa kona–ba oinsa rezolve ka bukan hatene kona–ba notisia ida nia konteudu”, Nia esplika.
Prezidente Konsellu Imprensa Otelio Ote husu ba sosiedade tomak atu hato’o keixa saida de’it ba Konsellu Imprensa relasiona ho produtu jornalistiku nune’e halo mediasaun.
Jornalista : Ekipa G-News
Editór Testu : Amito Qonusere Araújo
loading="lazy" />