G-NEWS (DILI) – Sábadu (04112023) dáder, Primeiru-Ministru Kay Rala Xanana Gusmão, hala’o vizita urjente ba Komandu-Jerál PNTL, atu fó orientasaun ba Komandante-Jerál hodi solusiona insidente ne’ebé akontese iha Postu Bobonaro munisípiu Bobonaro.
Hafoin remata enkontru ho Komandante-Jerál no segundu Komandante-Jerál PNTL, Primeiru-Ministru Kay Rala Xanana Gusmão ba Jornalista sira, husu ba povu tomak liu-liu joven sira atu atu hakotu ona violênsia ba malu.
“Ha’u halo apelu ba povu tomak, hosi aman, inan, to’o oan sira liu-liu joven sira. joven sira uluk, imi nia aman, inan mate ba rai ida ne’e, agora imi oho malu tanba buat ida ke la folin buat ida”, PM Xanana hato’o lia ne’e.
“Ha’u husu ba Na’i Lulik sira, aban reja netik ba, par fase tiha joven sira nia ulun, tanba ita haree iha uma laran, banin ho mane foun, di’ak malu hela tanba ai-funan kuandu tau iha ne’ebá, hirus malu, tanba ida pertense ida, ida ne’ene”, Primeiru-Ministru ne’e aumeta tán.
Iha biban ne’e mós, Kay Rala Xanana Gusmão husu ba matebian sira atu hamoos joven sira nia ulun, nune’e bele fó válor ba sakrifísiu sira ne’ebé halo iha tempu pasadu.
“Husu ba matebian sira, ne’ebé foin dadauk ita ba tau ai-funan, hamoos oituan labarik sira, joven sira nia ulun, tanba lae, la fó válor ba imi nia sakrifísiu. Ohh matebian sira…..ajuda ami ba”.
Tuir Primieru-Ministru ne’e katak, problema hamlaha seidauk rejolve, maibé problema oho malu ne’e mak susar oituan.
Alende ne’e, Xanana mós husu ba autoridade komunitária sira, liu-liu xefe suku no xefe aldeia atu bolu joven sira hodi kria pás no dame iha sosiedade nia leet.
“Xefe suku no xefe aldeia ne’ebé mak foin dadauk mak hili imi, hamri’ik ba, bolu joven sira, hamutuk ba, ha’u sente katak joven sira ne’ebé pertense arte marsiais nunka ba misa, tanba iha misa antes ba komuñiaun, Na’i Lulik dehan, dame malu ba, ita hakuak malu, ida ne’e komu la ba misa nunka dame, kaer liman mós ne’e bosok teen ida, tanba laran ne’e sira faan tiha ona ba arte marsiais”, PM bolu atensaun.
“Ita besik ona ba 28 de Novembru, ita besik tán Natal, Ano Novo, favor ida, joven sira. Ha’u mós hamutuk ho Polísia, baku malu ha’u sei kaer imi, lakleur ha’u sei halo fali prizaun ba de’it imi, la han la hemu”, PM Xanan esklarese.
“Katuas sira uluk mate, la husu buat ida ba sira, mate tanba ita nia rain ne’e ukun an tiha, imi ba lori fali Arte Marsiais hosi fali Indonézia nia mai, mai baku malu fali iha ne’e, oho malu fali iha ne’e”, PM Xanana hakotu.
Entertantu, Komandu-Jerál PNTL orienta ona apoiu seguransa hosi Unidade Polísia Espesial no Batalliaun Ordem Públika hodi asegura seguransa ba populasaun sira iha Bobonaro.
Jornalista : Ekipa G-News
Editór Testu : Amito Qonusere Araújo
loading="lazy" />