G-NEWS (DILI) – Timor Leste Press Union (TLPU) kondena karta notifikasaun hosi Polísia Siéntifiku Investigasaun Kriminál (PCIC_sigla Portugés) ho númeru ofísiu 0161/23.PDDIL, ba Jornalista João da Costa hosi mídia RTTL-EP, iha loron 20 fulan Novembru, hodi presta deklarasaun iha loron 23 novembru, ho kualidade hanesan testamuña ba krime violação de domicíliario, tuir kódigu Penál Timor-Leste artigu 185 tanba deskonfia komete krime.
“Jornalista Radio Televizaun Timor-Leste, João da Costa, Iha loron 15 Fevereiru 2023, tuku 17:00, lokoraik, hetan konvite kobertura hosi ekipa PNTL liuhosi Departamentu Investigasaun Kriminál Nasionál hodi halo kobertura ba ezekusaun mandadu husi Tribunál Distritál Dili ho numeru núc 06/23/PNSIK hasoru suspeitu inisiál JC kaben husi sra. Zenilda Gusmão iha nia rezidénsia Bidau-Akadiruhun-Dili”, Sekretáriu-Jerál TLPU Zezito da Silva, hato’o liuhosi tuir karta komunikadu Imprensa ne’ebé G-News asesu, iha loron kinta-feira (30112023).
“Rezultadu kobertura ne’e halo publikasaun, iha loron hanesan iha tuku 20:00, ho títulu “DIK kaptura suspeitu JC deskonfia komete kazu abuzu seksuál hasoru menor”, haktuir iha komunikadu ne’e.
Alende ne’e, Xefe Redasaun Jornal INDEPENDENTE Jorgino dos Santos simu notifikasaun ba Polisia Sientifika Investigasaun Criminal (PCIC), iha loron 30 novembru, tuku 09h00 atu presta depoimentu hanesan sasin ba Crime Violasaun Segredu Justisa, ne’ebé previstu iha artigu 291, husi Kódigu Penal Timor-Leste.
“PCIC notifika Xefe Redasaun Jornál INDEPENDENTE ho baze ba kobertura no halo publikasaun ba notisia kona-ba ezekusaun mandadu buska, apreensaun no detensaun ba Longuinhos Monteiro. Ho Púbikasaun ne’e Prezidente Repúblika, José Ramos Horta lamenta no hatama keixa ba Ministériu Públiku atu prosesa no krimináliza obra Jornalístiku”, haktuir komunikadu Imprensa TLPU nian.
“Iha prosesu presta deklarasaun ne’e, Investigadór PCIC ida hatudu pedidu hosi Ministériu Públiku ba Jornalista João da Costa no Xefe Redasaun Jornal INDEPENDENTE katak la’ós ona testamuña tuir karta notifikasaun, maibé sai fali suspeitu ba krime violação de Demicíliario no Violasaun Segredu Justisa”, kontinua iha komunikadu imprensa.
Sekretáriu-Jerál TLPU Zezito da Silva ne’e konsidera mós katak, karta notifikasaun ba indetifikasaun ne’e, ho intesaun hodi kriminaliza produtu jornalistiku no hamate Liberdade Imprensa, liuliu hamate independénsia média nian no independénsia órgaun komunikasaun sosiál ho objetivu hametin Estadu direitu demokrátiku.
Hafoin TLPU rekolla dadus no akompaña prosesu hotu inklui obra jornalistiku hirak ne’ebé rekolla no públika iha Radio Televizaun Timor-Leste no Jornal INDEPENDENTE prenxe duni lei komunikasaun sosiál iha artigu 2 no kódigu dentolojia jornalista nian.
Tanba ne’e Organizasaun Timor Leste Press Union (TLPU) husu ba Ministériu Públiku no Tribunál ho tempu urjente atu arquiva keixa ne’e, tanba sidadaun ne’ebé hato’o keixa ne’e hakarak kriminaliza obra jornalístiku kontra ona konstitusaun Repúblika iha artigu 40 no 41.
“Husu ba Prezidente Repúblika, José Ramos Horta, atu kontinua fó hanoin ba sidadaun hotu no entidade polítika, seguransa no judisiáriu atu labele kriminaliza jornalista ho nia obra jornalístiku tanba fó ameasa ba Liberdade esprasaun no impresa iha Timor-Leste”, haktuir iha karta komunikadu.
“TLPU ejize ba MP no atu halo anulasaun ba estatutu “Suspeitu” hasoru Jornalista João da Costa no Xefe Redasaun Jornal INDEPENDENTE, Jorgino da Costa, tanba notísia sira ne’e ho baze ba kobertura atividade ekipa seguransa sira ne’ebé ezekuta mandadu hosi Ministériu Públiku”, Zezito da Silva mensiona iha karta komunikadu imprensa.
Organizasaun Jornalismu ne’e mós Ejize ba Ministériu Públiku atu anota sidadaun ne’ebé hato’o keixa tanba obra jornalístiku bele submete ba Konsellu Imprensa hodi halo negosiasaun liuhosi uzu direitu resposta no ratifikasaun ho baze ba lei komunikasaun sosiál artigu 2 iha aliña F katak “Direitu hodi halo loos”, direitu ba ema singulár ka koletivu ida-idak hodi halo loos notísia ne’ebé publika ka fó-sai faktu be laloos kona-ba nia.
“Ikus liu TLPU husu ba Públiku tomak katak Jornalista ne’e la’ós krime, tanba ne’e bainhira sidadaun sente katak servisu jornalizmu iha buat ruma la loos, Lei Komunikasaun Sosiál nian iha atu rezolve no halo mediasaun la’ós lori kódigu penál akuza jornalista tanba de’it ninia obra jornalístika”.
Ho prosesu identifikasaun ne’e, TPLU sente hakfodak no triste, tanba Jornalista bá iha fatin refere atu halo kobertura ba atividade no halo publikasaun ba autoridade seguransa sira ne’ebé ezekuta mandadu hosi Ministériu Públiku, tanba ne’e laiha dalan katak Jornalista mak sai fali suspeitu ba krime rua ne’e.
To’o informasaun ne’e fó sai, G-News seidauk hetan komentáriu ruma hosi autoridade investigador PCIC.
Jornalista : Ekipa G-News
Editór Testu : Amito Qonusere Araújo
loading="lazy" />