G-NEWS (DILI) – Relasiona ho prosesu eleisaun xefe suku nian ne’ebé hala’o iha territóriu nasionál, mosu problema barak, liu-liu kona-ba kandidatu sira la iha kampaña eleitóral ba eleitór sira iha nível suku, problema bulletin de votu, oras eleisaun, eleitór balun la vota tanba kestaun tenpu, no problema seluk-tán, iha ne’ebé hamosu krítika oi-oin hosi sidadaun sira.
Ho preokupasaun sira ne’e, sidadau ida hosi munisípiu Covalima Augosto de Jesus Lopes, ba G-News, sábadu (28102023) katak, Ministru Administrasaun Estatal la sériu atu organiza prosesu tomak eleisaun komunitáriu, nune’e fó impaktu ba sidadaun sidadaun sira atu ezerse direitu ba votu nian.
Augusto esplika, tuir loloos Ministru Administrasaun Estatal tenke sériu ba implementasaun eleisaun suku nian, nune’e bele fó susesu ba polítika governu nian, ne’ebé lidera hosi Primeiru Ministru Kay Rala Xanana Gusmão.
“Ha’u hanoin Ministru Administrasaun Estatal Tomas Cabral falla atu organiza eleisaun suku nian. Tuir loloos, Ministru ne’e tenke halo koordenasaun ho STAE no CNE atu, hodi fó susesu ba eleisaun komunitáriu, maibé ita haree membru governu sira halimar mak barak, no dalaruma mós la iha kapasidade atu jere, ikus estraga buat hotu-hotu”, Nia kestiona.
Iha parte seluk, estudante UNTL Abrã0 Ximenes, ne’ebé ezerse nia direitu votu iha suku Becora ba G-News afirma, eleisaun suku tinan ne’e lao sabraut, tanba governu la organiza didi’ak.
“Ha’u kestiona kapasidade kapasidade Ministru Administrasaun Estatal señor Ministru Administrasaun Estatal Tomas Cabral, hamutuk ho instituisaun relevante sira hanesan Prezidente CNE no Diretór-Jerál STAE. Sira organiza Eleisaun Prezidensial no Parlamentar mak uza sira nia esforsu tomak, ne’e tanba atu hetan kargu ka konfiansa, maibé ba eleisaun suku, sira hanesan halimar de’it, tanba xefe suku sira la iha poder ka influensia”, Abrão esplika.
Tanba ne’e, nia husu ba Primeiru Ministru Kay Rala Xanana Gusmão, atu fó atensaun másimu, ezonera hosi kargu, liu-liu Ministru Administrasaun Estatal Tomas Cabral, hamutuk ho Prezidente CNE no Diretór-Jerál STAE, hanesan komprimisu polítika ba Primeiru Ministrun nian, ba membru governu tomak durante loron 120.
Iha parte seluk, joven ida hosi Suku Lequitura, iha postu Laulara munisípiu Aileu Arlindo Gusmão hateten, ho problema kona-ba eleisaun suku ne’ebé akontese, hetan krítika makaas hosi sidadaun sira, no konsidera Ministru Tomas Cabral la iha kapasidade. Tanba ne’e nia husu ba Xefe Governu atu ezonera ona governante refere, tanba gasta orsamentu barak maibé rejultadu la fó satisfasaun ba povu.
“Ita haree povu balun la vota, pois ita haree mós prosesu eleisaun komunitáriu nian ne’e falla, no iha diferensia boot maske eleisaun suku ne’e akontese de’it iha nível suku, kompara ho eleisaun prezidensial no eleisaun parlamentar, maibé eleisaun suku la susesu tinan ne’e. Ne’e signifika katak, Ministru Tomas Cabral la iha kapasidade, no mais pior mak STAE no CNE mós la halo sosializasaun, ka preparasaun di’ak”, Arlindo haktuir.
To’o informasaun ne’e fó, G-News seidauk hetan deklarasaun ofisial hosi Ministru Administrasaun Estatal Tomas Cabral kona-ba assuntu ne’e.
Jornalista : Ekipa G-News
Editór Testu : Amito Qonusere Araújo
loading="lazy" />