G-NEWS (DILI) – Hafoin loron eleisaun suku ne’ebé akontese iha territóriu nasionál, iha sábadu (28102023), sidadaun sira ezerse sira nia direitu votu ba, atu hili Xefe Suku, ho dalan demokrasia, iha ne’ebé servisu administrasaun estadu no privadu sira férias, maibé professional jurnalismu sira la férias, no kontinua hala’o kobertura hodi transmite informasaun ba sosiedade tomak liuhosi mídia sira.
Jornalista sira ne’ebé hala’o kobertura, sempre hetan impedimentu hosi autoridade sira direita no indireita, maibé iha âmbitu eleisaun suku tinan ne’e, Jornalista sira ne’ebé hala’o kobertura la hetan ameasa no la hetan impedimentu ba atividade jornalismu nian.
Sekretáriu-Jerál Timor Leste Press Union (TLPU) Zezito da Silva, ba G-News, Sábadu (28102023) apresia jornalista sira ne’ebé nunka kolen hopdi rekolla informasaun sira kona-ba prosesu tomak eleisaun suku nian, hodi transmite ba sidadaun tomak.
“Eleisaun suku, ohin, akontese 28 outubru iha territóriu nasionál. Kona-ba kobertura jornalista sira nia iha eleisaun demokratiku ida-ne’e. TLPU agradese ba jornalista tomak ne’ebé halo kobertura ba aktu eleitorál”, Sekretáriu-Jerál TLPU esplika.
“TLPU apresia ba jornalista tomak ne’ebé la hatene kolen, sai nafatin lian ba lian laek sira, maske netizen barak mak dalaruma trata jornalista sira iha plataforma sira maibé ida ne’e hanesan korajen ida ba jornalista, firme nafatin hodi servi povu no nasaun liuhosi imi nia servisu ne’ebé peofisional tebes. Korajen ba jornalista sira, mantein nafatin profisional, respeita kódigu deontolojia jornalizmu nian”, nia aumenta tán.
TLPU to’o agora seidauk simu keixa ruma hosi jornalista sira ne’ebé halo kobertura iha ámbitu eleisaun demokratika ida-ne’e, maibe TLPU fó korajen nafatin ba jornalista sira atu halo kobertura ne’ebé di’ak liu ba festa ida-ne’e. Fó sai saida mak Jornalista sira observa no entrevista iha terenu ho objetividade, kredivel no konfiavel.
Sekretáriu-Jerál TLPu ne’e husu ba entidade tomak atu kolabora ho jornalista sira, nune’e bele transmite informasaun sira ne’ebé kredivel ba sidadaun.
Tuir nia, papel jornalista iha eleisaun suku importante tebes, tanba bele atualiza atividade governativa nomeadamente eleisaun ba lideransa komunitáriu, no sai ponte ba povu no Governu liuhosi reportajen sira, oinsa fanu povu no Governu kona-ba partisipasaun ema hotu nian iha eleisaun suku no kontrola mós implementasaun programa kona-ba lalaok eleisaun, ajuda informa ba Governu liuhosi reportajen sira kona-ba erru eleitorál sira ho objetivu atu ba oin bele hadiak liután.
“Ba maluk jornalista tomak ne’ebé halo hela kobertura iha eleisaun suku, imi labele tauk fó sai situasaun saida deit mak akontese iha sentru votasaun sira, imi labele tauk hodi publika karik iha erru eleitorál, tanba imi mak tilun, ibun ba sosiedade nian, nafatin kumpre kodigu etika. Hakuak boot ba imi jornalista sira, kuidadu imi nian iha ne’ebé de’it, kuidadu imi nia saude”, nia hakotu. TLPU mantein hodi monitoriza kobertura jornalístika, liuhosi rezultadu obra sira nian”, Nia hakotu.
Entertantu, tuir Indice Mundial Liberdade Imprensa tinan 2023, Timor Leste okupa númeru 10 di’ak liu iha mundu, no númeru ida di’ak liu iha rejiaun Sudeste Azia nian.
Jornalista : Ekipa G-News
Editór Testu : Amito Qonusere Araújo
loading="lazy" />