G-NEWS (RAEOA) – Populasaun Suku Banafi hamutuk familia rihun ida atus hitu lima-nulu (1750), ne’ebé partisipa loron nasionál Proklamasaun Independésia iha Ambeno-Oecusse hamutuk na’in 257 ho kareta truck 4 no angguna 4, ne’ebé mai husi ferik no katuas inklui joven no labarik sira.
Komunidade hirak ne’e hala’o viajen husi Suku Banafi to’o Oecusse villa durante oras ida ho balun, maski kondisaun estrada la di’ak, maibé sira hatudu espíritu Nasionalizmu hodi partisipa serimónia nasionál Proklamasaun Independénsia 28 Novembru ba dala-49.
“Ha’u hamrik iha populasaun nia oin ne’e iha loron manas loos. Tanba ha’u hakarak ho simplesidade hodi hatudu ba komunidade suku Banafi”, Xefe Suku Banafi Jorge Lalus, ko’alia ba G-News, sesta-feira (29112024).
Maski Komisaun Organizadora bolu autoridade lokál RAEOA tomak hodi priense fatin ne’ebé komisaun prepara, maibé Xefe Suku Banafi Jorge Lalus foti desizaun, hodi rejeita, no hakarak hamrik hamutuk ho nia populasaun iha loron manas.
Jorge Lalus dehan, Xefe suku hotu-hotu ba tur iha fatin ne’ebé komisaun organizadora prepara, maibé nia rasik deside hodi rejeita, no mantein hamrik iha loron manas ho nia populasaun sira.
“Xefe suku sira bolu ba oin, maibé Ha’u lakohi, no hodi hamrik ho ha’u nia populasaun iha loron manas. Xefe suku sira seluk ba hotu tur oin”, Jorge Lalus subliña ba G-NEWS.
Nia dehan tán, depois serimónia hasae bandeira Nasionál remata, autoridade komunitáriu hotu ba simu transporte hanesan motorizada, ne’ebé prepara no fasilita husi autoridade Rejiaun Administrativa Espesiál Orcusse-Ambeno (RAEOA).
Tanba ho Xefe Suku Banafi nia simplesidade, populasaun Suku Banafi mós mantein hamrik iha loron manas hodi hein sira nia lideransa komunitária ba simu motirizadas, depois simu tiha mak foin ba buka fatin hodi deskansa.
“Sira hein to’o ha’u mai, mak hau dehan ita ba ona, depois ba ami nia fatin”, Jorge Lalus ssklarese.
“Ami agradese ba loron nasionál Proklamasaun, ha’u ho ha’u nia populasaun prontu simu servisu todan ka kmaan, hodi servisu ba rai ne’e”, nia hakotu.
Xere Suku Banafi lidera populasaun aldeia 3 Kuanobe, Hautefu no Neofmetan.
Simu motor husi Autoridade RAEOA apoiu servisu suku
Jorge Lalus ko’alia ba G-NEWS katak, ho transporte hanesan motorizada ho marka Supra Revo Fit ho Verza, sei apoiu servisu administrasaun suku nian, no ida seluk, nia rasik mak sei uza hodi hala’o servisu, liu-liu observa problema ne’ebé komunidade aldeia tolu enfrenta.
Maski nune’e, autoridade lokál ne’e preokupa mós kona-ba problema estrada no bee moos ne’ebé komunidade enfrenta, tanba entre aldeia 3, tanba populasaun iha aldeia Buanove obrigadu tenke ba kuru bee iha mota, kuaze la’o oras ida ba no mai hodi asesu ba bee moos.
“Problema iha suku Banafi, dalan la di’ak, bee menus. Bairo Buanove bee seidauk iha. Komunidade ba kuru bee iha mota de’it, oras ida ba mai”, Jorge Lalus ko’alia ba G-NEWS.
Ho problema ne’e, nia parte halo ona proposta, no Ajensia UNDP halo ona survey iha tinan 2023, maibé to’o oras ne’e seidauk iha solusaun.
Entertantu, mandatu Presidente RAEOA ne’e seidauk observa populasaun nia problema hanesan estrada, no bee moós. “Mandatu agora seidauk ba haree”.
Problema postu saúde iha Banafi
Iha Suku Banafi ne’ebé lídera husi Jorge Lalus, iha ona postu Saude hodi fó atendimentu ba populasaun sira, maibé rezidente sira sei enfrenta problema.
Nia fó sasin katak, to’o oras ne’e postu saúde iha de’it parteira no enfermeiru na’in ida ne’ebé durante ne’e fó atendimentu ba komunidade.
“Sentru Saude ida Besatoko. Iha médiku hanesan enfermeiru ida no Parteira ida. Problema aimoruk; dalaruma la iha, no la iha ambulánsia.
Tanba ne’e, Xefe Suku ne’e rekomenda ba autoridade Saúde atu aumenta númeru médiku iha Suku Banafi.
“Ha’u iha rekomendasaun, suku Banafi dook husi Villa, ha’u husu doutor ida, depois ambulansia”.
Tuir Xefe suku ne’e katak, komunidade rasik mós lamenta kona-ba situasaun ne’e, maibé Jorge Lalus akonsela nafatin no husu ath pasiensia nafatin hodi hein desizaun autoridade nian.
“Komunidade lamenta tanba dook, ha’u hateten ba sira, ita hein, bainhira aimoruk mai ita ba, la iha, ita pasiensia. Komunidade hirus maibé ha’u dehan labele hirus tanba ita dook”, nia subliña.
Maski nune’e, ekipa médiku kontinua tama sai bairro hodi halo tratamentu movel, liu-liu imunizasaunkada ba komunidade sira.
Entertantu, Suku Banafi iha Eskola ensinu Ensinu Baziku ida Noetoko, ida seluk iha Besatoko no ida fali iha Kusi. Enkuantu ensinu Pré-Sekundária ida iha Noe Toko, no eskola Katólika ida iha Nefomtasa.
Editor Testu: Amito Qonusere Araújo
loading="lazy" />