Jornalista : Arménio.
G-RTV.com (Dili) : Atu Lidera FALINTIL-Forsa Defeza Timor Leste (F-FDTL), hodi troka Xefe Estadu Maior Jenerál F-FDTL, Tenente Jenarál Lere Anan Timur (LAT), Prezidente Repúblika (PR) Francisco Guterres Lu-Olo deside fo konfiansa ba atuál Vise-Xefe Estadu Maijór Jenerál, Maijór Jenerál Falur Rate Laek.
Konfiansa ne’e hetan hafoin Tenente Jenerál LAT, hatama karta pedidu reforma ba Guvernu iha loron 17/01/2022 no liu tiha loron 4 (21/1), Guvernu liu husi reuniaun Konsellu Ministru (KM) Extraordináriu, aprova karta pedidu ne’e hodi ezonera Tenente Jenerál LAT, nomeia fali Maijór Jenerál Falur Rate Laek husi Vise-Xefe Estadu Maior Jenerál promove bá Xefe Estadu Maior Jenerál hodi lidera F-FDTL.
Hafoin Guvernu lori Proposta nomeiasaun ne’e ba PR, no PR konvoka fali enkontru Konsellu Superior Defeza no Seguransa iha loron 27/01 hodi rona hanoin sira, no ikus mai PR deside hodi aseita proposta guvernu hodi nomeia Falur Rate Laek ne’ebé ho naran kompletu Dominggos Raul atu troka LAT nia pozisaun.
Konabá kargu Vise-Xefe Estadu Maior Jenerál, PR sediauk deside maske antes ne’e, guvernu moos propoin ba PR liu husi reiuniaun Konsellu Ministru nian atu nomeia atuál Xefe Estadu Maijór, Brigadeiru Jenerál Calisto Dos Santos Coli ‘’Coliati’’ promove ba Vise-Xefe Estadu Maior Jenerál.
‘’Promossaun ne’e, aban fo de’it ba Xefe Estadu Maior Jenerál, desijaun ba Vise nian, sei hein husi PR’’. Dehan Ministru Defeza, Brigadeiru Jenerál (REF), Filomeno Paixão hafoin partisipa iha serimónia graduasaun ba kadetes F-FDTL foun iha metinaru, Segunda ne’e. (31/01/2022) .
Nune’e, aban iha loron 2/02/2022, sei hala’o serimónia offisiál ne’ebé sei lidera husi PR Francisco Guterres Lú-Olo nu’udár mos Komadante Supremu Forsa Armada nian, hodi fo posse ba Falur Rate Laek hodi lidera F-FDTL, iha Kuartél Jerál F-FDTL, Fatuhada, Dili.
(Remata)
loading="lazy" />