Jornalísta : Arménio //
G-RTV.com (Lautém) : Tuir oráriu kampaña ne’ebé aprova husi Comisão Nacional Eleições (CNE) iha loron hirak liu bá, ohin (02/03), hahú ezekuta husi kandidatu prezidente repúblika períodu 2022-2027 hamutuk na’in 16.
Iha oráriu refere, Premiadu Nóbel bá Páz José Ramos Horta sei hahu nia kampaña iha rai-ulun, munisípiu Lautém, postu-administrativu Lospalos-Villa, no atuál Prezidente Repúblika, Francisco Guterres Lúolo hahu iha rai-ikun, Reziaun Autónomu Espesiál Oekusé-Ambeno (RAEOA).
Enkuantu, kandidatu prezidente husi partidu KHUNTO, Armanda Berta Dos Santos, sei hala’o nia abertura kampaña iha rai-klaran, Munisípiu Ainaru nu’udár mós nia munisípiu rasik.
Tuir razaun balun ne’ebé G-RTV.com assesu katak, Xanana Gusmão hamutuk ho Ramos-Horta hili munisípiu Lautem ba kampaña abertura tambá istórikamente iha funu nian, Lautém ne’ebé koñesidu ho naran ponta leste, sai nu’udár baze primeiru ne’ebé Xanana re-organiza funu iha períodu 1980.
Entretantu, kandidatu prezidente repúblika sira ne’ebé sei hahu nia kampaña iha munisípiu Lautém mak Martinho Gusmão ho nia númeru sorteiu 13 iha Mehara, Maria Angela Freitas ho númeru sorteiu 3 iha kampu futeból munisipál, inklui Ramos-Horta ho númeru sorteiu 14 iha kampu 744 (eis-akampamentu F-FDTL). (Remata).
loading="lazy" />