Apoiu Husi Traballadór Timor-Oan Sira Iha Rai-Liur, Arquidiocese Dili Hahu Distribui.

G-RTV News (21/04/2021): Inundasaun ne’ebé akontense iha loron 04 Fulan ida ne’e, rezulta vítima  liu rihun ida resin lakon Uma, lakon sasan inklui lakon vida.

Husi Situasaun ida ne’e,  ArquiDiocese Dili liu hetan apoiu husi Timor-oan sira servisu iha rai-liur hanesan Korea, Europa, Astralia atu tulun maluk sira ne’ebé afeta husi inundasaun  no iha kuarta Feira ne’e hahu distribui.

‘’Husi situasaun difísil ida ne’e, iha ema balun ne’ebé hakarak solidariza sira nia moris iha ema seluk nia terus, ho nune’e ita nia maluk sira ne’ebé servisu iha estranjériu la servisu ba-an de’it maibé sira hakarak fahe oituan ne’ebé sira iha ba maluk sira ne’ebé afeta ba inundasaun’’. tenik reprezentante Arcebispo ArquiDiocese Dili, Pe. Paulos Maia Iha fatin serimónia distribuisaun apoiu sosiál, iha Parókia Santa Terezinha do Menino Jesus, Dili, Kuarta –Feira ne’e.

Atuál Cancheler Arquidiocese Dili afirma tan konabá apoiu sosiál ne’ebé iha tamba maluk sira seluk hakarak sente terus ne’ebé família vítima sente.

‘’Ho ida  ne’e ita agradese ba Maromak tamba sira bele tulun ita, no sira hakarak sente duni saida mak família vítima sira sente iha situasaun difísil ida ne’e’’. Haktuir nia.

 Padre Diocesano ne’ebé mai husi rai Ermera, esklarese liutan, apoiu sosiál ne’ebé iha la’ós de’it ba fatin ida maibé ba família afetadu sira iha Dili Laran no Munisípiu seluk.

Nune’e mós, Pe. Alberty Franco Morato, relata katak ‘’Iha Parókia ida ne’e, refuziádu hamutuk família 58 mai husi aldeiA 4 no husi verifikasaun difini Uma-kain 33 mak lakon Uma fatin totál’’ espresa Padre Pároku Bedois.

Alumni Semináriu Maior interdiocesano Dili, informa konabá fahe apoiu sosiál ne’e katak família hamutuk 33 ne’ebé la iha ona hela fatin, mak sei simu apoiu sosiál ida ne’e.

‘’Serimónia entrega apoiu sosiál liu husi fahe materiá ida ne’e, ita entrega ba família 33, hanesan besi, kalen, simenti no materiál seluk  ne’ebé bele ajuda ba harii uma provizóriu’’.

Fatin refuziadu iha parókia Bedois hakfahe ba fatin rua, ida iha resintu eskola Santa terzenha do Meninu Jesus no seluk iha Eskola sabraka-laran ho refuziadu inísiu nian hamutuk família uma-kain 58.

Jornalista : Arménio.