Arte Rituál “77” Apoiu Xanana No Ramos Horta

Jornalista : Arménio //

G-RTV.com (Dili): Líder másimu Arte Rituál “Sete- Sete” (77), Raimundo do Carmo ho kódiku “BIRU SADAN” no Santiago Tilman deklara nia apoiu bá Líder Nasionál  Kay Rala Xanana Gusmão no Premiadu Nobel ba Paz, Jose Ramos Horta nia movimentasaun polítika períodu 2022/2023.

Deklarante na’in rua ne’e alerta bá membru organizasaun 77 tomak atu apoiu Kay Rala Xanana Gusmão nu’udár Prezidente Partidu CNRT no José Ramos-Horta hanesan kandidatu Prezidente Repúblika 2022-2027.

“Nu’udar na’in bá Arte Rituál “Sete -Sete” (77), ha’u apela ba membru Arte Rituál 77 atu hamriik firme nafatin hamutuk ho ha’u, mai ita hamutuk fó apoiu ba Lider Istóriku, Maun Boot Kay Rala Xanana Gusmão no Maun José Ramos Horta hodi sai Prezidente Repúblika períodu 2022-2027 no maun bo’ot  Xanana ba Primeiru Ministru hodi sira rua hamutuk ho Lider Timor-oan sira seluk hadia nasaun hodi dezenvolve no hasai povu husi kiak no mukit,” dehan Líder Másimu Arte Rituál “Sete- Sete” (77), Raimundo do Carmo “BIRU SADAN” akompaña hosi Santiago Tilman iha rezidénsia, Fatumean, PostuAdministrativu, Fatuemena, MunisipiCovaliman, kuarta (09/02).

Iha karta komunikadu ne’ebé G-RTV.com assesu, Raimundo esplika liu tan bainhira iha membru ka ema intelektuál ruma mak lori organizasaun nia naran, hodi apoiu kandidatura Prezidente Repúblika seluk, sira sei la konsidera no la reprezenta Arte Rituál 77 nia naran.

“Se ema ruma lori Arte Rituál 77 nia naran apoia fali kandidatu seluk, ami konsidera ne’e la reprezenta 77 nia naran,” nia alerta.

Iha fatin hanesan Santiago Tilman nu’udar oan mane bo’ot husi Saudozu Fundadór Arte-Rituál 77 “MAUK MORUK” deklara, Arte-Rituál 77 moris ho nia prinsípiu rasik no firme nafatin apoia Xanana no Ramos Horta.

“Ita apoiu ba lider sira ne’ebé iha prinsípiu hakarak hadia povu moris no hadia dezenvolvimentu ba nasaun,” tenik nia.

Arte-Rituál “SETE-SETE” (77) harii husi Saudozu, João “LUAN MORUK” ho nia belun di’ak Saudozu “MAUK MORUK” iha loron 7 fulan Agostu 1942 ne’ebé moris no sai hosi Uma-Lulik, “BUTAK BUNAN BEI-LUARESAK”  iha Fatumean-Covalima.

(Remata)