G-RTV News ( 27/03/2021) : Aplika Serka Sanitária no Konfinamentu Obrigatóriu ba territóriu Munisípiu Dili ne’ebé hahu iha loron 09/03/2021 to’o loron 2 Fulan Abríl tamba COVID-19, provoka estudante sira ne’ebé hala’o estudu iha kapitál Dili infrenta hahan menus ka hamlaha tamba la assesu ba hahan husi ina-aman sira, liu-liu sira ne’ebé hela iha uma-aluga ( KOS).
Ho situasaun ne’e, obriga Assosiasaun Assaun Solidariedade Postu-Administrativu Luro, Munisípiu Lautém, hamri’ik hamutuk ho Luro-oan iha Dili no Rai liur atu ajuda estudante sira ne’ebé hela iha kos :
‘’ Apoiu ne’ebé ita fahe ba loron ohin, ne’e faze da-ruak nian, apoiu ne’e mai husi Luro-oan hotu-hotu liu-liu rai liur, no sei fahe ba dala uluk ba estudante nain 100 ne’ebé hela iha Kos no sira seluk sei fahe tuir mai’’ haktuir Prezidente Assosiasaun António de Jesus Lira, Iha Sede Suku Faról, Munisípiu Dili ( 27/03/2021).
Fontes ne’e esklarese liu tan katak Apoiu ne’ebé iha mak hanesan Fós, Mina, supremi no sei fahe ba estudante Luro-oan ne’ebé iha Dili hahu ensinu Báziku ( SMP) to’o nível Universitáriu.
Iha fatin hanesan, Eis-Deputadu Osorio Florindo hanesan Luro-oan, hateten katak ‘’ Luro-oan halo assaun ida ne’e laós de’it tamba hamlaha ka situasaun agora maibe desde uluk bei-ala nia tempu, no ami laós tamba ema ne’ebé iha kbi’it mak fahe ba imi maibé hanesan Luro-oan iha situasaun difísíl sira ita sempre apoiu malu, atu labele Luro-oan hamlaha, depois, Inan-Aman sira dehan imi nia Maun sira iha ne’ebá la hare imi’’., haktuir Eis-deputadu ne’e.
Intervensaun husi atuál Prezidente Partidu Demokrátiku ( PD), Mariano Assanami Sabino katak hanesan maun sira, apoiu la’ós tamba atu buka votu ou husu apoiu polítiku ruma, maibé hanesan Luro-oan sempre Apoiu malu, no Atuál Deputadu ne’e enkoraja estudante sira ne’e katak ”Maske hela iha Uma, maibé keta haluha estuda nafatin, labele lakon vontade atu estuda”.
Estudante benefisiáriu ba asaun solidariedade refere agradese tebes ba Luro-oan ne’ebé ho laran luak ajuda ona sira iha tempu difísil ida ne’e :
‘’Hanesan Estudante Luro-oan sente orgulho tebes tamba ho laran luak bele ajuda ami ne’ebé hela iha Kos durante ne’e’’ hato’o Adida Maria, estudante UNTL husi Luro ,
Antes ne’e iha loron 20 fulan ida ne’e, Grupu ‘’ Lautém-Oan Tane Malu’’ hala’o asaun hanesan iha Munisípiu Dili ba estudante husi Munsípiu Lautém-oan hotu ne’ebé hala’o estudu no hela iha uma Kos iha kapitál Dili liu-liu iha situasaun serka Sanitária.
Jornalista : Julio Paixão.
Editór : Arménio.
loading="lazy" />