G-RTV NEWS : Atu minimiza transmisaun COVID-19 iha Territóriu Nasionál, CRUZ VERMELHA DE TIMOR LESTE hala’o atividade dezinfekta ba movimentaun transporte no prepara ekipamentu fase liman ba motorista sira.
‘’ Cruz Vermelha hanesan ekipa ida husi Ekipa Task Force ba prevensaun COVID-19 nune’e ita servisu hamutuk ho PNTL no MS hala’o atividade dezinfektasaun ba movimentasaun transporte iha dalan sira ne’ebé tama mai Munisípiu Dili .’’ Hateten João Pinto Soares ba G-RTV NEWS iha Kuartél Jerál Cruz Vermelha Timor Leste, Munisípiu Dili ( 19/03/2021).
Chefe Departamentu Saúde Cruz Vermelha ne’e haforsa tan katak ‘’ Ekipa Cruz Vermelha mós prepara Bé ba fase liman ni’an iha kada fatin dezinfektadu hodi ajuda motorista sira fase liman’’ haktenik nia.
Fontes ne’e esplika liu tan katak, ekipamentu hirak ne’ebé utilija ba dezinfektasaun, mai husi Ministériu Saúde no ekipa instalasaun ba dezinfektasaun ni’an hamutuk na’in 16 inklui volutáriu sira no hakfahe na’in 4 iha kada pontu entrada mai kapitál Dili.
Nia hatutan ‘’Atividade seluk ne’ebé Cruz Vermelha hala’o mak instalasaun Bé moos, apoiu tenda ba pessoál seguransa iha pontu entrada sira mai kapitál Dili, no apoiu infermeiru husi Cruz Vermelha ba iha SIJK no Karantina’’.
Atu hakotu, João Pinto klarifika katak, Cruz Vermelha nia atividade ba prevensaun COVID-19 nian, hala’o iha Filial Cruz Vermelha sira iha territóriu nasionál tomak. Nia klarifika mòs katak, agora dadaun Cruz Vermelha hamutuk ho voluntàriu sira hala’o nia servisu barak liu ba iha prevensaun dengue iha Timor Leste.
Jornalista : Julio Paixão.
Editór :. Arménio.
loading="lazy" />