Dadus Atuál COVID-19 : Detetadu na’in 9, Lautém mosu kazu 1.

G-RTV NEWS: Rezultadu kazu pozetivu COVID-19 ba loron ohin ( 22/03), tuir Informasaun husi SS-SIJK liu husi konferénsia Imprensa ne’ebé G-RTV assesu hatudu detetadu na’in 9, Munisípiu Dili ho de’it kazu foun Na’in 4.

‘’Munisípiu Dili Deteta kazu foun na’in 4, inklui estudante universitáriu ida, nune’e Munisípiu Dili hamutuk 183 kazu pozetivu COVID-19, ne’ebé hakfahe ba klaster hamutuk 35’.’ haktuir Dr. Rui Maria de Araujo, iha SS-SIJK, CCD, Munisípiu Dili ( 22/03/2021).

Ba Munisípu Baucau no Vikeke, porta voz ne’e relata katak Iha Baukau La iha Kazu Foun maibé nafatin buka tuir kontaktu besik husi sidadaun pozetivu Munisípiu Baukaun nian no iha Munisípiu Vikeke deteta  iha kazu foun na’in 4.

Offisiál SS-SIJK deklara mo’os katak Munisípiu Lautém iha kazu detetadu foun 1 ne’ebé hala’o viázem sai husi munisípiu Dili iha Loron 18 fulan ida ne’e :

‘’ Munisípiu Lautém deteta kazu foun 1 ne’ebé hala’o viázem husi Dili ba Munisípiu Lautém ho autorizasaun husi SIJK iha loron 18 liu bá no bainhira ekipa saúde foti nia amostra no haruka mai iha laboratóriu nasionál, no deteta katak nia hetan pozetivu COVID-19. Sidadaun refere hela iha aldeia Reisoru, Suku Home, Postu Administrativu Lospalos Villa’’.

Rui Maria esklarese mo’os katak dadus jerál ba loron ohin nian, kazu foun na’in 9, kazu rekoperadu iha na’in 4, nune’e kazu ativu COVID-19 iha Timor Leste hamutuk 211 no fontes ne’e reforsa tan katak teste laboratoriál hamutuk 656 ho teste PSR nian.

Konabá atu hetan autorizasaun sai husi Serka Sanitária Munisípiu Dili, Eis-PM ne’e klarifika katak ‘’ hahú loron 19 Fulan ida ne’e to’o ohin, Laboratóriu Nasionál hala’o teste ba ema sira ne’ebé atu hetan autorizasaun hodi sai husi Serka Sanitária Munisípiu Dili, hamutuk ema na’in 420’’.

Fontes ne’e antes hakotu konferénsia ne’e, sempre fo hanoin ba públiku katak sidadaun sira ne’ebé sai husi area Dili antes Serka Sanitária hahú, obrigatóriu tenke aprezenta-an ba ekipa Saúde, no nia husi ba populasaun sira hotu liu-liu munisípiu afetadu sira atu tuir nafatin regra ba prevensaun COVID-19 ni’an.

Jornalista : Amar Asénsio / Elias Dias.

Editór : Arménio.